Notice: Undefined variable: relatedArticlesCount in /home1/datalyz/public_html/tounsia/plugins/content/tags.php on line 149
كذب
Fatma Cherif - فاطمة الشريفنجّم نحكي عليك سوايع و ايامات و أشهرة و سنين و دهور
... قالولي برشا مرات الي انا كي نحكي عليك نزيان و عينيا تولّي تلمع و في غزرتي يتزاد لون ضاوي على محلاه
قالو فما حاجة في صوتي تتبدل .. و خصلات في شعري تطوال ... و لون في شفايفي يزيد يظهر ...
قالو الي عمرهم لا شافوني نحكي على حد كيما نحكي عليك ..
أما هذا لكل مش مهم ..
أنا نجّم نقعد نحكي عليك سنين ربي من غير ما نسكت , نجّم نحكي على فعلك الباهي و ننسى شومك و لومك ..
نجّم نحكي على صوتك الدافي كي تبدا مازلت كي فقت من نومك .. و ننسى بش نحكي كيفاش ما تجاوبني كان مرة في الألف مرة ننشدك فبها على همومك
نجّم نحكي على حنانة قلبك .. و ننسى الي ألاف الليالي رقدت نبكي من فعلك الدوني
انا نجّم ننسى انك وجعتني و ضريتني و غبت عليا بلا سبب
و نجّم زادا نصوّرك ملايكة هابطة من السماء .. و ننسى الي الملايكة ما ينجموش يكونو على هيّتك انت
ما عليناش
قعدت سنين أنا ندعيلك بالهداية ... ياخي كي هداك ربي أوّل ما بديت بديت بيا أنا ... حطيتني على جنب
و مع هكاكا و برغم الي سنين مشاو في جرة قرار خذيتو وحدك كي بعدتني من غير ما تفسرلي حتى علاش مازلت نجم نقعد نحكي عليك بالباهي و نقول الي انت راجل
مع انك ما تكسابش ريحة الرجولية
نحكي عليك بالباهي يمكن خاطرني مانيش متوازنة بيني و بين روحي ... نقول الي انت ما فماش خوك على خاطر انا نحبك تكون أحسن واحد في الدنيا , أنا نتمناك هكا .. اما انت في
الحقيقة عندك برشا نسخ منّك : واطين و كلاب .. و منكم ياسر في هالدنيا تعيشو بش تظلمو و تعفّسو العباد تحت ساقيكم ..
نحكي عليك و نقول .. كلام نعبّي بيه في الناقص الي في طبيعتك ...
نعمّر في الفراغات .. نغطّي في شحّة قلبك بكرم خيالي جبتو من مخي
و نحكي على حاجات ما فماش منهم .. كيما صغير يتيم كي ينشدوه شنوا عملّت معاك مرت بوك البارح يقول الي هي حكاتلو حكاية قبل ما يرقد .. في حين انو الحكاية ماهي إلا طريحة ...
و انا ياما كليت من عندك طرايح صوّرتهم من غدوة جنّة و فيها أكثر من بريكاجي ...
نحكي عليك بالمحبة الي حبيتهالك ... بالعشرة الي وديتك بيها .. بوجيعة .. بمقام عالي و قبة كبيرة دفنتك تحتها الاف المرات و سهرت ليل وراء ليل نحرس فيها ..
نحكي بعشقة كبيرة شطر الي فيها من وحي الخيال .. حبيتو كان صار هكاكا .. اما في الحقيقة مش ما صارش هكاكا و كاهاو .. اما ما صارش جملة
نحكي بالتخميرة .. عالوهرة و التهنكيرة ... على شي ما تكساب منو شي .. اما كان جا مخلوق فيك راك أحسن مخلوق ..
حاجات عمرك لا جربتهم .. براينيّة عليك .. مش طبايعك .. هز يدك مالطبق ... و ما عندك في هالسوق ما تذوق ..
نحكي عليك بنبرة هادية و يدين تتحرّك بش تعبّر أكثر ... و لمعة في العينين تبرقش تزيّن و توقّر .. في عبد ما يسوى شي
و نقول كلام كان تسمعو .. يمشي في بالك نحكي على حد آخر ...
ما يليقش بيك و ما تخلقش ليك و ماهوش قياسك ..
و هذا السر الي ما نعرو كان انا وياك ...
في الي يسمعو فيا الكل انت وحدك تعرف الي أنا نكذب ...
نكذب و نزيّن في كلامي بخط الذهب ..
انت الي بلاصتك وضيعة رديتك جاي من صندوق عجب ...
و ماذابيك كان تصدّق و تتمنى كان مرة يصدق الكذب
و من قلبك تتمنى كان في نهار مالنهارات يصح حديث اللعب
شاهي بينك و بين روحك تقعد تسمعني نهار و ليل بش تحب روحك كيما انا نحبها من حديثي و كلامي ...
اما تعرف الي مهما بالباهي حكيت ... الكذب يقعد طول عمرو كذب
بقلم
فاطمة الشريف
Website Design Brisbane
Tags: