في لحظة تتولد ناس وتمشي ناس، وناس تشد بلايص ناس..

في لحظة الي كان حزين يضحك والي كان يضحك يرجع حزين رزين..

في لحظة يكبروا في وذن الصغير والله اكبر، ويتقيد مسلم حتى لين يكبر..

وخوه، غسلوه وعمدوه والثالوث المقدس علموه.. واختهم لخرى، لبسوها الطويل وعلى الغريب خبوها وقالولها في الاثناش نحتفلوا بيك وتصير بالغة وعلى الغريب رد بالك تمد يدك مسالمة، ولازم تعرس بواحد من ديننا بش تكبر ملتنا، ونجتمعوا بعد ما كتب علينا التيه من ربنا..

ومن غادي بو وام لقنوا ولدهم عبادة العلم وقالوا يا ولدي لا فمة لا رب ولا رسل، فما كان وقائع وارقام..

في لحظة بركة يحدولك اسمك ولقبك ودينك وكل ما في بالك متاعك،

في لحظة تصيح وتفهم اللحظة، وكي تشم رواريك الهواء تنسى النكبة وتجيك الدنيا ضاحكة..

في لحظة تتغر وتقول الي الدنيا هي الكل في الكل..

وفي لحظة، تتغدر وتفهم الي الدنيا ماهي الي طرف من الكل، طرف معاهم مش معاك، طرف فمة شكون سماه قدر وفمة شكون عيطلوا الاه وفمة شكون حبوا صدفة ومنجمش يتصوروا حاجة اخرى، وفمة الي حبوا بوذا ونحتوا في احلى صورة، اما المفيد كلهم عليك..

وفي لحظة تنزل الدمعة والحفرة تتحفر وحتى من القبر يتبنى، وفمة الي قبروا قد طولوا وفمة الي يتحرق وفي دبوزة يتحط..

في لحظة مرأة تترمل وصغير يتيتم وميمة كبدتها تتشوا،

في لحظة راجل يضيع وصغيرة تتباع وبو في كبيدة يتشوى..

في لحظة تتخرب بيوت وتتكتب نهايات وتوفى حكايات،

وفي لحظة تجي حكايات جديدة ومعاها امل جديد ومشروع وجيعة جديدة..

سيرين شيخ روحه