Notice: Undefined variable: relatedArticlesCount in /home1/datalyz/public_html/tounsia/plugins/content/tags.php on line 149
مانيش هارون
Fatma Cherif - فاطمة الشريف
ما طلبتش المستحيل...
حبيت مرا نقصّر معايا الليل ..
تاقف معايا و كيما نحنّ عليها , تحنّ عليا ...
و تدوّش لأمي و تبنن بيها...
من باب الواجب و مش من باب المزيّة ...
ما كذبتش عليك ...
قتلك من أول نهارعاللي ليك
و عاللي عليك ...
تطييب و كنسان و تسييق ...
ومش عقاب النهار تفيق
انا خذيت مرا بش تفيّقني هي ...
خذيتك بش تخيّطلي كلاسطي المنقوبين ...
و نرّجّع فلس السوريّة ...
تلم معايا ميتين فوق ميتين ...
نصرفوهم نهارت الي تظلام الدنيا في عينيا ...
يمكن ما عنديش مال قارون ...
يمكن مانيش هارون ...
اما حبّييتك و مليتلي عينيا ...
و وعدتك نعيّشك في قلبي و نحطّك في ممّو عينيا ...
و ما تبدلتش عليك ...
و لتو مش فاهم انت علاش تبدلت عليا ...
من أول نهار كنت معاك صريح ...
يمكن تلقى فيران في الدار ...
يمكن يبات يصفّر علينا الريح ...
و انت وافقت عليا وقبلت بالآفار...
قلّي علاش مع الأرياح تميح ...
فما ريح البرّا ...
اما قلبي يدفّيك ...
و عمري ما بيّتتك برّا حضني و يديّا ...
علاش ما ثمُرش فيك ؟
العشرة و الأيامات الهنيّة ؟
انا ما خبيتش عليك ...
و صارحتك باللي فما ...
أكثرمن هكا ما نجمش نصرف عليك ....
اما نجّم نعطيك عينيا ...
تعرف عليا كل شي و الي فما فما ...
يمكن ما عنديش مال قارون ...
اما عمري ما هزيت عليك يديّا
حلمت نهنيّك ونستحفظ عليك ...
و انت حلمت بكرهبة و دار و راجل سمباتيك ...
مانيش لايم عليك ..
اما علاش في الأوّل قبلت بيّا ؟
نعرف لا فلوسي لا كوخي يواتيك ...
اما كارك مالأوّل ما سخفتش عليا
فاطمة الشريف
Website Design Brisbane
Tags: