-السّلام عليكم خويا أحنا شريكة متاع إ...

-سامحني ما عنديش فلوس

-لا لا في الواقع ماكش بش تستحق فلوس ،

-ما عنديش وقت عيشك ،

-خلّيني نشرحلك ع الأقل فاش متخصصة هالشريكة  ،

-تفضّل و فيسع عيشك ،

باهي سيدي أحنا شريكتنا تتاجر بدين الاسلام ، تستورد كل ما هو وهابية ، عادات و تقاليد غريبة ، نتبناو كل ما هو عمليات تفجيرية ، ارهاب ... بش ندبرو أكثر عدد مالناس يدخلوا للإسلام،  انت كي تدخل معانا عندك الكونت متاعك فيه عشرة حسنات ديجا ، و انت لازم تدبّر عشرة أخرين متاع الأنسكريبسيون ، و تدخّل  معاك زوز بش يزيدو حسناتك ، و هاك الزوز يدخّلوا  زوز ، و يتزادوا حسنات ليك و ليهم في نفس الوقت ، تتكون كيف الشجرة ، و هكاكة تولّي عندك برشا حسنات ، كل ما نزيد تلم حسنات ، بطبيعتك تزيد في الڨراد ، تولّي سلفي ، بعد سلفي ، و بعد تكفيري ، سلفي جهادي و هكاكة بالشوية تولّي شيخ ، و الشركة كل ڨراد تعطيك فيه امتيازات و هدايا ، شوية جواري ، شوية حوريات تطيّحلك في صوم السيئات ، تعملك تخفيضات زادة في المعاصي و المآثم ، تنجّم زادة تعملّك صوم في القصور و الدّيار في الجنّة ، خمّم في غدوة ، خمّم في البعيد موش في توّة ، بطول المدّة شوف قدّاه بش تربح و يولّي عندك برشا حسنات ،  نزيدك زيادة الحسنات هذم  تنجّم تخلّيهم في الكونت و الا تحوّلهم . فمّا زادة حاجات تنجّم تضاعف بيهم حسناتك في مدة أقصر ، تحجّب برشا نساء و تحصرهم في الدّار، تلبّسهم نقاب،  فمّا التفجيرات ،  اعدام الكفّار ، الجهاد ..

ما وفاتش هنا ، لبستك من عنّا زادة ، على كل زوز عباد تجيبهم تاخذ قميص ، عرقيّة ، و زوز نقابات واحد كبير و واحد للبنّوتة تمشي بيه للروضة ، و ماكلتكم ، برشا برشا حاجات أخرين تو تزيد تعرفهم معانا .

فمّا أخ معانا ولّى يربح قرابة ستة و ثلاثين مليون حسنة في الشهر ، حياتو تبدلت هو و برشا ناس ،

هاو موقعنا زيد شوف و خوذ فكرة ، شركة عالمية مصدق عليها ، تحتل المرتبة الثالثة عالميّا ، ماكش بش تندم دبّر عشرة حسنات و ايجا معانا ، هاو نومرويا و نستنّى تكلّمني .

-جازاك الله خيرا خويا ، نمشي فيسع ندبّر و نكلمك تقيّدني معاكم .