Zaineb S. - زينب س الجزء السابق

قداش الوقت توا اووه تي هاي 4 متع الصباح راسي وجعني من كثرة التخمام ، غميت على راسي و رقدت قمت كان من غدوة لعشية نسمع فالحس فالكوجينة ..فاطمة يا فاطمة ..نعم للا ..اووه قوتلك الف مرة نكرها كلمت للا (تذكرني في روحي قبل )..واللهي مدام شهرزاد ستانست سامحني ..باهي مش مشكل امانك اعملي حاجة ناكلها ..حاضر ..عيشك ..تعداو نهارين هكاكا ماكلة و نوم بش انموت بتعب نحب نشبع نوم ..

النهار الثالث قمت حضرت روحي كلمت امل الاسيستونس متاعي: وي امل ..حاضرة الروب متاعي ..باهي برشا نص ساعة و انكون موجودة ..الليلة عندي سهرية في **** وتيل مشيت غنيت كملت هزيت روحي و خرجت ركبت فالكرهبة ، انا نسوق وحدي ماللي مات نورالدين ، وصلت لباب الدار هبطت بش انحل الباب و اوه اووه شكونكم انتوما سيبوني آه..سكر فمك يا ****** ، واحد شدني سكرلي فمي و واحد فركسني سرقولي فلوس اللي خدمت بيهم الليلة تلفون متاعي .. هات اش عندك اخر .. والله ما عندي شي هذاكا هو نرعش و ما نجمتش حتى انصيح بالخوف ، ضربني كف طيحني فالقاع و هربو بقيت نرعش خايفة و دزيت عالبكاء و قلبي يضرب فال 100 ...

قمت بسيف ركبت فالرهبة و وقفت عند اقرب مركز ، لكلها تغزرلي و انا نخبي في وجهي ، جاني رئيس المركز : تفضل مدام اش حاجتك ..عملولي توا براكاج ..كيفاش اوصافهم ..زوز يعمل عمارهم فال20 و ال25 ..حكيتلو كل شي قلي احمد ربي ما هزوش الكرهبة هوما باينين صغار و جايين جيست عالفلوس .. يا مدام شاكة في شكون ؟ ..

لا لا منشك في حد ..باهي هاو عملنا محضر كان ثمة حاجة تو انكلموك ..باهي يعطيكم الصحة ..روحت بكيت بكيت بكيت كان جا عندي راجل ما يصيرش فيا هكا ..قمت الصباح كلمت امل قولتلها تحط اعلان في الجريدة في الانترنيت partt نحب قارد كور و يكون زادة عندو permis de conduire ..باهي مدام اتهنى ..نهارين بداو الدموند يتكدسو ، خليت امل تختار ليوم ماعنديش خدمة كلمتلي 5 ولا 6 باش نقابلهم و انشوف شكون يساعدني و امل كانت معايا و عندي ثيقة كبيرة فيها و انعمل عليها برشا ....