يزي اركح ، احشم ، تحسابشي روحك عازب ، ماتلبسش هكا ، أعمل عقل ،انتي طفلة و هو طفل ،هه ناقصة عقل ودين ، الحياة بالمرا كي بيها كي بلاش ،أنا في عمرك معرسة ، فماشي شكون يحب يتعرف عليك ، يا ناري مش تقعدلي بايرة ..

مجتمع تافه .. كلكم ما تمثلونيش ..

أنا بنت 18 سنة , أنا الي ماريت شيء مالدنيا ، أنا الي مازلت كي حليت عنيا و مازلت كي بديت فأول ثنيتي ،

أنا الي اتحبو  تردموني بالحياة و حياتي لتو ما بدات .. نحب نقلكم أنا طفلة مش كي أي طفلة ،

أنا طفلة غير البنات ، نحب نكون أنا منحبش نكون غير أنا ، نحب نعيش حياة حلوة ماليتها الفرحة ، حياة بسيطة ساهلة مش معقدة ، حياة طفلة مجنونة ، أفكارها صغرونة ، أحلامي ساهلة ماهيش كرهبة وراجل عندو فلوس ، أحلامي نقرى و نوصل ،ونكون روحي بروحي ، أحلامي دار في غابة بعيدة على نفاق لعباد ، أحلامي سفر ووقت كلو جنن ، نحب نعيش ، ما نحبش نكون ضحية مجتمع متخلف فيه المرا ما تسواش ،

أنا الطفلة ، أنا الأم ، أنا الصاحبة ، أنا الجنة ، أنا النار ، أنا الدنيا ، أنا الي بيا العيشة تحلى ، محلاني أنا ، عيش لروحك ، جنح ، طير ،أقرى ، تعلم ، سافر ، ألعب ، أضحك و ماتخلي شيء في بالك مش نعيشوا مرة مش مرتين و نعود نقلكم  ماتمثلونيش  ..