حليت عيني على غفلة منك لقيتك في وسط البوسة غارق، و لشفايفي مش حابب تفارق..

في تعنيقتك ليا ملهوف و ميت جوع، و بالقوي تدسني لين تطرشق الضلوع..

و بعد تحبني نصدق لي انت فرحان بعيد عليا و مش موجوع؟ تحبني نصدق لي مش انت لي شكيتلي و بكيتلي بصوت ضايع مش مسموع؟

تره جرب نافقني و قلي ما حبيتنيش

قلي لي انت معايا ما تمنيتش تعيش

نافقني و قلي لي وقت عنقتك موجوع ما حسيتكش و عندي ما خبيتكش..

جرب نافقني و قول لي بيناتنا كذب و الكلام لي حكيناه و الشي لي حسيناه كلو كذب..

نافقني و قلي مش انت لي مسحت الدموع اللي على خديا، مش انت سبب التحويق اللي داير بعينيا..

قلي لي مش انت خليتني ضايعة بين الناس في وسط الطريق، مش انت لي كملت بلاش بيا و خليتني وحدي نعوم فالغريق..

قلي مش انت لي هزيتني للكنيسة، ما صورتنيش مع العذراء و عنقتني قدام صنبة عيسى ..

نافقني و قول مش انت لي عطيتني هدية الغالي و لا نسيت المريول؟؟ نسيت كي ريتني بيه وليت تتبسم و تضحك وحدك تقول مهبول!!

اكذب و قول لي انا ما لوجتش لوجيعتك ليا اعذار، و لي ما عشقتكش قدام الناس الكل جهار..

نافقني و قلي مش انت لي رجعتني نكتب ليل و نهار، مش انت لي خليتني نعشق الاوراق و الحبار و على قلبي نفضت الغبار

ايجا اكذب قدامي و نافقني، ايجا صحيني و من غفلتي فيقني