اربعة حيوط و سقفْ،

نعيش فيك ، نتنفسك و الوقت بينا ياقفْ،

شقولك تعطيني قلبك نحبو لين نموت سلفْ،

و تعيش معايا نشبعك حب و ناكلك بالهفّْ..

بحضنك تدفينِي، بعينيك تعرينِي، و في ظلمة الليل نترمى عندك تخبينِي..

شقولك تجينِي.. نحطك في قلبي و نسكر عليك البابْ، لا يدوروا بيك أغرابْ و لا صحاب قرابْ..

نخبيك و نقلهم ضيعتْ المفتاحْ، هكاك نتهنى عليك ما يقربك حد و نجم نرقد مطمانة و بالي مرتاحْ..

شقولك في مدينة ما فيها كان احنا الزوزْ، نعيشو وحدنا لين نظفر انا الشيب و تولي انت عزوزْ..

اما تهنّى.. نقعد نحبك و انت على عكاز.. حتى كان شعرك ابيض و فمك ما فيه حتى سنّة، باش نقعد نحبك و رضاك نتمنّى..

شقولك نعيشوا تحت سقف واحد، تحكيلي حكايات و تعذرني كان في وسط الكلام خطفت بوسَة، تعرفني مهبولة بيك و عليك ملهوفَة..

شقولك نعطيك عمري و حياتي و زيدهم قلبي، حلال عليكْ، و مش خسارة فيكْ تاخذهم هديَّة.. اما على شرط ايديك ما تبعدش على ايديَّا..

شقولك في بيت بيضة كيف قلبك مليانة صغارْ، و انت تلعب في وسطهم و تنڤز ليل مع نهارْ..

شقولك في طفلة شعرها اكحل، عينيها كيف عينيك و على خدها غمازَة، تتكعبر قدامك، تتعنكش فيك و تضحكلك بعزازَة..

شقولك نزيدوا معاها زوز اخرينْ، ياخذوا منك ضحكتك و سحرك و القلب الحنينْ..

شقولك كان توافق و تكون انت الكل في الكلّْ، تعطيني قلبك نحبو و تعدي معايا بقية العمرْ..