Notice: Undefined variable: relatedArticlesCount in /home1/datalyz/public_html/tounsia/plugins/content/tags.php on line 149
الحوار الوطني
Afek Ben Chahed - آفاق بالشّاهد- وليدي ع السلامة ، هاني جيت نطل عليك ،
لاباس ؟ تسمع فيّا ؟ سامحني بطيت عليك ،
- أمّي عالسلامة ،
- يا روح الميمة ، يا نور عينين أمّك ،
هيّا فرّغلي ڨلبك ، شعامل ؟ احكيلي على همّك ،
الناس الكل توحشوك ، بالأخص وخيّك ،
و يسلموا عليك ،غدوة يجي يطل عليك بيّك ،
ما نساك حد ،
أمّا وليدي فراڨك الڨلب هد ، حيلي تهد ،
خلّيت علينا بلاصة كبيرة ،
الدّار ولاّت ساكتة ، كل واحد في شيرة ،
- يزّي بجاه ربّي من تحيير المواجع ،
راني مخنوڨ، و الهم مضاجع ،
أيمّا راو ڨبري ضياڨ بيّا ، دمّي برد عليّا ،
مانيش منجّم نرتاح ،
ظلام طويل ، لتوّة ما طلع عليّا الصباح ،
تاعب أ يمّة ، تاعب و في ڨلبي غمّة ،
التراب عليّا ثڨلْ ، يوم بعد يوم يزيد في ڨلبي الغُلْ ،
غصرة يمّة غصرة ، و نا ماك تعرفني ما نحبّش الحصرة ،
شدّوهوش ؟ لڨاوهوش ؟
ماك ڨتلي يلوجوا ، والاّ كذبوا ما لوجوش ؟
- سمعنا برشا كلام و ما فهمنا شيء ، الله أعلم شنوة لي مخُبّي ،
سامح وليدي بش ترتاح ، حقّك عند ربّي ،
- نسامح ؟ شكون نسامح ؟ الّي فرّڨني عليك و على حبيبتي ؟
الّي شرب من دمّي و فرح في مصيبتي ؟
نسامح الّي ڨتل الأولاد و ضيّع البلاد ؟
و خسر علينا كان نهارين حداد ،
نسامح ؟ نسامح الّي حرمني من صدرك ؟
نسامح الّي غدرني و كدرك ؟
و تڨولّي حد ما نساك ؟ هاو الكل نساوْ ،
حتّى الّي وعدوني بالثأر ما وفاوْ ،
غمّوني بالتراب ، عفسوا عليّا وتعدّاوْ ،
مشاو ، ما تلفتوش وراهم ، بلا رجعة ، مشاوْ ،
يا و الله عار ، خسارة الوصيّة المكتوبة الدّم ،
الوصيّة المنسية ، المدفونة تحت الردم ،
آه يا يمّة موجوع ،
مشيت في ثنيّة ما فيهاش رجوع ،
ڨلهم ما ينسونيش في هالسّرداب ، ڨلهم راو حي ما يوالفوش بالغياب ،
- يا كبدي ، بني آدم جاحد و نسّاي ، الشمس زارڨة كاينو ما صار شيء،
الظلام معتّم كان في ڨلبي و عينياّ الّي مشى منهم الضّي ،
مشات معاك الضّحكة و الفرحة ، مشى معاك الزّهو ، مشاو الألوان ،
نعدّي النهار نلاجي ، موش رافعني حتّى مكان ،
يا بابا راني عليك محروڨة و مكويّة ،
أمّا شمعتك تڨعد ديما مضويّة ،
أرڨد متهنّي حق المظلوم عمرو ما ضاع ،
و ڨلبك يجيه نهار و يبرد مهما لاع .
- أ يُمّة زيد شويّ ما تمشيش ،
زيد ونّسني و هوّن عليّا ما تخلّينيش ،
- ما اصعبو الفراڨ ، و بالأخص فراڨ الضنا يا وليدي ،
نفرش حذاك و نڨعد طول عمري كان جا ليدي .
- يمّة ، مشيت ؟ أيمّة ؟
بقلم
آفاق بالشاهد
Website Design Brisbane
Tags: