Zaineb S. - زينب س

ايامات و احنا عالحالة هذيكا ،نحكيو ليل و نهار اي فضوة يلقاها يكلمني ونسني و ملالي الفراغ اللي عايشتو و نسيت حكاية الخدمة جملة و وليت مستمتعة بالبطالة هههه نسهر ليلة كاملة معاه و فالنهار نصبح راقدة و هو مسكين يفيق بكري يمشي يخدم و بعد يقولي راسي رزين نهز فيه بالسيف ،

ستانست بيه ،تعلقت بيه نبدا نستنى في تلفونو بدقيقة و الدرج ،عرفت عليه برشا حاجات و حكيتلو برشا حاجات على روحي و اخيرا تفاهمنا بش نتقابلو ،حكيت لاختي قالتلي برا و وصاتني بش نرد بالي على روحي ،فرحت قمت حضرت روحي ،ماكيجت لبست و مشيت خرجنا عدينا نهار كامل مع بعضنا ،عملنا برشا جو ،تعاودت لحكايات و من مقابلة ولات مقابلات لقيت روحي مرتاحة معاه كايني نعرفو عندي سنين ،نحكي على راحتي نضحك ناكل كيما نحب لا تشقنيس ولا والو و هو يغزر بكل اعجاب ،ماكانش بيناتنا ديكلارسيون دامور كيف اللي يصير فالعادة ولا هو كلمني و قالي حاجتي بيك كيفما يعملو و كيفما نسمعو لا ،الامور مشات بطبيعتها ،نهار خرجنا مع بعضنا ،شدني من يدي ،ما جبدتهاش ،حسيت بحاجة حلوة برشا مشيت معاه جنب في جنب اليد فاليد و عينينا حكات و تفاهمو وحدهم ،اللي بيناتنا مكانش مستحق برشا كلام .....