نعرف الي الدنيا تعباتك ووجعاتك باياماتها قهراتك ...وبلحظاتها المرة حزناتك..من ناسها الي ما حباتك ومن اصحاب الثيقة والمصلحة خلاتك... من ابداعك وقوتك وطموحك حطموك ودمروك كملوا بيك اياتهم وطيشوك ..على ضحكتك التحفونة حزدوك ..وعلى روحك الخفيفة نكروك وزادو هانوك ...نعرف ونزيد نعرف اكثر كي نغزر لعينيك الحزينة وجثتك المتحركة كالدفينة ..

نعرفها اكا الضحكة الطافية الي مخبيتها وراء روحك الصافية ..نعرفك ونحس بيك وبوجع قلبك الي يعذب فيك ..دموعك واكا التحويق الي تحت عينيك هو الي يحكي و يصرح عليك ..يحكي على جروح مدفونة وبالسنين محمولة وفي الذكريات محفورة وفي القلب مذكورة...

اما توا لوقتاش باش هاكا كالنوارة المحرومة لوقتاش باش تقعد هكا كالكورة ...وقتاش باش تفيق وتقول يزي ما تعرضت لظلم والقهر والحرمان والجريان وقتاش باش تقول يزي يا دنيا وانا وليت كالمجنونة وسطهم مفتورة ...وقتاش باش تتكلم وتعبر على روحك المجروحة ..روحك الي تحملت الياسر وهزت الرزين وكتمت الدموع في العنين ..طاحت واقفى على الساقين .لوقتاش باش تقعد هكا مكبوتة وانت تدمع مخبوتة ..لوقتاش ولوقتاش باش تنفس قلبك المعبي بالندوب والبكاء مخبي ...لوقتاش باش تنحي التعب والخوف من الاعداء والسهاران ليلات الشتاء ...لوقتاش باش تتشجع وتخزر لدنيا بعين اخرى ..عين معبيا حب وفرحة وقوة وايمان وتغلب الطغيان ...

وقتاش باش تعاود تحلم مرة اخرى وتحقق ..وقتاش باش تتعلم تنسى الجروح المخفية وتدسهم وسط دار منسية ...وقتاه تضحك وتفرح ومن عينيك تمرح ..وقتاه تقوم تجري وتاقف مرة اخرى و تعيش الدنيا بعين متفائلة و قلب معبي تبسيمة دافية ..وقتاش باش تفرح الميمة و تهديلها هدية كبيرة وتسمع الزروتة من فمها مشروطة...وقتاش باش تتعلم تنسى اكا السنوات الي تعدات عليهم اللحظات وطواتهم الايامات بالنجاح متاعك يتمحاوا و ويتداوا ..يتكتبوا على ورقة كبيرة وينساوا ...لوقتاش ولواقتاش باش تقعد هكا