Notice: Undefined variable: relatedArticlesCount in /home1/datalyz/public_html/tounsia/plugins/content/tags.php on line 149
المـرا التّونسيّة
Afek Ben Chahed - آفاق بالشّاهدالمـرا التّونسيّة ...
المـرا التّونسيّة ... هيّ السفساري ...
هي العولة و الكسكسي الدّياري ...
هي بيت المونة ...
وريحة القهوة العربي السخونة ...
هي الرّحى .. و المهراس ...
هي الغنّاي و الطّنجرة النّحاس ...
هي المنسج .. السّداية و المديانة ...
هي الأحرام ... الملية و الريحانة ...
هي خبز الطّابونة و الملاوي ...
هي ريحة الوشق و الجّاوي ...
هي الفيناس و الّدلال ...
هي الخْلال العربي و الخلخال ...
هي الحرقوس و الحنّة ...
هي الي تحت أقدامها الجنّة ...
هي الّي صنعت الفخّار ...
و عمرت الديار ...
هي الفكرة و الدبارة ...
و الغزرة السحّارة ...
هي ريحة الزهر و العطرشية ...
هي الّي طيبت الحلو و الملوخيّة ...
صنعت المرڨوم و الزربيّة ...
هي البيّة ... هي المڨديّة ...
الّي قايمة بيك و بيـّا ...
نحُطها في عينيّا ...
مهما نقول فيها باقي شويّة ...
هي المرا التّونسيّة ...
وكيما قالوا ناس بكري :
العقل فات الزّين ...
و يا سعد الي حازهم الاثنين ...
بقلم
آفاق بالشاهد
Website Design Brisbane
Tags: