Wala Baya - ولاء بية

إيجى نحكيلك شنية عمل فيا بعدك عليا ، إيجى نحكيلك من نهارت إلي إنت مشيت شنية صاير فيا ، قهوتي مراررت وضحكي صفارت، والخريف طيشلي أوراقي بنفخة ريح فالثنية... إيجى نحكيلك كيفاش الوقت ولا يدور عكس المنغالة، والسوايع تتعدى وانا سارحة فالسقوفات المنسية،

معادش فارق معايا لا ليل ولا نهار، لكلها أيامات تتعدى ونتي بعيد على عينيا، لا كلام يضحك ولا صوتك يضوي عليا ضلام السهرية ، برد في عز الصيفية، منين تحبني نجيب شميسة تضوي عليا ، تي حتى هي زادت على الهم إلي بيا...

تي إيجى نحكيلك، مزروب على السفر، تي زيد أقعد معايا شوية ، شعندك تخسر كان دقيقة ولا ثنين زيتهم معايا ، وسمعت إلي مخبيتو مبين جواجيا... مانيش بش نبكي ونلحلح بيك ونقلك تفكر هاك النهار وزيد أقعد وما تمشيش ، ما عادش هاك البنية إلي تكبش فيك وتهبط دموعها تسخف فيك ، ما تخافش حتى الدموع هربت والعين شاحت، ولواه لبكا ونتي مسافر، مش مليح فال خايب!

منحب شي نحب نحكيلك وأكهو ... نحبك تعرف شنية نحس كيف تغيب عليا، مانيش بش نقلك أرجع وما تخليهش بيا، منشه بش نذكرك باللي عشناه ونقلك راهو ياسر يعز عليا ! تعرفشي كفه ؟

أقعد وهاني بش نسكت ومانيش بش نحكي، ولواه لكلام ، تعرفني نكره السلام إلي بعدو منعرفش وقتاه نعاود نشوفك ، أقعد برك و هاني بش نسكت ومانيش بش نحكي، غير زيد معايا هل دقيقتين، نطير بهم وحشتي حتى بكلام العينين ...حتى بتبسيمة نسرقها من فوق شفايفك ، حتى بغزرتك الضايعة بن رموشك المذبالة...

من غير ما توعدني وتخليني مع كلامك نسرح ونحلم، ما تقوليش هاني راجعلك، وحتى كان مرجعتش ميساليش ، تعرفني ما يقلقنيش، ما عاد حاشتي بشي كان هل دقيقتين لخرنين معاك، برش عليا دقيقتين، خوذ بعدهم لعمر لكل وامشي ، انا حياتي توفى مع هل دقيقتين، واللي بش يجي بعدهم منحبش نخمم فيه، ما فماش بنادم ضامن عمرو، وكل واحد فينا غريب مش كان إنت غريب، كل واحد يدور وفوق كتفو

كفنو...إنت اللخرة غريب في بلاد غريبة ، شنية نقول انا غريبة في وسط أهلي وامليا، وكل نهار يتعدى نزيد نبعد وتزيد الدنيا تهرب بيا ...

قتلك إلي انا نحس روحي ضايعة بلا بيك؟ قتلك إلي ليامات لكل ولت تشابه لبعضها ونتي بعيد، قتلك إلي حتى نسمة الهوى تبدلت كيف إنت مشيت ، قتلك إلي حتى النوم هرب وانا مانيش بن ايديك،مانيش بش نشكيلك طول اليل وانا نخمم فيك، منحبش نزيد على ما بيك ، زيد أقعد هل دقيقتين وماتخافش مانيش بش نزيد نكثر عليك ، لحكاية لكل دقيقتين...