موحشة أخر ليلة ، مشات  معاها كل تبسيمة

تعدات ليلة حزينة ، بغصة ع القلب ثقيلة

..... حسيت كلام في سريرتو مينجمش يبوح بيه ، حسيت بدمعة مدفونة متخبية في عينيه

قلت تلقاه مهموم و فادد  و تعب لخدمة  رجع عليه

قعد ساكت و فادد الليل بطوله ، حسيت الهم  مالي عليه كل بحوره

قربتلو ، بوستو من راسو عنقتو ، ... قلي عزيزتي خليني الليلة معينيش ...

قعدت نحكي في سريرتي ، لواه  هكا يخليني بحيرتي ، مصاب يتكلم و ينورلى بصيرتي

قعدت قدامو و حطيت عينيه في عينيا و قربت منو و شديت يديه بين يديا  

قتلو هاني خليتك ترتاح شوية يزيني من سكاتك شوف الحيرة  في عينيا

احكيلي، طمني الله يخليك ... فضفض إشكيلي ، قلي شبيك  

...

لمحت الدمعة  في عينيه، حسيت برعشة ركبتو من يديه لسقيه

شفت عيونو حايرة والدنيا به دايرة

شدتني غصة ، قلت أشنية زعمة القصة

شرد المخ  يهز و يجيب ، تمنيت الظن فيه ما يخيب

زعمة شبيه ، زعمة فادد كي ماجبناش الصغار ... زعمة طلع تحليلي و طلعت مانظناش ... زعمة فد مني والقلب مهناش ؟؟

زعمة غايظو حالي والحل مافماش ؟؟

....

لا لا ، تي شبينى نخمم هكا

هو يحبني و مايسخاش فيا، هو بعمرو ما سكن الدمعة عينيا

أنا وياه حكاية طويلة ، رواية من روايات ألف ليلة و ليلة  

في المدرسة تلاقينا و ع الحب تربينا و في بعضنا حلينا عينينا  و بأحلامنا كبرنا و ربينا

...

فقت من خيالاتي ع صوتو، شردت عيوني في خوفو

...

"

والله لا دريت كيفاه  و لا علاه ... بعد الخدمة فضفضنا شوية و خرجنا مع الأصحاب  في العشوية  و م التعب و الستراس  قلنا خليها سهرية، و ختمناها كي سكرنا شوية ... بعد ما فقت

بشي كان كيف قمت الصباح لقيت روحي في الفرش أنا و هي ...."  .

حقيقة صدمتني حسيت الدنيا هزتني و نفضتني ... بكتني كوتنى قهرتني و بقية حكايتو ما سمعتني  

...

أش  صارلك باش سمعت  أش شفت و خلاك طمعت

أنا فرحتك و رضاك كانو كل حلمي ... غير حبك و عشقك ماغلط في شي حد علمي

بكيت ...

بكيت بالصوت العالي ع غدرك لى حكيتلى عليه، بكيت بالغصة ع قلب تشويت فيه  

حسيت روحي في صحراء مطيشة بلا ماء حسيت روحي في زنزانة مسكرة بلا هواء

مازلت مانيش فاهمة مانيش مصدقة إلي صار ، مانيش عارفة روحي في يقظة في حلمة، في ليل وإلا نهار  

...

بكيت بغصة بحرقة، اليوم وجودو  معايا حسيته خنقة

تمنيتها مشكلة كالعادة  و تتعدى، تمنيته كابوس  يوفى كي نعانقو و في قلبو نتخبى

...

تمنيت نسألك، نعاركك، نصيح ، نوجعك ... ما نجمتش ماسخيتيش فيك

عفست ع قلبي و ماقدرتش نعفس عليك

ناري كويت بيها روحي و ماقدرتش بيها نكويك

عمات عيوني بكاء و ماسخيتش نبكيك

كرهتك و كرهت القلب اللي حبك

كرهتك و كرهت الكلمة اللي بكشت

كرهتك و كرهت الروح اللي عشقت

كرهتك و كرهت الزمان الخوان

كرهتك و كرهت اللي صار واللي كان

كرهتك و كرهت القلب اللي تصان و خان

وقفت و مسحت دموعي على خدي  ... تعداو أحلى اياماتنا قدام عينيا ملي أنا  صبية معاه للي روحتلوا عروسة و جاء نهار لي حكالي فيه على غدرو في وذنيا

حطيت راسي على اكتافو، رسمت بوسة ع شفايفو  و قتلو ...

مسامحتك يا نور عينيا  و وعدي ليك بعمرها يدين ما تشد يديا و تبقى اياماتنا عايشة فيا و ليا

قلتها و خرجت من حياتو، ماعادش أنا  فرحة اياماتو، ماعادش أنا  زهوة حكاياتو، ماعادش أنا وردة حلماتو، ماعادش أنا أخر مناماتو ...

تحرقت ... توجعت

ما عاد عيني في شي الروح فدت    

ما عاد نحس شي القلب برد

ما عاد عيني في الحب القلب مات

ما عاد نحب نتعلق الروح تشوات

ما عاد نحب شيء حتى شيء

...

مات قلبي و تشوى كيف برشا قلوب واللي يسألني نقولو مكتوب ... مكتوب