ساعات يقولولي اضحك لدنيا تضحكلك ..تتبسملك وتفرحلك ..بايدها تعليك وتجنحلك ..كلمها توا تعيطلك اشطح معها توا تزرطلك ،دربكلها توا تشمسلك ..

يقولولي ابتهج لها الدنيا الخايبة ها الدنيا العايبة ..ها الدنيا الي ما ترحم حد لا فقير ولا غني ..

يقولوا عوم معاها وتبعها وين ماشية وجاية اركب معها ومنساهش بين الثنايا ..حبها ودللها وكان لزم اكذب عليها وتبسملها ..متخليهاش تخونك ،تغرك ،من صحك تسلبك ومن عقلك تخرجك ومن روحك تفددك...وفي عبادها تكرهك ومن روحها تنفرك وتبعدك وفي اصحابك تشكك وفي قلبك تجرحك وبالقسواتها تحرمك وبالفتراتها المتقلبة تسيبك ..تضحك عليك بايامتها وتحطمك..تعييك لين تكسرك..تميتك و بالاصحابها تجلدك ..تعمل روحها تسمعك اما هي تشرحك وتحللك بطالعاتها تفتفتك ...

يقولولي اوقفلها وحاربها ...اكبس عليها واقتلها ..صارعها واهزمها ..تعارك معاها وسامحها ..بوسها واكرها ..سبها ووجعها ..اطعنها وزيد ممرمدها ..حبها وبكيها..ادخللها للاسرارها واقتحمها ...وريها قوة روحك ..وجهد صحتك ..وقدرة صبرك ..وريها الي انت متتهدش وفي عزيمتك متكبش وعلى قوة داخلك متحبش ..وريها انت شكون وريها الي روحك لاتعرف تخدر ولا تخون ..تخبي دموعها تحت الجفون ..وتحرق الامها في الكانون ..تسهر الليالي تبكي وتفرغ وجع قلبها المغبون ..تعوم في ذكرياتها وغدوى تكون ..على وعدها تصون.. تخبي البكاء في اعماق السجون.. تفرح مع الناس كاينوا لا كان ولا يكون.. تحارب وتقاوم وفي يدها المقرون ...

يقولولي الي الدنيا بحر وكان مكش باش تعوام راك في خطر ..بين امواجها اعمل سطر ..واردم تعبك وسط الحفر ..وابكي في الخفر ...

يقولولي الي الدنيا كتاب تصفح ورقاتها وانسى الجرح والعذاب ..عيشها وطير معها ..حبها وزيد حبها لانها دنيتك ولازمك تعيشها وتعمرها ..اغرسلها توا تزهرلك ..بكل ثيقة خليك معاها مساندها في قرارتهاا متعاندها ..بوحلها الي هي تعباتك وقتلاتك الف مرة ..عبات من دموعك جرة والف جرة ...

لكن في الاخير علماتك تعيش امير وسط مشاغلها موش حقير ...ولا ذليل ..كي تطيح بيك تركب على الخيل...وقوتك تضاهي طيور الابابيل ...تحب نقلك خليك كيما انت هكا ..متبدل شيئ اقعد انت برك...انسان باخلاقك مزيان وبروحك الخفيفة دريان...

حسام حفيظ