قمت الصباح على صوتو

-غالية غالية فيق ما عادش بكري عالاولاد

عملت روحي راقدة

-اووووه تي خليني نرقد

-تي امشي حتى انتي ما عادش بكري عليك راو

يا ربي ما نحبش نحكي معاه عفتو كرهتو

-مش ولادي وحدي اهوكم قدامك لبسهم و فطرهم انا في كونجي اليوم

يلبس في شوميزو و يكلم فيا

-كونجي !! هاك ما قوتليش

-نسيت و توا خليني نرقد

درت على كرشي و غميت راسي بالمخدة ما نحبش نراه ما نحبش عيني تقابل عينو خايفة لا نفقد اعصابي و يعرف اللي انا فايقة بيه ،نسمع فيه يفيق فالاولاد و بعد دخل للكوجينة يقربع فالماعون خربها الدنيا نعرفو ما يعرف يعمل شي من غيري و هذي غلطتي انا ،انا اللي عملتو سي السيد عليا يتفرج من بعيد و انا المسؤلية كلها على راسي ،ايييه خليه يعرف قيمتي و يعرف انا كيفاش نعاني كل يوم ،بعد ساعة سمعتهم خرجو قمت راسي رزين بالبكا متع لبارح عينيا منفوخين و قلبي يوجع ،وجيعة عمري ما حسيتها ولا نعرف نوصفها حاسة روحي مغدورة و مخدوعة وين كان مخبيلي هذا لكل ،قمت مالفرش بالسيف دخلت لصال دو بان ،عبيت لبانو و دخلت فيه و رخفت روحي حاسة بدني لكل مدقدق يوجع مالبلايص لكل ،

دموعي عاودو هبطو و المرة هذي ما شديتش روحي و قولت فيها وووه بكيت بكيت لين عييت و تخلطو دموعي بالماء ،فديت مالدار تخنقت لبست حوايجي فيسع و خرجت لشارع نمشي نمشي لين ساقيا وجعوني ما نعرفش وين ماشية ،زعمة نروح لدارنا نحكي لامي ،لا لا امي مريضة تو نحيرها و نفجعها عليا ،زعمة نتعدا لاختي نفرغلها قلبي هذيكا عشيرتي و اكيد تفهمني ،لا لا هي تحبو هارون و تحترمو تو يطيح من عيناها ،شبيك غالية مازلت تخمم فيه و تخبي عليه ،اليوم ولا غدوة لازم بش يسمعو انا مستحيل كان مازلت نكمل معاه ،عيت وقفت تاكسي و مشيت للبحر قعدت على حافة الصور نغزرلو ،نسمتو هداتلي عصابي شوية ،سرحت معاه و رجعت 8 سنين لتالي اول علاقتي بهارون ....