Houssem Hfaiedh - حسام حفيظ

12.45 دقيقة ، قاعد فوق الكرسي في المكتبة العمومية ببوعرڨوب ، رجل فوق  رجل ، لابس شورط دجين شريتو من فريب نابل ب 3000 ألاف ، وسورية محلولة شوية كاروات زرقة  شريتها من النصب بودينار متاع باب البحر ، مقابلتني وهيبة أمينة المكتبة ، نحكو في كل الأمور ، في برشة من شوية الحكايات ، نتناقشوا ، نتخاطروا ، وساعات كي يجي موضوع حزين عينينا تزغلل بالدموع ، وفيسع ما نسيطر على الوضع ونبدل الموضوع باش يتغير الجو ، وهيبة نعرفها حساسة ، ونعرفها مرأة قوية ، وهيبة مرأة بأتم معنى الكلمة ، تحسسك بوجودك ، وتخليك تحب طيبتها ، وتحب معدنها الأصيل ، وهيبة صديقة برغم فارق العمر الكبير بيني وبينها ، تقعد من أحسن الأصدقاء إلي وين نمشيلهم نرتاح نفسانيا ، نثقف ، ونفسيتي ترتاح ، عرفت اكا العبد السيس ، إلي يتكلم بشوية ، وبفيانة ، تصرفاتو وكلامو وحنيت صوتو يحسسك بالآمان ، حكينا في برشة أمور برغم إنو منتفاهموش في أمور السياسة ، هي عندها رؤية وأنا رؤيتي مختلفة تماما ، اما انا لحق  نحب صديقتي وهيبة ونحب شكون يحب وهيبة لأنو إلي متناقشش مع وهيبة ومتكلمش مع وهيبة فاتو شطر عمرو ، أمينة على الكتب وعلى المعرفة والعلم وحارسة الكتب ، العام الي نسعد كي ندخلوا .. 

تشجعك باش تحب الكتب بطريقة مقنعة جدا وتحبب الصغار في المطالعة وتختارلهم في القصص والكتب وتسايس فيهم ، فعلا تمنيت في تلك اللحظة يتخلقوا برشة وهيبات في الدنيا .
سخانة في راسي ومعدتي شادتني تعصر عليا ، مرقدتش لبارح ، شي أفكار ساذجة وشي مرضة مرضتها وأنا مستبرد وشي فادد وحاسس روحي وحدي ، برغم فكرة الوحدة تخلقت وعشت بيها لكن أنا الصيف منحبوش نكرهو نعيفو ومنحملوش ومنجمش لا نفرح فيه ولا نسعد فيه ، وديما نقول الصيف لأماليه ، أماليه إلي عندهم الفلوس يدورو الدنيا ويتمتعو بالبحر وجو الصيافي، أما أنا في صيف كامل ممكن نمشي مرتين ونتمرمد فيهم بحكم نسكن بعيد على البحر ، هاوكا في المرتين أذوكم نتبحبح ، اما نحب نزيد نمشي ، يا ديني مزالت صغير ، ونحب الدنيا ونحب الرياقات والشيخات ، وعمري متاع خرجات وشيخات وفرحة بالدنيا حتى في زيني عندي منوري في زندي منعري ،  موش مكبوب نبكي على فلتان وعلان كي خان عشرتي ،والا صديق الطفولة نساني ونكر عشرتي ، والا كي معنديش حب في حياتي ، وليت عجوز نخرف وحدي ، لازمني نقنع روحي الي الدنيا متاقف على حد ، والدنيا مهيش باش توفى كان انسان خرج من حياتي ، وكانك على صديق الطفولة  يجيه نهار ويعرف قيمتك ، والسعادة الحقيقة الي لازمني نقنع بيها روحي هي صحتي لباس عليها وعايلتي بخير ، هي  برشة كتب ، وبعد على البشر لانو انا في داخلي نتفق مع مقولة سارتر " الأخرون هم الجحيم " ، وبطن معبية ، وجيب معبي بالفلوس هذيكا هي السعادة الحقيقة ولباقي دزان حنك ، أما انا الصيف نكرهو خاطر نكمل فيه القراية ونقعد بين اربعة حيوط وحدي ، القراية منحبهاش ،لكن نحب الريتم متاعها ، قومة الصباح ، التضحيات والغصرات، الإقزامانات  هذوكم يكبسوني ، وينسوني ،ومن الأفكار السلبية يحرروني ، وممكن هاوكا فاش نلهي روحي ، بالأخص في الشتاء وقت تبدا الهواء يصفر ، والمطر تبخنس ، وخدودك يبدوا حمر وانت ملفوف في كبوطك دافي ، تروح تلقى فيم جاري من يديات امك محمص بالدبابش و بالقديد  ، تتكى في شونها تشم ريحتها تنسى هموم الدنيا . تتدفى على الكانون تتفرج في السبوعي وتحط ملازمك لغدوة وترقد تشبع بالنوم ، في الشتاء حبينا والا كرهنا ، ناكلوا وشاهيتنا تتحل ، وندفوا ونشبعوا بالنوم ، لا عروقات ، لا كشمارات ، لا وشواشة ولا سخانة ولا شهيلي ينقب الراس  ، صحيح الشتاء ساعات يجي يكست العظام ، لكن يبقى خير من الصيف بألف مرة ، وأنا قاعد مع وهيبة شخصيات تتناحر في مخي وتتصارع ،سيناريو متاع حكايات يحب يتكتب ويخرج للعلن  ، روايات تكتبت ، وكتيبة تحب تخرج ، وناس تحصر فيا تحب تكتب روحها ، أنا المدة لخرانية مخنوق ، برغم إني نجحت في السنة ثانية عربية ، ممكن توجه مفيهش مستقبل ، أما أنا نحبها العربية ، ومغروم بيها ، ونسعد كي نقراها ، خاصة مادة الحضارة الحديثة والشعر ، قداش نحبهم وقداش نرتاح ومخي يتحل للقراية ومضبيا السوايع يتعدو أعوام ومنخرجش من الصال .

الشخصيات الي قتلك عليهم ، هوما شخصيات حقيقة ، موجودين على أرض الواقع ، نلفق ليهم حكايات ونعمل عليهم سيناريو ونسرح مع خيالي ، شنوا تتوقع من إنسان كيفي ، الصغر متاعو حزين موجع ، لتوا آثاروا سيكاتريس في قلبي ، شنوا تتوقع من إنسان عاش الحرمان ، حرمان مزدوج ، حرمان من أبسط شيئ في الدنيا هو التغذية ، كنت نشتهي كعبة ياغورت ، وكعبة موز ، ونحشم بكسروتي الي بالطابونة بزيت الحاكم  الي لافتهولي امي بمنديلة مصهودة كروات في ساك اكحل، نحشم باش نمدو في ريكري العشرة ؟اما اصحابي  يبقو يغزروا والضحك مالي وجوهم ، شنوا تتوقع من إنسان يهز حكة كسكسي بالرمان وياكلها في بيت التولات باش اصحابو  ميضحكوش عليه في المكتب ،وميكلش معاهم خاطر يحشم ، ونفسو عزيزة وممكن يتشهى ماكلتهم ، جبونات ، وماكلات ، وطواجن  ، وياغورات وقازوز وشكاليط وبشاكيت بكل انواعو ، وانا كسكسي في حكة بلار ساعات تتكسر في الكرطابلة وكي نروح ناكل عليها طريحة نباشت القبور ، معنتها لا يزي فطور يحشم ولازي طريحة ، هذا لكل يهون ، اما من صغرتي نعيش في الحرمان ، حرمان الأخ ، منعرش لو كان فاهمين الموضوع او لا ، بمعنى كي معندكش خوك ، معندكش انتماء ، اكتافك مهمش سخان ، معندك مع شكون تلعب ،تتلاطخ ، تصيح وتناڨز وتهبط لقشة من السماء معندكش سكون يحميك وتلعبو تخت الماء ، معندكش مع شكون تتعارك على قناة في التلفزة ومعندكش مع شكون تتعارك على اتفه حاجة .. كي تمشي للحجام وقعد وسط ناس كبار وانت وحدك يغزلوك كاينهم باش ياكلوك ، وتغزر للي في عمرك جابينهم اخواتهم يضحكو ويناقشو ويتعاركو ويضربو بعضهم ، يباتو محملين بعضهم ويبلسو لبست بعضهم ، يتعاركو ويهبطو ريش على اتف حاجة ، اما انا ديما وحدي ، وحدي منزوي ، لا لمسة لا همسة ، باكم ، كاني معاق في كرسي متحرك منتحركش ، مناقشش منتكلمش ، الحجامة بابا يختارها شنوا هي ، اللبسة امي تختارها ،لا خو ينصح ولا رفيق يواسي ، المكتب انا لول برغم المعاناة ، شهادة الإمتياز والمركز الاول انا ديما فيه ، الناس تحبني ، اما انا منملك حتى حب في قلبي نفتقر للعاطفة ، للحب ، للاحتواء للاحتضان ، للسعادة ، اي تتصورو الحمام منمشيلوش ، علاش خاطر معندي شكون يهزني ، وحتى كان مشيت وحدي شكون باش يحكلي ضهري ، شكون باش يعبيلي الماء ، شكون باش يحميني ويواسيني ،شكون باش يمدلي المنشفة ، وشكون يبقى يستنى فيا باش نخرج ويدخل هو ، نولي  نغسل في الدار ، نسخن مقفول ماء ونغسل راسي واطرافي اكهو منشبعش بالماء السخون  ، شاهي نهار حمام سخون وماء يهبط على لحمي ونحك ونمسد ظهري واطرافي ومعاي خويا يعاوني ويحكلي ظهري .. ،

بابا  بارد ، سارد، منكذبش يحبني ، اما حبو بارد ، ديما مغشش وساكت ووجهو مقلوب  ، ميشريليش ، ميشاهينيش ، ميخرجنيش ، ميحمينيش ، اما يحبني ، يحبني بطريقة الاجداد متاع بكري ، نتفهموا هو عاش اكاكا وجدي رباه هكاكا الحب البارد ،متفهموش حب او كره ، اخواتي البنات كانو ميحبونيش ، ميحبوش  شكون يدخل فيهم ، يتلمو هوما وبنات الجيران نسرين واماني ويبقو يضحكو ويلعبو وكي نجي ندخل معاهم يقولولي خلينى بنات صافين ، نمشي نقعد وحدي في بيتي تاكلني السخانة والعرق والكئابة ، معنديش خروج ودخول ، لسبب هو ميعطونيش فلوس باش نخرج ، نولي نسكت ونبكم ، وقت نجحت لسنة سابعة اساسي في معهد بوعرقوب ، تصدمت ، اول مرة ندخل في عالم هكا ، كراهب وكياسات ، وبالاصات وقهاوي وناس،  برشة ناس،  وتلامذة ونساء ، انا نسكن في ريف برج حفيظ ، بعيد على مدينة بوعرقوب ، وانا كيما قتلكم منخرجش ومنتحركش ، كي نخرج نمشي للحجام البزناس سمير ، الي يقعد يخزر درا كيفاه ، وريقتو سايلة ، وتتعدى مراة يبقى يخزرلها ويطرشق بالضحك هو والرجال الي غادي ، كلام منفهموش اما  توا فهمتو هذاكا علاه مسميه البزناس  ، متفهم وما احقرهم ، ومنذلهم ،


السنة السابعة 2 ، مع برشة وجوه مختلفة ، من فيئات عمرية متنوعة ، من اجناس مختلفة ومن مناطق اخرى جايين لغرض واحد الدراسة الضاهر هو الدراسة !لكن ما خفي كان اعظم ..

، انا واسامة طفل قرأ معاي في المدرسة قعدت انا وياه  ، الليسي كبير وبرشة اساتذة ومواد مختلفة تخوف ، ورياضيات وفيزيك بالفرنسي ؟ برشة مواد منيش فاهمهم ، ووجوه الناس تخوف ، وانا ريفي ، وجاي من وراء البلايك واكيد الناس الي كيفي باش تفهمني انو تتصدمو بدنيا اخرى ، ووجوه اخرى وتكتشفو الي فما كياسات وكيران وميتروات وحوانيت ومڨازانات والوان ومفماش كنشي الطبيعة وداركم النائية وانما فما  برتمنات ومفماش كان الجبل والعشة الي تسكن فيها لا فما فيلات وديار عالية شاهقة بالبيسين ومفماش العصيدة والمقرونة الجارية الي ناقصة افاح الي تطيبها امك وانما فما انواع واشكال من الماكل والاطباق والجبونات واللحومات والهراڤم والخ ..
طبيعي جدا باش نخاف وراسي يوجعني وكرشي تجري ومعدتي تضربني ، بالاخص كي نروح في كار الخمسة مع بني وائل وحشاد وبرج حفيظ ، قرابة 200 تلميذ في كار واحدة ودز ولاز وسرقة وريحة عرق وساقين وكلاسط منتنة  ، وتمنييك وضحك واستهزاء ، اعوام الليسي كانو من اتعس الاعوام الي ريتهم قي حياتي ،اول حاجة حاجتنا للفلوس، الفلوس باش ناكل وباش نشري كراسات وادوات مدرسية ، لانو الاساتذة مترحمكش ، ومتتفهمش ، ومتفقهش انو انا من طبقة موش متوسطة وانما تحت الصفر،  وحالتنا حليلة وكي نتعشو في الليل عملنا افار ،وانا موصلت جيت لهنى كان معملت جهد ، كاني جاي نحرر الأقصى من براثن المستعمر ..

متتفهمش انا نحشم ونخاف كي تبدا تعيط عليا باش نجيب الكراسة ب 10 دينارات ، فما استاذة تتفهمك وتحس بيك وفما اساتذة تتشمت وتمسح بيك القاعة وكان لازم تعطي روحك باش تشريلها لاوازمها ، يكرهوك في القراية بالسيف . 3 سنوات كل عام ننجح ميهمنيش بالاسعاف او لا مفيد ننجح ، خاطر كانت ظروف تسحق نجاحي وتقتلني وعلى احلامي تقضي عليهم ، اولا بابا الي يعطيني انا واختي سوسو دينار فرنك نقسموه باش نعدوا بيه نهار كامل ، معنتها 8 ساعات على كعبة كروستينا او  كعبة ڨوشو ، برغم نخرجو صباح بلاش فطور ونتحملو ونسكتو ، ومرات ميعطيناش ، نقعدو للشر ، نهار كامل وفوماتنا نروحو بيها ناتنة بالشر ، تي ساعات نقعد نتخبى في التولات خاطر الذر الي نقرى معاهم يهدسلهم باش يعملو فطور جماعي كلاس كامل بيزا وڨازوز ومكسرات وضحك وانا نتخبى نهرب نفصع ، منحبش نقعد في الحشمة ، تي مرة مشيت معاهم خاطر شدو فيا صحيح ، حشمت باش نجبد 500 فرنك من جيبي باش نشري كعبة الكروسيتينا والجماعة تاكل في البيزا والهمبرڨر والقازوز ، نولي نقوللهم صايم وانا من داخلي باش نقضى بالشر ونتكلاطى بالجوع ، ثانيا مكثر الناس الي قريت معاهم ، مقبلونيش ! محترمنيش ، محبونيش ، كرهوني وكرهو روحي فيا ، في هاو يمشي كي الطفلة ، يتكلم كي الطفلة ، يتلعوك كي الطفلة ، في هاو بنوتي ، هاو بيوض ، هاو يتثنى في مشيتو كي الانثى ، وقداش كان الكلام يقتلني ، يسحقني ، يمرضني ويبكيني ، ويوجعني ، شرارتهم وضحكهم واستهزائهم في وذني يصوني ، كلماتهم حقارتهم ليا و ذاتي لتوا نحس بيهم ،اكا الدموع السخونة الي تهبط من عيني لتوا نحس بيها ، وجيعة ومرارة القلب ، عصرة المعدة وكره الذات كلو نحس بيه ، ويلبك العرق وتبدا السخانة تقتل فيك وتعرق وتصرفاتك تدخل بعضها .  اكا الافكار الي تجيني في الليل ، اكا البكاء والكشمارات في الليل وانا نبكي ونغرد ، اكا المفردات والافعال والكلمات الي عندها انياب ورؤوس حادة الي اخترقت قلبي لتوا نحس بيها ، لمدة 3 سنوات وانا وجوه الناس اذوكم حافضهم ، ضحكهم ، وكلامهم وتصرفاتهم حافضها ، اناث وذكور ، رجال ونساء ، عملة وطلبة ، اداريين واساتذة ، منظفين ، الي عندو والي معندوش ، الي يسوى والي ميسواش ، حافضهم ونقول عند ربي ميسالش نكبر  ونسسى , ياخي سمحوني بالله ، الانسان الفينو ، الرقيق ، الحساس ، والفنان ، ميعيشش معاكم ؟ ، الي يمشي ويتكلم مرخوف والا كيما تقولو انتم كي الطفلة مهوش انسان ؟ مهوش عبد ! معندوش مخ ؟ انت مخلوق من بابا وام وهو مخلوق من بهيم وبهيمة ؟ انت تعبد في رب وحدك ؟ وهو يعبد في  رب اخر ؟ سمحني انتم مسلمين مثبتين ماهو ؟ علاش المتخلف سواء كان في الصفات او في التصرفات تجلدوه ، تحطموه ، تحقروه ، وتستحقروه ، وتقتلوه وكان لازم تجيبو عليه الملح والحجر ؟ وتضحكو ، شنوا يضحك في الحكاية ؟ هل انت كامل ولاخر كامل باش تضحك على انسان مختلف ؟ وتقول هو ناقص رجولية ،؟ هل انت باستهزائك على الاخر ورفض الاخر توا انت راجل ؟ هل عندكم الرجولية تتقاس كي تتمنيك على عبد ؟ وتحقروا وتقزموا ، وتقتلوا ؟ الرجولية معنتها  عندكم بدن خشين ، وقضيب  طويل وتمتع  في الفراش وتنتهي بالتخبيش والترييش والعياط ودمومات سايلة وقذف في اماكن مختلفة ؟ باش تظهر فحولتك ؟ والا راجل بتمينيك على الخلق ؟ وشنوا فيها انسان حساس وراقي.؛ ويتصرف حتى كي البهيم انت شنوا دخلك في جد امو ؟ ادخل فيك هو ؟ تي لو كان نجي ندقق فيك نخرجك عريان تفتقر لكل شي واولهم للرجولية الي حسب رايك انت راجل او انت مراة ؟ الي تقول بروحك انا مراة وبكرة وصنديدة ومكبوسة خير  منه واكا الضحك عاد متاعهم ، حصيلو الكلام هذا لكل نسمعوا مرة نتلف ومرة نبكي اما ديما نبكي وحزين وقلبي يتفرشخ كل عام وكل عودة مدرسية ! منرتاح كان كي نكمل ، تي اخر نهار  في الليسي يتعدالي عرس ، الي معادش نقابل الشلايك والحيوانات والافمار السوقية متاعهم ..