هاي تعادات أيام وسنين..وصبت المطر وإنت ما جيتش..نعرف إلي إنت ما كنتش تحبها برشا أما ملي حبيتني وتلاقينا ولات تعجبك الحكاية تتفكر وقت تلاقينا  في عز الشتاء والدنيا برد والمطر تصب  كنا ندورو في الشارع وإنت تقلي يا مهبولة شوف ما فما حد  غيري أنا وإنت نضحك ونقلك هاكم خاطر ماهوماش عشاق كيفنا تقرصني من خدي و تضحك و تلف يدك على رقبتي و نكملو ندورو والمطر باقي تصب..المطر باقي تصب في قلبي في غيابك

نتفكر آخر نهار شفتك فيه كانت المطر تصب بالقوي وكالعادة مافما في الشارع كان أنا وإنت..نحيت الجاكيت متاعك وغطيتني بيها رغم إلي تعرفني نموت على المطر ونحب نتبل بماها..كاينك كنت تودع فيا بآخر مرة ترد فيها بالك عليا وتتلاها بيا..حتى عينيك كانت تودع فيا كاينك حبيت تقلي إملا عينيك مني راك ماعادش باش تراني..نظرة حزييينة مش كالعادة..

حتى أنا ما كنتش كالعادة ولا احساسي كان هو نفسو..كل شيء نهارتها كان مختلف صدقني كنا نودعو في بعضنا و محناش فايقين..

نهارتها وعلى غير العادة كنت مانيش فرحانة كيف كل مرة نقابلك فيها كان فما إحساس غريب ما عرفت نفسرو كان مبعد ما ..تفارقنا

معاك كنت ديما مطمنة حتى لو كانت عندي مشاكل الدنيا الكل أما نهارتها كنت خايفة يمكن خاطر ماعادش باش نشوفك

يارييييت ترجع الأيام ماكنتش نخليك تمشي والله لو تطبق السما على الأرض أما يمكن خاطرو مكتوب ويقولو إلي المكتوب ما يغلبو حد أما أنا كنت ديما نقلهم حتى لو المكتوب يبعدني عليه نغلبو ومستحيل نخليه..غلبني المكتوب وغلبتني الدنيا وغلبتني روحي

..توحشتك برشااااا أكيد حسيت..عفوا نسيت إني ما عادش نعنيلك وقلبك ما عادش يحس بيا

كالعادة ديما نكتبلك وإنت ما تقراش..