Notice: Undefined variable: relatedArticlesCount in /home1/datalyz/public_html/tounsia/plugins/content/tags.php on line 149

عشرة عمر #3

3echret-3mor-infidelite-roman-tunisieZaineb S. - زينب س


غالية هكا سموني على اسم مماتي ام امي ، نحبها برشا و نحكي معاها فاللي ما نحكيوش مع امي ،انا الصغيرة في دارنا ،دلولة جيت بعد اخت و خو ،من عايلة دافية مستورين ،صغري كامل مراهقتي بريود الفاك ما عرفت حد ولا عشت قصة حب كيف ندادي ديما كان لقراية و مسكرة على روحي ،مش على خاطر مش مزيانة لا بالعكس حليلتي ،غنجة شعري اكحل و عينيا مارون مصرارة و عندي اللازم فاللازم و شوية كرش ،كملت قرايتي فالفاك عمري وقتها 22 سنه ،طفلة صغيرة في يدي شهادتي فرحانة بيها قولت هذي سلاحي ،بديت نلوج في خدمة

ساقيا حفات ،نصب فالمطالب ما كلمني حد ،ايست لين نهار كلمتني شركة قالولي تجي غدوة تعدي انترتيان فرحت مشيت جبدت شعري حضرت لبستي و خايفة زعمة نسلكها و نولي

بخدمتي و فلوسي و مسؤلة على روحي ..

مشيت ،بقيت شوية نلوج عالبلاصة التكسيست يغزل ماذبيه يرميني مالكرهبة و يرتاح مني الله غالب مازلت ما نعرفش الدنيا بلقدا و اخيرا لقيتها ،هبط ريقلت شوميزي بلعت ريقي قريت شوية

قرآن في قلبي و دخلت ،جاتني السكريتيرة

-اتفضل مادموازال

-عسلامة مدام عندي انتروتيان ،انا اللي كلمتوني لبارح

-اه باهي ،ايا ايجا منا معايا

مشيت نتبع فيها دخلتني لقاعة الانتضار ،نلقى يجي 4 ولا 5 يستناو قبلي ،تي هاو ثمة غيري و انا ماشي في بالي وحدي ،قعدت نقلب في عينيا فالصالة و الناس اللي معايا ،كل مرة تجي

السكريتيرة تنادي لحد ادخلو للبيرو اللي مقابل ،يجي اكثر من ساعة و انا نستنى لين جاتني السكريتيرة

-مدموازال غالية

-وي

-ايا تفضل

دخلت بيرو كبير وراه زوز رجال واحد كبير فالعمر شعرو شايب و لابس مريات نظر هزني و حطني من ورا المريات ، و لاخر صغير يعمل فال 30 سنه طويل شوية شعرو خفيف و عاملو بالجال ،

لابس كوستيم فالقري تكلم و قالي :

-تفضل مدموازال غالية اقعد

قعدت و اك السخطة درا كيفاش يغزرلي ،و بعد شد السيفي متاعي في يدو و تكلم

-ليسونس ابليكي اون انفورماتيك ، خدمت قبل ؟

-لا مازلت كيف تخرجت اما عاملة ستاجات

عوج فمو :

-يعني ما عندكش اكسبريونس ؟

-ما عنديش اما والله انا خدامة

-عندك فكرة على دومان التجارة ؟؟

تكونسيت ما لقيت ما نجاوب

-ما عنديش اما انا نتعلم فيسع

الطفل اللي معاه تبسم يشجع فيا و قالو

- سي كمال احنا مستحقين شكون يفهم انفورماتيك و تو نزيدو نعملولها فورماسيون انتيرن

كمال تلفتلو

-معناها تضييع وقت

انا الدم طلعلي لراسي و حسيت بذل و اهانة و شادتني الغصة ،انا ليلة كاملة نحلم كيفاش بش نخدم و نولي بالبوست متاعي ،طلعت لحكاية اصعب ماللي توقعتها

غزرلي كمال :

-تنجم تتفضل و استنى منا تلفون

-عيشك

خرجت دوب ما فتت باب الشركة دموعي هبطو ، غاضتني روحي ياخي منين نجيبها انا الاكسبريونس يا ربي ماو لازم نخدم بش نعملها ....



زينب س.

Saveعشرة عمر #3