Notice: Undefined variable: relatedArticlesCount in /home1/datalyz/public_html/tounsia/plugins/content/tags.php on line 149
تحب تقلب الصفحة
Dalel Nasri - دلال النصريتحب تقلب الصفحة
تطويها...تخبيها..
تحرقها..وإلا حتى تغرقها
ما تتقلبش..
تكبش..
الصفحة إلي كان في بالك وفات
تولي تدبش و تخبش..
تغرز كلماتها فيك..
حبارها يعميلك عينيك..
والصفحة..تولي صفحات..
تولد..تتكاثر..
تقول cancer
تاكلك من داخل بالشوية بالشوية
توفيك..تفنيك..
تخنقك..تعصرك.
وألي كنت ناوي تغرقها
في لخر هيا تغرقك..
تدور بيك..يضيق عليك النفس..
و يسكت الحس..
و تنطق الصفحة..
ترمي في وجهك السم و الهم
إلي خبيتو في تراكنها..
تعاود تخرجلك خنارك..
وتفرش قدامك دمارك..
وتقلك..
أنا ما نتطواش..
ما نتنساش..
نقعد ديما حية...وشمة
وحمة لا صقة في جلدك..
وصمة..
تهبل..تصيح..تعيط
تقطعها..ما تتقطعش.
تلصقك..تلبسك
لين تعرقك..
تحاول تخرج منها...
تحاول تقلع جلدك..
تتوجع...تنزف..
يفرغ دمك ..و مايوفاش همك
ووجيعتك تزيد..
تهز القلم..و تكتب بالدموع و الدم
من جديد على صفحتك
دلال النصري
Website Design Brisbane
Tags: