أنا  كيف نجي بش نكتب جملة قصيرة تحكي عليا ، بش نقول قداشني فرحانة ولا حزينة  ، نلقى روحي كاتبة سطور و حروف طويلة ، لو كان بيدي نجيب حرف و شكل جديد بش نفرغ لي عندي  ، نحس هالحروف ما تكفيش و ما تزيش ، اكداس من المعاني ومن الكلام اللي يلم برشا حاجات و يجيب برشا حكايات من اللي تعدت و فاتت و اللي مازالت   ، مانلقاش مهرب منها ، ..

عادا نقوم و  نهزها شليلها و مليلها ، من اسعدها لاتعسها ، و نبدى نلوج وين بش نخبيها ، اما انا ماعنديش وين نمشي لغير كراستي و قلمي ، و برا عاد  ، اش يسلكها ، نكتب هذا مع هذا ، و دخل هذا مع هذا ، و وين نتفكر حاجة لازمني ندونها بش ماننسهاش .. انا راو ذاكرتي قوية و ماننساش اما كيف نجي بش نحكي على روحي الحكايات الكل تبدا  تتعارك ، و كل وحدة تحب   هي اللي تتصدر قبل لخرى و تستعرض قواها على ذاكرتي ، وقتها ترجع قصتي معاها من جديد ، و نتفكر روحي كيفاش كنت و كيفاش مريت بكل مرحلة من حياتي ،،

ساعات نتشجع  و ساعات تغيضني روحي ،، خاطر قداش من حاجة  عديتها من غير مانفضها و قداش من حاجة عطيتها قيمة اكثر من قيمتها و اخرى حسبتها مش موجودة و تعديتها وقت اللي هي اهم حاجة فيهم..  انا كيفكم ، عملت الغلط ، كيف ما عملت الصواب زادة ،انجم نكون تعديت على حق عباد ، اما كيف نحس بغلطتي نطلب السماح و نستعرف ، اما فما منهم اللي كانوا يستاهلوا اللغة الحرشة بين قوسين بش يعرفوا قيمتهم ، يعني الغلطة تنجم تكون هي الصح بنظري ، و هاك من الحكايات اللي عديتها ، المشاكل موش اكيد تكون مربوطة بالناس اللي دايرة بينا ، مثلا عن نفسي اكثر انسان غلطت معاه هي "  أنا " ، ظلمتها برشا الأنا ،

كنت جبانة بين قوسين مرة اخرى في برشا حاجات صادفتني و ما خضتهاش و لتو نخاف منها ، و اكثر حاجة توا اللي معطلتني اللي انا برغم اللي نحب نكتب و نعبر مانجمش نفصح على برشا حاجات تهمني ، ديما نحكي بالالغاز كيف ما يقولوا حتى بيني و بين روحي مانحبش نستعرف بالحقيقة و في عوض مانكتب اللي صاير بالملي نكتب كلمة 'حكايات' 'حاجات ' و ماشابه ذلك .. اكثر حاجة نحب نبدلها في روحي هو الصراحة اني نكون صريحة مع نفسي اكثر من العباد ، نحب نواجه روحي و مانجمش نحب نعرف شنو انا نحب و شنو نكره و مانجمش علاش عادي نجاوب ب مانعرش مين غير ما نتعب روحي و نتعدا  !  ... و تو كي تجي على بالي زي هال حكايات و يصرلي هالتشوش في مخي ،  نوقف الكتيبة نسكر الكراسة نحط القلم و نبقى نخمم هكاكا في الهامش و على الهامش لين يهزني النوم و من غدوة  يتعاود كل شي موش من جديد اما يجيب القديم و يبقى حاول معايا الى ما لا اعرف و الى ما لا اريد ..