Notice: Undefined variable: relatedArticlesCount in /home1/datalyz/public_html/tounsia/plugins/content/tags.php on line 149
علاه ديما كتيبتك حزينة
Asma Ben Farhat - أسماء بن فرحاتيقولولي علاه ديما كتيبتك حزينة
نجاوبكم..
الفرحة يا خواتي ما تتكتبش و حتى كي تتكتب ما تكملش..
تعرفوها اكا القولة "خيرنا ماشي لغيرنا"
انا تواتيني و تحكيني..
كفاه نكتب فرحة و انا ما عشتهاش؟؟ و حتى كان ذقتها ما تبننتهاش
نكتب على فرحة تتعدى في لحظة مزروبة لدرجة ما نحسهاش؟؟
اللي كيفي الفرحة ما تواتيهاش
كانش تنحي قلبها تعفسو و في الناس ما يهمهاش
تولي باردة، ما تخممش، ما تتنرفزش، بغيرها ما تتعلقش و ما علبالهاش
اما خسارة، البيعة هاذي الكل ما تنجمهاش
تعرفوش علاش؟؟
على خاطر اللي كيفي تعود يعطي فرحتو لغيرو و المقابل ما يستناش
يعطي اللي عندو و عادي يقعد بلاش
ما تقولوليش ما يجيش هكا كيفاش!!
خاطر اللي كيفي اللي عندهم مش ليهم و حتى كان يعطوا الغالي بالنسبالهم بلاش قيمة و ما يسواش
الفرحة يا خواتي للي كيفي ما تجيناش
و ساعات تواتي، تزورنا تهزنا للعين اما عطشنا ما يترواش
يمشيش فيبالكم غيرنا اللي متمتع بخيرنا يشوفلنا بيه و لا يقول كليمة باهية فينا !!
لااا.. خيرنا لا يتحس و لا يتشاف
اذاك علاه فرحتنا محدودة و ساعات معدومة ما تتراش..
فهمتو توا علاش الفرحة ما نكتبهاش؟
أسماء بن فرحات
Website Design Brisbane
Tags: