بيطلع عبالي أرجع أنا وياك ... غنات فيروز وطلع الصوت مبحوح من رديون مماتي الأنتيكة... نفضت غبار الدنيا على عينيا وغبرت مع الغناية، تورطت ، غرقت، فاض عليا الموج وغمتني كلمات الغناية... لقفت راسي بين إيديا ، خفت مالمواجع المتحيرة لا يثقل ويطيح من فوق كتافي...

دارت بيا الغناية دورتين في السماء، هزتني ونفضتني الحكايات ، عملت تدوليشة في تصاورك ، في ضحكتك، في حضنك، في دفاك، في غشك وجفاك ... كاينو البارح في الإيام وإنت في محبتي سارح،

كنا صغار ماناش فايقن بالدنيا تسرق في مناماتنا منامة منامة ... وتقتل في خفقة قلوبنا، تطفي في نارها وتذري في رمادها على قصر أحلامنا، وتهدم في إلي بنيناه درجة درجة ... بنفخة ريح في الثنية تدور الدنيا ،تولي عليا الغريب بعد ما كنت أقرب ليا من الروح المفارقة ! ومزلت حتى أنا كما الغناية "بيطلع عبالي أرجع أنا وياك" ونعلق ثرية محبتي في سماك ، برشة عليا كان تزهالي بيك الدنيا؟ ما عنديش الحق نتلحف خيالك حتى في الحلمة؟

نحلم، والحلمة منسية في ساعة اليقظة، نحلم نهرب بيك على العينين ونخبي هبلتي معك في تراكن السدة العالية ، ومن ليل لليل ، نطلعلك على سلوم قديم ، نلبسلك خلخال مذهب ، وحرام حرير منعم، وبقبقاب عتيل نتمخترلك وعليك نميل، تضحكلي وتقلي "رجعتلي؟" وأنا شكون عندي غيرك نرجعلو؟ شكون غيرك برمشو كاويني وأنا نكذب ونقول هذي مش نار تلسع، هذا دفاء ! وين تحبني نرجع ولا وين عندي نهرب وتصويرتك مسلطة عليا كيف القضاء؟! ساعة يبالني خيالك قريب ، أقرب من النفس في صدري، أقرب من الظلمة في الليل ، نمد طراف صوابعي نشد طرف خيالك، تطير سراب... نتذكر أخر مرة سافرت ومشي.. "تذكر أخر مرة؟" وانا شنية قعدت نتذكر كان أخر مرة ...آخر مرة ....

وأول مرة وبين المرة والمرة، وكيف كل مرة ...قلبي ينغز في قفصو، يفرفط يجري عليك ، كاينو كان ميت ذبلان و تنفخت فيه الروح ، تصويرتك مرة تولي قباض الأرواح وببرودة غزرتك تخنق إلي قعدلي ملدنيا وتطلعلي روحي ، وساعات تقلب ملايكة طايرة بلا جنحين وتهدي على حياتي نور وفرحة، راجل بو وجهين وساعات يولي عندك ألف وجه وجه ! "تذكر وقتا آخر كلمة قلتا وما عدت شفتك " وما عودتش لا حيتني لا قتلتني من وقتها،سكات معدوم ، بلاصة فارغة ورقة بيضاء توحش! لا تخربيشة تنغوش، ولا دقة قلب ترعش! حاجة كيما نقولو أخيب مالموت! أخيب من الظلمة الدحيسة! أخيب منك أنت كيف تتغشش!

"كيفك قال عم بيقولوا صار عندك ولاد؟" هذي تنجم تسميها آخر ترهويجة لواحد مفارق لحياة، سكرة الموت ، كيفاش تنجم الدنيا تبعدك هل البعد الكل، وتقلع من قلبك محبتي بعروق عروقها!