خسارة اليوم ولا فمة احنا وهوما.. كنت نتمن الي فمة كان احنا، طلعت غالطة وضحكوا علينا ويمكن انا زادة ضحكت عليا..

احنا الزوالة الي معنا حتى ثنية وهوما الساسة الي مشوا في كل ثنية..

احنا الي شربت الماء نتعبوا عليها والارهاب في الجبل عادي يحرمنا منها، وهوما الي الماء يتفرق بين ايديهم في مجلس نوابنا، وبعد تتلوح الدبابيز الي معبية بمياه معدنيه..

احنا الي من سكرات الموت نسكروا اليوم بطولوا، وهوما من شيخة البذخ يسكروا الليل بكلوا..

احنا الي صغارنا دفنوا مغير قبورة، دفنوهم هوما في منطقة حتى في الخريطة مهمشة ومن الحياة مهجورة.. وهوما صغارهم من قوة جاههم فيبالهم الموت حق كان علينا، والسلطة حكر ليهم وفي الدنيا هذي ما فمة كان هوما..

احنا اكا الي وراء البلايك، الي تتفكرونا كان وقت السب والشتيمة، وقتلي تولي العيشة هوني تقول مش تابعة الدولة التونسية.. وهوما الي قدام البلايك، ميعرفوا من الفقر كان تبديلة باكو الدخان، كي تطيح بيه الدنيا يولي يشري في باكو بالفين..

احنا الناس المحقورة الي بالنسبة ليهم لازمها تعيش طول عمرها مقهورة..

احنا اكا الجندي الي يعس عليهم وقت هوما في القصورات مدغورة، واحنا اكا الامني الي في الحدود مادد رقبة للسكينة، وهوما من جلسة عامة لجلسة عامة ناسينا..

احنا الريف الي من قمح وفلاحة تاكلوا في الرغيف.. واحنا الغابات الي منها تروى الواحات..

احنا الرجال الي بنينا رواحنا ومستانينكمش انتوما.. واحنا النساء الي نعيشوا ولا نعيشوا،

احنا البرفان متاعنا ريحة الطابونة، ومنجنوش نلبوا طالونات خاطر لتوا معملونا كياسات..

احنا وانتوما.. قلتوا الي انتوما منا احنا وشرعيتكم بينا احنا.. ياخي طلعت الحكاية مغلوطة واحنا مجرد وسيلة..

زعمة يجي نهار ونولوا كلنا احنا؟

بقلم سيرين شيخ روحه