خل يقولو رجعية سلفية ولا حتى إرهابية

حب الوطن تغرس فيا ومستحيل يتنحى من جواجيا...

يا حسرة على أيام التشكيلية والموسيقية

قالتلنا انستي ارسمو علم تونس...

معرفتش نرسم..!!

معرفتش نرسم علم القوة لي بيها انجم نكمل الثنيا

معرفتش نرسم علم النسمة لي طايرة بيا

معرفتش نرسم علم الإنسانية والوطنية

رسمت مربع في  عوذ النجمة  قلت النجمة صغيرة متنجمش توسعنا الكل

رسمت مثلث في عوذ الهلال قلت لهلال طويل باش يفرقننا على ثنين ...المثلث ملموم يلمنا الكل هكا انا قلت

لونت أخضر على أحمر ...اصفر على ابيض

قلت لا منلونشي علم بلادي بل أحمر تونس مهيش ملونة بدم

تونس خضرة  نلونها بل أخضر

قلت لا منلونشي علم بلادي بل ابيض:ماضي وتاريخ تونس موش فارغ نلون بل اصفر الأصفر يشع يدل على إشعاع تونس

"خلوها ترسم وتلون كيما تحب ممليها كان بنية طفولية "هكا هما قالو

"لا والف لا مترسمشي ومتلونشي علم بلادك بل غالط توا تكبر وتكبر معاك تصويرة الوطن بل غالط"هكا قالت انستي لي بكلها وطنية وإنسانية

"يا بنتي الهلال رمز الإسلام والإسلام يوسعنا الكل

يا بنتي الأحمر رمز دم الشهداء ورمز المحبة لي ساكنة فينا الكل

يا بنتي الأبيض رمز الأمن والأمان لي باش يحمينا الكل "

ومن غادي تعمل نرسم علم بلادي بصحيح وخرجت بتصويرة باهية موش دونية

ومن حصة التشكيلية تعديت  ل حصة الموسيقية

وتعملت نغني حماة الحمى بكل قوة ومصداقية

وحفظت الاناشيد  الوطنية الكل وقلت هيا  الي باش نطير بيها الفوق مغير ميسمع حد.

أما تعدات تعدات أيام التشكيلية والموسيقية وجات أيام الثورة والمصداقية هكا هما قالو "غنو اكتبو عبرو ارسمو وبصوت مسموع سمعو صوتكم لي بكلو كلمات حقيقية

وبتفكير  البنية الطفولية خذيت ستيلو وكتبت

كتبت اول مرة فحياتي  على تونس وعطبورية طلعت وبصوت مسموع سمعت الدار الكل

أما. ...بعد سنين الأحمر رجع معاش لون المحبة ودم الشهداء رجع لون الفساد..والأبيض رجع معاش لون الأمن والأمان رجع لون الفراغ ..

ومعرفتش شنعمل....!!!

معرفتش شنعمل للبلاد لي لتوا بيها منجمتش نكمل الثنية

ومعرفتش شنكتب للبلاد لي لتوا تصويرة علمها محفورة فجواجيا...