الحكاية بدات بقهوة؛ غزرلها وقالها محلى كالضحكة.. ولاو صحاب وكبرة العشرة.. لين جاء النهار إلي كبرت فيه الهدرة..

حاست بيه وبمشاكلو من غزرة.. وقررت بش تداويها من الغدرة.. عطاتو وقتها ومخها وقلبها على طبق من فضة.. وقالت منو هو نموت ونحيا.. كانلها عنترة وقت الغصرة .. وبيبرس وقت

المحنة.. وشكسبير وقت الفرحة..

زادت تهنات ورقدت في الثنية.. وبدات تعبي في حياتها معاه ورقة ورقة.. وكتابها قالت ميكمل كان معاه..

حبتوا أكثر من حب الرحال للقمرة، وأكثر من حب العرجون للدقلة.. قالت هو بابا وخويا والراجل الي نتمنى.. وفي الليل كي نرقد كان ما ريحتو حذايا بش نتهنى..

خوفها عليه كان كي الخوف الأم على صغيرها.. وتفكيرها فيه كان في كل لحظة..

الدنيا بلا بيه معاتش تحلالها، أصلا معاتش تنجم تخمم في الفكرة..

كانتلو الأم كي يتعب تبنن بيه، والبنية كي يتغشش ترضيه، و المرا الي حتى في غياب تخمم فيه..

وعدها بالفرحة ويديه بش تكون بين ظفيرتها البيضاء، ووعدها يحارب العالم بش تبقى ديما حذاه..

قالها راني شرقي أما نحب المرا القوية، وراني عربي أما نمن بالقضية..

قالها راني تونسي أما نحبك تكون ليا، وراني نرفوزي أما معاك نشد الثنية..

صدقت وفرحت البنية.. قالت هذا هو إلي ربي بعثوا ليا.. معاه نجم نعيش هنية وبين يديه نرقد متهنية..

طلاع كلامو الكل صحيح.. الراجل صادق ومعاه غرقت البنية..

كان شرقي كيما قال وقت يعيط يحب الدنيا تركعلوا.. صحيح يحبها قوية أما كي يبداو مش فرد ثنية..

كان عربي زادة كيف يتكلم في حضوروا لازم تسكت ليقولوا عليها قبيحة وتحب تواري روحها.. صحيح يؤمن بيها أما يحبها قضية سرية.. قدام الناس هي تابعة الملكية..

زادة طلع تونسي مكذبش عليها وحبها تكون ليه ويحارب الناس عليها.. حاجة وحدها نسى يحاربها روحو والنرجسية..

ومش لازم نحكوا عالنرفوزية خاطر الحالة عادية.. الحالة ولات يومية.. وفي أقل مشكل الحالة توالي إضافية..

والبنية باقي تقول مع بعضنا نلقوا الثنية والحل في ايدينا احنا.، مدام نحبوا بعضنا الباقي حكاية عادية..

ونسات إلي الحب لعبة تخرجها منها رابح ولا خاسر .. وحسبها مليح وقالها هوني توفى القضية..

المفيد الطفلة عايشة توا متهنية.. مش خاطر بعدت عليه اما خاطر قلبها تعبى بالأذية، لين الاحساس مات كل بالشوية..

الطفلة عايشة وبين أصحابها لاهية.. مش منسينها فيه، أما تلهت في همها هي..

الطفلة حية ودنيتها ماشية.. ماهاش متبعتها أما بدنها بالعمر فكرها..

الطفلة تحب.. خاطر ببرشا حاجات فيقها.. في الدنيا هي متصدق حد خاطر حبيب البارح غريب اليوم، وفرحة البارح دمعة اليوم..

الطفلة ماتت،وبدنها بينا مازال عايش.. إدعوولها بالرحمة ومتبخلوش عليها بفاتحة..

الطفلة الله يرحمها..

بقلم سيرين شيخ روحه