Notice: Undefined variable: relatedArticlesCount in /home1/datalyz/public_html/tounsia/plugins/content/tags.php on line 149
ددّاش كبر و عاش
Fatma Cherif - فاطمة الشريف
بعد كل حكاية فاشلة ... تتقّص مالأول و لا في الوسط ولا مالأخر...من تالي و لا من قدام ... من فوق و لا من لوطا ... تتقوقع الطفلة في بيتها... كاس كبير من الهوت تشوكليت ... طزّينة رولوات بابي توالات ... شويا غنايات متع دمّار في البورتابل ... و النبي مولاك ... النواح و ما قالت الناس
بعد مدّة ليست بالقصيرة تكتشف الآنسة المذكورة أعلاه الّي البكاء ما عندو وين يوصلّ ... تولّي تتخّذ طرق أخرى لتجاوز المشكلة ... و تقعد مدّة باهية تمشي و تتدعثر ... حتى لين تلقى ثنيّتها و تتعلّم تددّش وحدها من غير مشّاي ...
الجمعة الي فاتت جاني أكثر من ميساج من أكثر من طفلة ... تتشكّى فيه من حكاية هاك الراجل الي حبّتو و ذاب فجأة كي فصّ الملح بسبب و لا من غير سبب ... و خلاّها وحدها, تجلد في روحها بسوط العشقة المزمّرة الي رماها فيها
...
شكون الي قال ديما البنات تتعب أكثر من الأولاد ... ؟
سي با فري
!
هاذي هدرة بيدونة ... اخترعوها الرجال بيدهم بش يحميو بيها رواحهم ...
شخصيّا نعرف برشا رجال يتعبو أكثر من الطفلة بيدها الي قصّو معاها
...
و ماكم تعرفو عاد المقولة الشهيرة "حُطّها في قلب صيد و ما تحطّهاش في قلب راجل " ههه
الراجل ذاك الكائن الذي لا يعترف أبدا بأخطائه ماهوش حجرة و لا ما يحسّش... و انما طبيعتو الديسكري أكثر ماللازم و الي تخليه ما يستعرفش فيسع .. و الاحتراف الي اكتسبو عبر السنين في شدّان دموعو و لبسان الماسك ... هوما الي يخلّيوه يظهر فري ستايل و ما على بالوش
...
و زيد الراجل كي يقصّ مع طفلة ما يشدّش بيتو ... و كي يشرب ما يشربش هوت تشوكوليت ... و كي يسمع يسمع وليد التونسي ما يسمعش النوّاحة متع حمادة هلال
...
هذه الحقيقة عزيزتي الفتاة ستفرهدك كثيرا في أزماتك و حروبك ضد النسيان القادمة
...
مسؤولية أكبر مني إني نولّي نفتي في امور العشق و المحبّة و الاعجاب ... هاني نشالا بش نبدا نجرّب فيكم و أهاوكا كان وحدة فيكم تضرّت نعملو كونستا و تتصل بالأسورونس ترجعلها ما يمكن ارجاعو
...
عن نفسي كنت كي نحب ننسى نعتمد كان على روحي ... بحيث ناقف لروحي و نحاول ننقذ نفسي بنفسي و أحيانا نتفورس على بدني و نعمل لروحي دزّة بش نرجع نخدم ...
كنت زادا نبكي ياسر ... و لمن لا يعرفني جيّدا يسرّني اخباركم بأنني بكّاية من البريمة ... و البكاء بالنسبة ليا متنّفس رائع
bref !
في الأول تعبت برشا ما بين أصدرت أحلام مستغانمي : "نسيان.كوم" ...ذلك الكتاب المعجزة
الكتاب هذا كان بالنسبة ليا نقلة نوعيّة و مرجع أساسي لكل مرا
...
وفي الحقيقة أنا مدينة لهاته المرأة بكل مرّة رجعت وقفت فيها على ساقيا
...
لذا و انطلاقا مما سبق عليكي صديقتي الفتاة أن تتوجهي الى أقرب مكتبة و تشري الكتاب ... أو تيليشارجيه من انترنات ...على خاطر أكيد بش يعاونك
أرجو منكم أن تخفوا هذا السر على الأولاد لا يقطعولونا دابر الكتاب من الدنيا... بش يراو البنات تتمرمد و تنوّح عليهم
بالنسبة للرجال ... يعرفو مليح شنوا يشريو في بلاصة الكتاب ... ما توصّيو يتيم على نواح
...
خلينا نكونو عمليين شويا ... أهم مبدأ في مشوار العلاج الي بش تتبعو هو انو : الطفلة الي تحبّ تنسى تنجّم تنسى ... و تنجم تنسى حتى أكثر من الي تتخيّل بشرط الإرادة و الإرادة القوية ... أي محاولة للنسيان خارج هذا النطاق ستبوء حتما بالفشل ... على خاطر بش تلقى روحك تدور في حلقة مفرغة
...
بالطبيعة فما حاجات ممكن تعاونك أكثر
كيما انك تحاول تنفرد بروحك شويا ... و تمشي لبلاصة بعيدة ما يعرفك فيها حد ...و لا تجرّب حاجة جديدة ما عملتهاش قبل ... و لا تعمل أصحاب جدد و تتعرف على طبايعهم و تتبادل معاهم تجاربهم في هالموضوع
..
بامكانك زادا كان تنجّم تعمل سفرة ... تقرا برشا كتب ...تسمع موزيكا جديدة ... تكتب و تقطّع الي كتبتو و لا تخليّه للذكرى بش تتفقدو نهار آخر و تضحك على روحك بعد ما تبرا
...
تنجم زادا تمشي تطّل عالرجال و النساء الكبار الي يقربولك ... خوذ من عندهم الحكمة ... فقد تنفعك خالة أمك المكهّبة عال120 سنة بحكمة تقعدلك مبدأ في حياتك
...
... او عموما تتقرب من ربي ... الصلاة على غير ما يعتقده البعض ... ستكون مكمّلا لمشوار العلاج متاعك ... و الي جرّبت الشي هذا أكيد تفهمني فاش نحكي ... كي تعطي صدقة زادا تحس براحة نفسيّة كبيرة ... كيما كي تحلّ المصحف و تقرا القرآن ... العبادات على مختلف أنواعها تنجّم تعاونك في توجيه تفكيرك الي ثنيّة أخرى غير الي في مخك ...
وفي ما يلي مجموعة من النصايح الي ماجاو شي ... بالك ربي يجيب في يدي الشفاء و أكون أول كائن فيسبوكي يديه تجمّد الماء
عزيزتي الفتاة الي قاصّة جديد
تفادي المرور من البلايص الي يبنّك فيهم سي وجه اللوح الي كنت تحبو .. و نقّص من هاك اللغة متع قابلتو بالزهر ... الهم آش تكذب
أكذوبة انك بعثتلو ميساج بالغالط ولاّت معروفة عالأخر ... أنصحك بتغيير الاسلوب خاصة و ان كنتم قصيتوها أصلا بسبب أكذبة أخرى من نوع ولد خالتي يحبّ عليا و أمي مارجتني تحبني ناخذو
xD
كفاية كذب كيما يقول أحمد حلمي
...
جو المسامح كريم الي عاملتو في بروفيلك ما عندو حتى داعي ... لن يفتح عليكي الستار كان تطيحي تتبربصي و تموتي فمّ
...
يزي من البركة في الفرش و قوم دوّر دمّك : ادخل للكوجينة و جرّب تحرود حويجة: غاتوة بالشكلاطة ولا ملوخية ... أي حكاية كحلا كي أياماتك الزرٌٍڨ
...
_ بالنسبة للرند في الملوخية أنا مازلت ما نعرش وقتاش يترمى في الأول و لا في الأخر أما عندي صديق كي خويا يعمل في أطروحتو في الموضوع هذا هو ينجّم يفيدكم _
المهم اتلهى في أي حاجة و رد بالك تخمم تحط روحك معاه اون كونتاكت بأي صفة من الصفات .... بلوكي الكازي و حطو في الليست نوار متع تليفونك
...
و توقّعي أن تتآمر عليك الدنيا ما فيها : الغنايات لكل بش يوليو يحكيو عليه و الأفلام لكل فيهم واحد يشبهلو ... و كل ما تقابل حد بش يقلّك شبيك ماكش مع فلان ... و حتى من الفيسبوك سيتحفك بخليقتو متصدّرة ليزامي متاعك كل ما تحلّ بروفيلك ... أما العيب مش فيك أنا مش قتلك سوبريميه ؟ بوهالية زايد
قد يصيبك مرض العصر متع ميساجات الفيسبوك ... كل ما ترى نكتة حمرا يمشي في بالك هو بعثلك ميساج ... أرتاح و أشرب عرقك ماهوش هو
نقّص من التجرتيل و كبّان أي سروال على أي مريول .. تقول عليك تلّم في السرّ ... الي يراك قريب يعطيك مية في يدّك و يقلّك ادعيلي دعيوة خير
توقفي عن وضع نفسك في خانة البنات الستوندار الي حكيت عليهم في مقال سابق .. و أعمل لروحك شويا قدر و تميّز ... و ان كان لا بدّ من البكاء فابكي بفيانة و مش لازم تمخط و تسمّع الجيران الي انت قاعدة تغرّد
نقّص شويا من سؤال زعمة فاش يعمل توا ؟ شعندو يعمل ماو راو متنيّل متلقّح تحت الظلف يشرب في الهوت تشوكليت متاعو و يسمع في بلقاسم بوقنّة يشدو بأعذب الكلمات في رائعته عندي 7 سنين تعدّوا ... أخطينا بركا
بامكانك أيضا أن تخيّليه في وضعيات مشمئزة ... فقد يفيدك ذلك ... تخيّلو يسرّح في آفابو مسكّر
...
بالنسبة للأولاد من غير ما تتخيّلو مانا نعرفوكم بنات تونس ديما ما يشهّويكمش ... و قلوبكم ديما عند القوّرة حفضنا درسنا سي بون
عزيزتي الفتاة كان الشي هذا لكل ما فادكش ... فما بيدون جديد متع جافال جودي بريحة الغلّة ... 3 و لا4 كيسان عالخواء و نشالا تو تقوم لا سو لا سوية
بقلم فاطمة الشريف إلي كان نصحت روحها خير
xD
Website Design Brisbane
Tags: