وشكون فينا معندوش في قلبو بيت مسكرة بقفل حديد .....

منيجم يدخلها ويشوفها لا عدو لا حبيب...

بيت نتفكروها وقت تقسى علينا الدنيا ...ندخلو نمسحو عليها شويا غبار...ويرجع كلشي فيها يبان ..مش،يبان برك يرجع كلشي فيها يبرق برقان...

بيت فيها دموعنا المكبوتة والي منجمناش نخرجوهم خاتر جت في وقت مش وقتها دموع ملوحة فم جرت كلمة سمعناها من عبد عزيز علينا ومتوقعنهاش منو ...

بيت فيها الغم والحزن الي خبيناه عالعباد ومحبيناش نوروه باش نبانو قويين واحنا اضعف وحدين

الهم والحزن الي عانيناه جرت عباد مشت وخلتنا كنا حاسبينها اغلى حاجة فالدنيت اما مع الأيام ظهرت كيفها كيف غيرها..

بيت فيها اصعب ايامات تعدينا بيهم ايام كنا نعانوا ونقاسوا فيها وحدنا .. كنا نخسايلو الي الدنيا مفيهاش امل والي قاعدين نمروا بيه الكل مستحيل يتعدا ...

و هاو اليوم واقفين نمسحوا فالغبار على هاك الأيام ونتبسموا في تبسيمة فرج ...

بيت فيها خزانة معبية بكلمة لا تقالت اللف مرة في وجوهنا واحنا منجمنا نعملوا شي كان نقبلوها...

بيت قريب تفيض بخيبات الأمل الي تعدينا بيهم ومع كل خيبة  نقولوا هاذي اقوة خيبة انجمو  نمروا  بيها في  حياتنا اما تجي الي اقوى منها كالموجة تغرقنا وتخلينا نحاولو نخرجو منها ...وياويلو الي ميعرش يعوم...

بيت فيها مشاكل قد شعر الرأس تعدينا بيهم وحدنا...

بيت فيها مواقف صارولنا وحد ما كان معانا ...كنا وحدنا نعومو باش،منغرقوش كنا نطلبوا كان في ربي سبحانو باش يخرجنا منها سالمين ...

بيت فيها احاسيسنا الكل ...: الضعف ..الحزن...القهر...الغم..والهم ...

منحبوش،يعرف بيها حد ولا يكتشفها مخلوق...سر بينا وبين رواحنا...

بيت نطلوا عليها ساعة على ساعة نمسحوا  عليها شويا غبار ونرجعو نسكروها بقفل حديد ونحمدوا ربي على كلشي تعدا ومشا...

#تخربيشاتي