Zaineb S. - زينب س

تعدات جمعة ملي شافها ..سحرتو بزينها و بعيناها ..مش منجم ينحيها من بالو ..مجرد التفكير فيها كان متعة بالنسبة ليه ..في الجمعة الي تعدات كان كل مرة يتسبب و يكلمها يسال عليها..تجاوبو بصوتها الرقيق ..بلكنتها السبيسيال..

يلقى روحو يتبسم من غير ما يشعر يقعد باهت شبيك انيس فيق مش انتي الي طيح على راسك الحكاية مساءلة وقت و توصل للي تحب عليه .. معاتش ينجم عندو رغبة كبيرة باش يعاود يراها ..يحب يقعد معاها و يكلمها ..كل ما يتفكر الي تنجم تسافر في اي وقت تزيد رغبتو فيها كاينو خايف لا تمشي قبل ما يوصل للي يحب عليه و يولي الممنوع مرغوب ..في العادة يكون عندو الوقت الكافي باش يلعب لعبتو في عقلو ..

المرة هاذي الوقت مش ملكو ..الوقت ملكها و بيديها..كمل الخدمة و شد الثنية مروح للدار ..حس روحو فاد معينوش باش يروح ..في لحظة جاتو فكرة مخممش برشا هز التليفون و كلم مريم ..الو مريومة ..اهلا انيس وينك سافا..وي لاباس..و انتي وينك فاش تعمل ..هاني راكشة في بيتي..مخلية البيسين و الجو و شادة البيت ..نسات حكاية الوتيل مشات من بالها جملا ..ههه اش عندي نعمل ...اسمع انا زادا فاد و معندي منعمل نصيف ساعة و نكون بحذاك..اااه شنوة ..مخلهاش تكمل جملتها و علقت ..قامت كيف المهبولة ..تخزر لروحها في المراية ..شنوة باش نعمل انا توا ..حمى اي حمى لازم نكلمها و نسالها ..تكلم فيها متهزش ..ينجم يمشي للوتيل و ما يلقهاش لازم تتصرف ..خطفت مفاتح الكرهبة و خرجت تجري..وصلت قدام الوتيل شافت كرهبتو جاية من بعيد هبطت تجري وقفت قدام باب الوتيل ..

وصل قدامها ..زمرلها ..مشاتلو طبست على الشباك .. ..مريومة مريومة اطلع .. .تربثت ..اهبط انتي تو نعملو قهوة هوني ..لا لا اطلع باش نهزهك لبلاسة مزيانة ..قعدت متردة مش عارفة شنوة تعمل ..تي هيا امشي تبسملها و طبس عالباب حلو ..هيا مريومة اطلع ..دارت طلعت بجنبو قلبها يضرب بالقوي ..كانت لابسة روبة برتال كوتون في الاخضر..من غير مكياج .. انيس كان من نوع الرجال الي يحب ياخو لمرا على غفلة ..يفاجئها يربثها و يشوف في حالاتها الكل و هي هكا على طبيعتها كانت احلى و احلى ..وين باش تهزني ..باش نهزك لبلاصة مزيانة برشا نمشيلها وحدي كيف نبدا تاعب و فاد ...والمرة هذي علاش مامشيتش وحدك ..من غير ما يخزرلها تبسم ..المرة هذي حبيتك انتي تكون معايا قلت اكيد وحدها كيفي ..دار غمزها ..مش هكا ..هههه كينك حاضر ..وصلو لبلاصة عالية دايرة بيها الاشجار و طل على البحر..البحر كان بعيد شوية لكن منظرو هبال ..صوت امواجو و نسمتو يردو الروح..هبطو ..

مدلها يدو باش تنجم تتعدى الحجر ..ايجا منا مريومة سايس روحك..وصلت بجنبو عدا يدو ورا كتفها و باليد لخرا شاورلها للبحر ..شفت ال vu ما شبها تسمع في صوت الموج ..حلت عيناها منظر و لا اروع النسمة كانت مطيرتلها خصلات من شعرها جبدت نفس قوي و سيبتو ..ايييه ما كنتش نعرف الي عنا بلايص مزيانة في تونس هكا ..اييه ما عندك ما ريت فما ما ازين ..بالرسمي !! نحب نراهم الكل ..ههه تهنى تو كل مرة نهزك لبلاصة .. الجو ..المنظر ..نسمة الصيف ..القمرة الي ضاوية اكثر مالعادة ..الموجة الي تهز و تجيب نساو مريم الهدف متاعها نسات علاش جات تعدى الوقت من غير ما تشعر معاه حكاو في كل شي ..

كان متكي عالكرهبة من قدام مربع يديه قدام صدرو و هي بجنبو..انيس زادا نسا روحو اول مرة يتصرف على طبيعتو مع مرا ..كان يحكي و يضحك مالقلب من غير تكنبيس و حسابات ..مريم : انيس ياخي ما عندك حد في حياتك ..تفاجأ بسؤالها ..حست بيه ..سامحني انيس كان ادخلت في حاجة ما تعنينيش ...ههه لا لا عادي ..سرح شوية و بعد تنهد و قلها ..تعرف مريومة السؤال هذا منعرفش نجاوب عليه عرفت برشا نساء اشكال انواع ديما دايرين بيا اما انا حاس بالوحدة عمري ما حسيت بحتى وحدة منهم ..حست بوجيعة في كلامو و بوحدة كبيرة عايشها ..انيس يعني تحب تفهمني الي عمرك ما حبيت ...دارلها قعد مركز في عينيها .. متصدقنيش كان نقلك الحب منعرفوش و لا عمري عشتو ..

كان يحكي و مش منجم يهز عينو من عيناها يعشقهم ...نسمة طيرتلها خصلة من شعرها هز يدو و عداها على وجها بعدها تعمد باش يعدي يدو في شعرها ..حست بتقشعيرة في بدنها ..حست بلذة اللحظة تصدمت في روحها بعدت عليه ..انيس هيا امان لازم نروحو ..سبقتو للكرهبة مش عارفة شنوة تعمل و لا كيفاش تتصرف معاه ..خلط علاها و على فمو نص تبسيمة ...كان متاكد الي مش هو انيس الي يترفض ولا يتقلو لا شاف الاعجاب في عينيها و مستحيل كان يطلع غالط رغم الي هي تحب تخبي تغطي عالي حاسة بيه ..لكن هو يعرف ...في الثنية حاولو يجبدو الهدرة يحكو في حاجات عادية منجموش ...كل واحد فيهم كان يقول في عكس الي يخمم فيه ...خذاو قرار و كينهم تفاهمو من غير ما يتفاهمو باش يسكتو الزوز....