Notice: Undefined variable: relatedArticlesCount in /home1/datalyz/public_html/tounsia/plugins/content/tags.php on line 149
احكيلهم!
Saida Jaafer - سيدة جعفرفي خاطر كل فيقة و حلة عيني بعيدة على عينك
في خاطر كل كلمة حلوة قلتهالك، ناقصتها اك البوسة على جبينك
في خاطر كل صحوة من منام كنت انت فيه، و أول كلمة بعدو كانت " وينك" ؟
في خاطر كل شدة يد
و كل حب من قلبي ليك تمد
في طبق ذهب
هدية مني ليك، و م عرفت تصونو..
في خاطر أيامات كنت نحبك فيها و ما حبيت
في خاطر عمري ليك و حقي عليك و الروح لي بدلت دارها و سكنت فيك
في خاطر هالعيون لي تو تغزرلك
العين في العين، الجبين عالجبين، و الروح المشوية في الكنين
قلي!!
علاه؟؟ قلبك لي حسبتو قلب! حبي ما عباه؟!!
ما كفاكش هواه!؟
ما عشقتش سماه كيما طرت أنا في سماك!
تي و الرب اللي خلقني شاكة لي نفسو خلقك باش عليا عماك!
هذا الكل برود؟ هاني ماشي و تو ليك نعود؟؟
اي وينك؟ وين الوعود؟؟
وين " والله نحبك " و " فيك مش مسلم "
ولا كي كل الرجال!
تغنيو ع نفس الموال؟؟!!
طالت الحبال،. سهرية لبرا
و أنا نستنى
و نقول لا تو يرجع،.
يا طفلة رد بالك منو تتبرى
خليك وفية حرة، فيك برشا عسل و شوية مرة
تو يرجع، و في حجرك يدفن راسو
و كي كل مرة، يقلك سامحني خليتك و يحلفلك انتي كل ناسو
و كي الدغفة تعاود تصدقو و تكذب احساسك و تصدق احساسو
و تشرب من كاسو، و تتبلى
و الكاس يتعبى و يتملى
و انتي على وذنيك راقدة مهنية
تبات الليل تكتب عليه
تصبح الصباح تشعر بيه
تبعثلو الكلام، ولا لا!! تكلمو تقولهولو ب صوتك
تعرفو منو يذوب
تقرالو حرف حرف، جملة جملة..
اش يجاوبك؟
معادش تكتب عليا..
معادش نكتب عليك متاع شنيا؟
قالك عليا نعرف نعبر عاللي فيا؟
غير بالكتيبة؟..
باهي هات نلحنهملك غنايات و نغني عليك
و يطول ليلي و نونس روحي ب غناياتي ليك
لا زادة ؟ ..
باهي هيا نعملو خرجة؟
نحلو فهالشوارع هرجة ،ننقشو اسامينا ف كل زنقة،
نوشموهم، نحفروهم،
هيا نسببلك مرجة لين تفد كي عادتك تقلي يزي مصغرك
و تفسد الخرجة و نبقى نعشق في خليقتك مغششة و تحلالي الفرجة..
لا زادة ؟ ..
باهي احكيلهم انتي، قداه متحبنيش!
قلهم ميسالش خاطر اني طار عليا الكلام و المنام و ما عاد في حروفي ليك حتى ملام
احكيلهم انتي اني أيست منك و السلام
احكيلهم!
قداه بتت نبكي منك، قداه من تليفون طفيتو، قداه من كلمة نحبك خليتها معلقة
قداه من ليلة يا مرقدتهاش يا رقدتها متقلقة،.
قداه من مرة قتلي نحب نشوفك اما منجمش نشوفك ،و انا كنت نعرف و انتي كنت تعرف وين كنت تمشي..
ملامح وجهك وحدها كانت مشلقة..
ولا حاشم تحكي؟ قول ميسالش
بالك انا غلطت في روحي و حسبتك اكثر منك
بالك كل كلمة نحبك و محلاك و مبنك
خذات اكثر من حقها عندك
قلهم و ما تخلينيش اني نحكي
شادة روحي باش معاش نشكي
و باقي نبكي فيك و عليك و نزيد نبكي
شي؟ ماكش ناوي تحكي؟ ..
سيدة جعفر
Website Design Brisbane
Tags: