Notice: Undefined variable: relatedArticlesCount in /home1/datalyz/public_html/tounsia/plugins/content/tags.php on line 149
حكايتي معاها
Fatma Cherif - فاطمة الشريف
ما ناخوش راجل فاسد بعمل الموبقات لكل و من الزطلة و الشراب و الحرابش ما يصحاش ... ما ناخوش راجل مسّخ
قالتهالي و هزّت ساكها و قامت و خلاتني
عديت سنين نحلم بش نقابلها على طاولة وحدة ونحكيلها على حياتي الي رهنتها في كلمة من فمها ... و كي تحقق الحلم خلاتني و قامت
...
سهير : بنت حومتي ... نتفكرها نهارت الي تولدت . نهارت الي دخلت للمكتب , نهارت الي وصاتني امها بش نحميها من خطر الثنيّة ... كي خذات السيزيام و الباك و الميتريز ... ونتفكّر كيفاش تفتحت كي الوردة و ولات أزين صبيّة شافتها عيني
...
فتتكم بالحديث و نسيت نقدملكم روحي : أنا شادي ... كنت عايش حياة عادية قبل ما تتولد سهير نقرا في الروضة و نلعب و صانع حياتي ... كي جات سهير للدنيا ولات هي روضتي و هي قرايتي و هي مهمتي في الحياة ... من نهارت الي هزتني امي معاها بش نمشيو نهنيو امها بالطفلة الجديدة الي انزادتلها و انا انزادتلي في حياتي مياة فرحة و فرحة ...
كنت نعدّي جمعة كاملة عاقل بش في آخر الجمعة ترضى عليا أمي و تهزني معاها لدار سهير ..كنت نقعد بجنب سهير و ما نتحركش .. نتفرج في خدودها و في عينيها الزرق كي البحر... نبهت فيها سوايع ... و نعطيها يدي تقدمها بسنيها الطالعين جدد ... أنا الي علمتها تشد المغرفة و الستيلو ... و أنا الي وصلتها نهارت الباك بكرهبتي و أنازادا الي ريتها بعينيا تكافي تعب السنين الي تعبتو معاها بمحبتها لفرخ هامل يقرا معاها
..
غرست فيا سكينة حافية و انا نرى فيها من بعيد ما بين يديه ... قلت لروحي طيش صغر تكبر و تعمل عقلها ... نجحت و كبرت و مخها كبر أما ما تبدل شي .... كل نهار توصيني امها عليها و تقلي "رد بالك على وخيتك " نبلع دم السكينة ونسكت ... سهير ماهاش اختي و سلطة عليها ما عنديش ... و محبة ما حبتنيش ... اما عندي عليها حق العشرة و اليوم نكلمها ..
طلبتها ... في مخي ميات حكاية و حكاية كي هزّت بصوتها الحنين نسيت آش بش نقول ... تقويت على روحي و قلتلها سهير انا ريتك مع فلان ننصحك كي خوك رد بالك على روحك و أخطاك منو ...غسلتني و شللتني و قالتلي ما عندكش عليا حتى سلطة .. و ما مدخلكش فيا
...
من وقتها سكتت و جبدت ساقي من دارهم ... و قدما لحلحت بيا امها بش نرجع نهزها و نجيبها قلتلها سامحني ماعادش في ثنيتي و مانجمشي نوصّلها كي قبل ..
و بالحق ماعادش في ثنيّتي
...
على خاطرها سهرت ليالي في برد البركون نستنى في للاّ تروّح ... و من بعد السيّد الي كنت نعرفها تخرج معاه , ولات كل يوم تهبط من كرهبة نوع ... عقاب الليل و وجوه صباح ...تقلبت قلبان ... دخلت في دوّامة أخرى .. كاينها مش سهير الي ربيتها على يديا
...
في جرّتها دبرمت ... نعدّي الوقت لكلو نغزر للسقف ... تصويرة عينيها ما تفارقنيش .. و منظر شعرها يهز فيه الريح أيامات الصيف... أنا الي كنت نتلهى بيها كي نمشيو للبحر و أنا الي كنت نشدلها المنشفة بش تبدّل حوايجها و ما يراها حد ... أنا بيدي كنت نغمّض عينيا عليها بش تقعد في عيني كبيرة... و نقعد كبير في عينين روحي ...
كلموني الاولاد نهار السبت العشية قالولي نعملو طرح رامي في للقهوة متع الحومة ... في الأول ما حبيتش كي شدّو صحيح قلت نمشي معاهم بش يخطاوني ... و احنا قاعدين سمعت طراطش حديث من الطاولة الي بجنبنا على سهير ... يحكيو عليها في كلام تمنيت الارض تتشق و تبلعني بش ما نسمعوش ...
غلا الدم في عروقي و ما حملتش درت للجماعة الي تحكي قلبت عليهم الطاولة .. و هدّيتلهم أفامهم ... دقدقت القهوة فوقر يوسهم ... مولى المحل كي شاف قهوتو مفشّخة هكاكا عيّطلنا الحاكم
...
وعديت الليلة في اخمج بلاصة في الدنيا على خاطرك يا سهير ...
كي رجعت لخدمتي بعد جمعة عيّطلي عرفي قالي يعيّشك ما تحرجنيش .. هز دبشك و أخرج ...
خسرت خدمتي على خاطرك يا سهير ...
و قعدت كل ليلة نسهر نستناك تروّح مع شبيّب جديد... و بش نقاوم جربت الحرابش و الزطلة و الشراب كيما تحكي ...
ما نصحاش بش ننساك ... و بش نهرب
...
الي عايرتني بيه لكلو موجود و صحيح ... أماماصاب مرّة يرجعلك عقلك و تعرف علاش وصلت أنا لهالمرحلة ...
أنا على خاطرك عملت الشي هذا لكل ... و انت ما حكّرتش ... و تحبني نراك كل ليلة راجعة مع واحد يغزرلك كان لبدنك الي ياما غطيت عينيا بش ما نشوفوش و بش نستحفظ عليك و عليا ...
قلّي توا ... شكون الغالط و شكون الظالم وشكون المسّخ ؟
فاطمة الشريف
Website Design Brisbane
Tags: