Wala Baya - ولاء بية

قالولي لشكون تكتب؟ إلي عاشقة فيه ما يعرفش يقرا، ما يشوفش الحروف، ما يسمعش في صوتك! قالولي زايد كلامك وهدر حبار أقلامك!

قلتلهم الكلمة سكاكن ، لو كان تحبس في القلب وما تخرجش تتقلب على مولاها، وتذبحو!

قالولي حتى كان هو بعمرو ما حس بكلامك؟

قلتلهم عمري ما كنت نكتب ليه، نكتب لروحي!

قالولي أكذب على غافل، تي كلامك لكل هايم بيه، وتصويرتو ساكنة حتى في أبيض أوراقك!

قلتلهم تصويرتو معشة في سواد عيني ، أما عمري ما بكيت... الدنيا وليت نشوفها ضباب من ورى خيالو... نشوف وجهو كل صباح في تنوة فنجاني ...ضحكتو شمسي في برد الشتاء ..
وغيمتي في حر الصيف، أوراقي ألي يذبلها الخريف، ونوار ربيعي ألي عمرو ما ربع؛ العام يدور على وقت منڨالتو...

قالو الطفلة ضبعت، ولات تعيش على وقتو، وتهدر كان بسيرتو!

قلتلهم شنعمل في روحي كيف تخلقت نكتب، قبل حتى ما نتعلم نتكلم ونمشي؟! شنعمل كيف أنا مرا عشاقة، وعشقتي جات في راجل ما يفقهش كلامي؟

قالولي بطل لكتيبة، وإلا أحرق العشقة، وذري رمادها فوق الأوراق! فماشي ما تبرا من هل مصيبة! قالولي ايجا نهزوك لشيخ المدينة ، نعملولك وعدة وجاوي وبخور ونخرجو جنون الكتيبة !

قلتلهم وجنونو هو اش نعمل فيهم؟! نخاف نخرج جنون الكتيبة ونقعد أنا وجنونو وحدنا، نهبل ، نتجن ، ما عادش نعرف كيفاه نساير جنونو! وحدها الكتيبة تنجم تريض جنونو إلي لبستني من ميات سنة لتالي ، من وقت إلي الكتيبة فال ، والجنون تخرج من وسط القلل تفتن أرواح الصبايا إلي تمشط شعوراتها على ضفاف الوديان المدفونة... من وقت إلي شيخ مدينتكم كان عندو أربع نعجات يتلو وراه ، وهو هايم من بر لبر ، يستقات في رزقو المفرت في سفوح الجبولات، ويحلم بللا الغنجة تعرضوا في وسط الثنايا ، تتكى معاه في الليل الأدحس، تعد نجوم السماء، تبنن بيه لين يغلبو النوم... توة شيخكم ولى موحيلو، و ولاد بإسم الله خدامو، و ولى يستقوى على جنون الكتيبة! باني ڨبة ومقام ، وعاملي فيها شيخ الطريقة!

 

قالولي يزي لا يطيح فيك شيخنا ! إحشم يا بنية ، وما تطاولش على الولية والصالحين، يدڨڨوك ، ونقعد نعانيو فيك! أعقد النية و صفي قلبك ، فماشي ما شيخنا يرضى عليك ، ويداوي الأسقام إلي متوغلة فيك، يا بنتي يهديك ! عاجبك حالك و إنت ضايعة بن الأوراق وبين خيال راجل مهوش سائل عليك؟! تي ايجا نعملولك وعدة ، سناجق و بنادر ودفوف تضرب، نسيلو الدم ونشعل شمعة في مقام سيدنا الشيخ، بركتو تحل عليك وتصبح لا سو لا سوية، صبية مڨدودة والرجال هابلة عليك!

قلتلهم جنوني قوي على شيخكم، ما ينجموش، ما يڨدوش، ما يفهموش! و أنا ما نعرفش نتخمر على وعدتكم ، وما نفهمش كلام حضرتكم ! أنا تخميرتي ما تجي كان في كاس يرشف من لون عينيه ، وشمعة نشعلها نذر فوق خديه،... نعمللوا ڨبة فوق نور جبينو ونشيدها فوق الجبل العالي، المعلق في سماء بلاش غيوم، وكل ما تهيج عليا جنوني وتتحير شجوني ، نهز قراطس الكلام نبخر بيه المقام ... وحزمة أقلامي في ايديا، نطلع الجبل وغمامة مسكرة على عينيا ، نور مضحكو يهدي عليا الثنية ... نمشي أربعة أيام بلياليها، ونوصل لبابو نحبي على ركايبي،ويتحل الباب تقول باب العرش تحل قدامي ، نهتري بكلامي في وسط السقيفة العربي ، وعلى حيوطو نكتبلو طلاسم العشقة المغبونة ، وفوق السدة نشطح على نغمة هدبو إلي مهبلني ، وفي شبابك مقامو نعلق ضفايري وهبلتي وأحزاني.. قدام ضريحو نسيل دموماتي ونحل سواقي تنبع من عروق قلبي العليل، ونقلوا يا سيدي الراجل إلي سارقلي نوم العينين، جيتك من طرف الدنيا نلاجي ، أقضيلي شوري وسهلي اموري ...


هديتلك روحي زيد أسكن فيا ، هديتلك شبابي المذبال ، المزين بطرف الخلخال... باب السعد ما يتحل كان على ايديك ، والجنون إلي ساكنتني ما تحرك إلا بشارة منك ... زيد هبلني العقل مهوش لباسي ، والرزانة عمرها ما جات قياسي ... يا سيدي نورني راني حرت وضاع عليا الدليل ، توة أربعة سنين وانا نرشف من كاس الصبر، ونذوق في الويل، ناسي حايرين بيا من عزام لعزام ، ولا واحد فيهم فهم ألي صابني ، شربت الحشايش العلقم وتكشفت على كنوز السلاطين، وشي ما خلاني نرتاح ، يا سيدي نورني راك شيخ الصلاح... نعدي أربعة أيام اخرين نتبرك بسيدي الراجل ، أربعة ليالي كيف المنامة الخفيفة ، لا نعرف فيهم الحلمة مالحقيقة ، ولا نتبين فيهم ملامح وجهو من عجعاج البخور ... رابع يوم نفيق مالهبلة ، نربط شعري المهبهب ، نلم شوية الكلام نقصر بيه ثنية الرجوع ... نهرب من غزرة المرايا المسلطة عليا كيف القضاء ... ونهبط مالجبل العالي ، تقول لا صار ولا كان ، وفي واد النسوة نغسل غبار الثنية ، نهز عيني لمقام سيدنا الغالي، ونقول يا للا مقبولة الحجة....