Notice: Undefined variable: relatedArticlesCount in /home1/datalyz/public_html/tounsia/plugins/content/tags.php on line 149
انت العيد
Fatma Cherif - فاطمة الشريف
العيد انت ...ضحكتك بعد التكشبيرة ... و الغزرة الي تفضحك كي تقلي نسيتك ... و الفرحة كي نمشي و نخليك في طمبك الشارع و نتلفتلك نلقاك تتلفتلي ...
العيد هو هاك التعنيقة الي تجي بعد الفراق ... نهارت الرجوع هو العيد الكبير ... و الصغير ... والمولد و المواسم الي ترد فيهم الخطيفة لوكرها الي هجرتو من عمناول
العيد قعدتنا الاولى قدام البحر ...السر الاولاني الي صنعناه في غفلة من الزمان ... الاعترافات الاولانين ... حكايتنا السرية مع الموجة ومع القمرة ... و تشربيكة يدينا الاولانية ... الي جات بلاش تخمام .. و الي طيحت ميات سور و ميات حيط خايح ...
العيد نهارت الي ريت في شعرك اول شيبة .. قدااااش فرحت بيها تقول البيبي الاولاني ...
و نهارت الي غطست معاك ناكل في حوتة بيديا .... بلا تشقنيص بلا تشخنيق بلا يجي و ما يجيش ... و بلاش قوندووات ...
و نهارت الي حطيت على رقبتي بوسة بعد ما سكرتلي سلسلة الروبة البيضا ...
العيد نهارت الي نسيت مرض الروب الكحل و تلفتت نلقى روحي خارجتلك بروبة بيضا ... العيد شهقتك الاولانية قدام مرا تكتب بذمتك ... و تلبسلك الابيض و تشطحلك .. وما تشطح كان ليك ...
العيد تبسيمتك كي تفيق الصباح تلقاني نتفرج فيك .. و البانو الي نحضرهولك بيديا ... و الصباط الي تشريه معايا و الديتايات التافهين الكل ..
العيد خطاويك كي تدبّ تقول تمشي في وسط قلبي ... و كي تحكي عليا و تردني رواية بدات و ما لقاولهاش نهاية ...
العيد فطور الصباح معاك ... والعشاء قدام شمعتين ... و القلب باهت في سماك ...
العيد انت ... الايامات الي لفيت فيهم عليا بش ما نستبردش ... و المرات الي فضحك فيهم الخوف في عينيك ... و الألف مرة الي استحفظت فيهم عليا ...
و الضحك بعد كل سبكتاكل و فيلم نقصو عليه و نخرجو ..كي نوشوشلك في وذنيك .. فك علينا ايجا نخرجو نتمشاو .. البرا برد يفتق ...
العيد سوريتك كي انحيهالك و نلبسها ... و نراك كاشخ فيا ... تقول هبطتلك مالقمرة ... و كي تحط يدك على خدك وانا انقز فوق الفرش كي الغشاشر ... و اللمعة الي تعبي عينيك كيف
تجيبلي حاجة و نعنكش في رقبتك كي الصغيرات
انت العيد ... و الفرحة .. و أماليا ... و أهلي ... و انت سبب الفرحات القريبة و البعيدة ....
العيد من نهارت الي عرفتك .. ساكن فيا ...
فاطمة الشريف
Website Design Brisbane
Tags: