خرجت من عشقتي الكبيرة بكرافات ... جرد كرافات راقدة في باكو أكحل مزيان ... وبجنبها زوز فلس .. أكهاو ! سرحت عشية كاملة نخمم في هالشي الي صار ... روّحت من رحلة أحلامي لكل .. بخيبة أمل ما كيفها شي ... وبصندوق ساكت ما يحبش يتكلم ... ما يحبش حتى يقول شنوا قتلو كي كان عندك

أنا مازلت نمّن الي انت كنت تنجّم تتصرّف بش تخليه معاك علاش رجعتهولي ؟ وعلاش ما لبستهاش وعلاش ما خذاتش بلاصة سبسيال في قلبك ؟ علاش ما مشاتش الامور كيما كان المفروض انها تمشي ... علاش كل شي مقلوب في الدنيا

الصندوق ساكت كلمة لا ... كيفك .. كاينك موّصيه بش يعمل عليا بالعاني كيما انت بالضبط تتعامل معايا

كاينو مومياء ... ويمكن المومياء كانت تنجم تسخف عليا وتتكلم كي ترى الليالي الي عديتهم نبكي

...

! عبث

تلاثة سنين لا عام لا ثنين .. مشاو لكلهم في الماء .. ذابو كي فص الملح ... ما عندي ما نشدّ عليك ... انت عمرك ما قتلي نحبك و لا حاجة من نوع هذا .. ما نجمش نقلك حتى كلمة و لا نجم نلوم عليك على خاطر انت عمرك الكل ما قتلي حتى كلمة

ويمكن سكتت هالسنين الكل بالذمّة بش في نهار كيما اليوم ما نجمش نتناقش معاك ... انت أكبر دكتاتور في ثقافة الحوار ... صحيح شديتك ألف مرة تغزرلي ... و صحيح نحسك تخاف و تتحيّر عليا ... اما هالأدلة شويا ... ما تنجمش تكفي لإدانتك ... أدلّة تافهة كيما هاذي تنجم تعني برشا حاجات كيما اني : مجرد نعجبك ... مجرد نحلى في عينيك ...
مجرد أنثى ... مجرد بدن

ضباب... !

هالطقس المغيّم الي معيّشني فيه عمرو ما خلاني نجم نفهمك فاش تخمم بالضبط ... انت عندك هيبة و أنا نحشم بش نسألك على برشا حاجات والمرات الشوية الي نتشجع فيها و ننشدك ... تنهرني و تكّش عليا ... الشي الي يخليني نشد تركينتي ونلبد كيما طفل صغير كشّت عليه المروّضة

...
طول عمري كنت نخاف منك ... طول عمري كنت نحسك أكبر مني ببرشا عمر وبرشا حيل ... وبرشا احتراف وخيرة في الدنيا ... طول عمري كنت نحسّك أقوى مني
ديما كنت نحسّ روحي صغيرة في حضورك

...

تلاثة سنين نحلم ... حتى كي نفيق ترجع تخدرني بالتفاصيل الصغيرة ونرجع نرقد ... تلاثة سنين في غيبوبة .. مرهوجة ... فقت اليوم بكابوس يفجع ... كي حليت عينيا تعدات حلماتي لكل قدام عيني تقول عليه فبلم ولا رواية قاعدة تتمثل قدامي

...
كيما اليوم جيتك صغيرة ما نفرز من الدنيا شي ... هاربة من الهم الي شفتو قبلك ... باهتة في امبراطويتك ... في مشيتك وعرض أكتافك ... حاشمة من الرجولية الي ظاهرة عليك ....
كيما اليوم تعدى عام و عامين و تلاثة

...
كل ما يتزاد عام ... تتزاد محبتي ... لين وليت معايا ليل و نهار ... و سكنتني ... وصبحت انت تغنيني عالدنيا وما فيها

...
تلاثة سنين نحكي معاك قبل ما نرقد من غير ما تسمعني .. ونحكيلك عاللي صار في نهاري لكل

..
تلاثة سنين نعمل في كل شي من الي نرقد لين نفيق على خاطرك ... بش نرى تبسيمتك ... الي في نظري تسوى الدنيا

...
تلاثة سنين تبكّي فيا

...
تلاثة سنين كل ما نجوع ترميلي فتفات خبز قديم ... تصبّرني بيه على جوع سنين ... وتمسحلي بيه دموعي

...
والغريبة الي أنا كنت نفرح بالفتفات

...
أنا المرا : الي كرشي كبيرة ... قنعت بكل حاجة "شويا" معاك

...
الفتفات قليل وين نتفكرو ... ما نتفكر كان الي انت الي كنت مشبعني

...
كي قطوس يموت على خناقو

...
تعلمت قد ما تعلمت منك ... وعمري ما تعلمت نشعف ونهز يدّي من نارك الي حرقتني ألف مرة

...
روّحت اليوم من غرام تلاثة سنين بصندوق أكحل ... فيه سر الهدرة الكل .. تقول عليه الصندوق الأسود متع الطيارات الي تطيح

...
الفرق الوحيد الي هو ما حبّش يقول الي نحب نعرفو ... ولا يمكن أنا فهمي ثقُل

...
بعد سنين تعب ... روّحت بتعب ما أكبر : كيفاش نجّم نخبي عندي حاجة تشرات أصلا بش تفكرك فيا ؟