Houssem Hfaiedh - حسام حفيظ

انت موش كيفهم ، انت حاجة اخرى ، ابقى معايا راني نحبك ، وانا بيني وبين روحي نعرف الي هو مجرد اعجاب وبعد نومة الفراش باش يتنحى كل شي ، الحب موش في نهار واثنين ، موش تحبني من منظهري المغري وربما من زين وجهي ، والا تحبني من ستاتياتي على الفيسبوك ، والا ريتني نشري في بعض المشتريات وانت تعمل في كابوسان ناقصة سكر ، حبني وانا حالتي كيف البةمة كي نصبح الصباح ، حبني وانا مبكي ، حبني وانا حزينة ، وحبني وانا فرحانة غشيرة صغيرة ، فهمتو وفهمت الي حبو ليا نزوة ومتاكدة الف بالميئة بعد ميقذف فيا باش يكرهني كيفهم الكل ، متاكدة من كل شي لاني خبرة في المجال هذا ، وانا بيناتنا تعبت ، وحسيت روحت تهديت ورزنت ، ووليت نفرق بين الصادق والكذاب وهو ثما صادق جملة ، مشكلة مجتمعنا معادش فيه الصادق ، معادش الي يخزرلك كذات وكقيمة وكصفات وكاخلاق وثقاقة ، كلهم داهم في المؤخرة والنهود والافخاذ المليانين وشعرها طويل اكحل ومضبيهم تبدى كي" كار دي بي  " وانا فديت بصراحة وعييت وتقهرت وتشويت وحاسة روحي كاني باش ندخل في دپبريسون اخرى ،هو بدا يتمسح وانا ضايعة بين افكاري ، صوتو معادش يتسمع ، والا نسمع فيه شوية ، كاني في عمق بير غااارقة ،حسيت روحي فادة وتبعت وفي سوڨوندة حسيت الف احساس واحساس ، ياخي هكا تتعاملو مع بعضكم ، شنوا معنتها حب في نظركم ؟ تراه جنس ومتعة وشيخة ؟؟؟ شنوا معنتها احساس ومشاعر  وشنوا معنتها عذاب جراء الحب ؟ الحب افعال قبل ميكون نومة فوق الفرش.
منعرش كيفاش عطيتو داودي مكبوس محرر متاع مراة ڨارحة مترحم حد ، ومتحب يڨرد عليها حد ..

روحت خذيت صندويتش بزايد هريسة وتعديت للحماص خذيت بالفين  قلوب بيضة وقازوزة صغيرة سيدر مدب خاطرني نحبها القازوزة اذيكا ، وروحت حطيت فيلم متاع رعب ، نحب نخوف روحي ، ونحب ننسى شوية وجيعة ، تقوقعت على روحي ، وتكيت ، ومعجبنيش الفيلم كلو عياط ودمومات، وهم ازرق ، كلمت ادارة الجامعة.
.الو سي الشريف
مرحبا مدام سارة ، لباس
عيشك
اسمعني ميسو راني مريضة وتاعبة الايامات هاذم منجمش نجي توا نبعثلكم شهادة طبية
اي مدام قداه باش تغيب باش نعرف انا
يظهرلي 3 او 4 ايام ونرجع
باهي مدام ، الله يبارك انشاءالله لباس .
جبدت حرابش النوم ورقدت
غدوة صباح جات تبوس  فيا ، امي عزيزتي جيت

تحيرت عليك نسخايبك، درا شبيك عوايدك تكلمني،صارت حاجة اخي ؟
لا مصار شي اما تاعبة وقالقة من الخدمة .
ي بنيتي ، تي تستنى وقتاه تتخرج استاذة ، وباعد قتلي نحب نكمل شهادة الماجستير وخذيتها بملاحظة مشرف جدا وفرحنا وهاك تقري في العالي وتحضر في الدكتورا ،
معادش ليها وقت الدكتورا . الناس لكلها ضدي ي امي وحتى الدنيا مهيش ماشية معايا ، فديت ي امي فديت وترميت في حضنها نبكي ، تكيت عند امي عزيزتي وشميت ريحت الحنان والسعادة ، في علم النفس يقولك الام قادرة انها تنحيلك بنسبة كبيرة الالم متاعك وانا كيف تكيت وحسيت بالحنانة شبعت منها وحسيت روحي ترخيت ونحب نرقد ونشبع بالنوم. نشبع من ريحت امي ونشبع بشوية اطمئنان فاقدتو ورقدت .
ي ناري على بنيتي العزيزة ي حبي ي روحي ، انا والله نحبها برغم المزاجية متاعها ، برغم تشوطينها وسلبيتها وكئابتها نحبها ، بنتي وكبدتي ،ويستحيل نتخلى عليها ، خفت عليها وقت دخلت لسبيطار منوبة ، ي ميمتي كيفاش حسبت وقت كنت نزورها ، واكا الروب الي لابستها واكا الحالة ، سارة تسخفني ، ونحسها بعيدة ورغم التطور والثقافة والكتب والمقالات والمحاضرات الي  تعملهم في الجامعة الا انها مزالت حزينة ومزالت تحس في روحها وحدها ، الله غالب وانا خايفة لا نغمض عيني وهي يصير فيها نعرفها حساسة برغم عمرها الكبير ، تتسمى صاحبتي وموش بنتي ، انا عمري 65 وهي خمسين واش فرحنا انا وبوها كي جات ي ربي واش زغرطط واش تدحنست واش حبيت ونجاحها استنيت ، سارة سميتها وتمنيتها تكون احلى واروع سارة في حياتها ،توا نقوم نعمل لبنتي شوية حشايش واكليل وزعتر ونعمللها طرنجية بالعسل والقارص ، ونعمللها طبيخة مدبشة ، نعرفها تموت على المبكبك والجاري والحار والفول والجلبانة والعدس وكل ماهو صحي وفيه منفعة, كوجينتها مسخة نظفتها بالجفال والمواد النظيف الباهية ، نميل ونستدعل في دار بنتي وكلمت مدام سمية تبعثلي اولادي في تاكسي وانا نعرضهم جاو نحو حوايجهم ، قداش منظمين ومتربين حطيتلهم الفطور ونبهت عليهم باش ميعملوش الحس خاطر امهم راقدة.
بعد ماضي ساعة قامت
محلاها نومة غطست  كاني خارحة من الحمام ، ما احلاها نومة ،.
صحة لبنتي الغالية.
حطيتلها فطرت وطيبت كويس تاي باللوز وقعدنا نتفرجو في فيلم على الجنوبية نسيت اسمو اما متاع قرش وفيه مراة وفي لخر طرشقاطو خاطر كلالها اصحابها حصيلو ..
قعدت جمعة على المعدل اكاكا وهي رجعت تخدم وانا باعد مركبت فم برغل بالقرنيط ومسحتلها الدار دورت المفتاح وطربقت الباب ..
امي المرة هذي حسيتها قربلتي ، حسيتها تحبني وعبرتلي على حبها بلهوتها بيا ، مفهمتش شبي الوالدين مرة يظهرو حبهم لينا ، ومرة لا ، مرة يبردو ومعادش يعبرو ومرة تلقاهم شلال متاع حب ، واما مضبيا ديما تحبني امي وديما تعبر عن حبها ليا ..انا بابا منعرفوش ، وجهو منتذكروش ، ممكن كان حنين عليا وممكن لا ، منعرش خاطر مات وقت عفس عليه كميون في كريار الرملة ، وقتها منعرش شنوا معنتها موت ، وفراق، وبعد وهجر ، توا حسيت بيه ، وشبي منحسو بالبعد والهجر كان كي نكبرو ، انا مماتي لتوا نبكي عليها وحسيت ببعدها عليا كان كيف كبرت وعملت عقل ، الناس العزيزة علينا نحسو ببعدهم علينا كان كيف نموتو ، كان كيف نكبرو ونشيبو ، ونرزنو ونثقلو ونعملو عقل ، وانا توا المدة هذي حسيت ببعدها خاطرني وحدي ، والوحدة مرة بلحق مؤة ، توجع العبد تهدو وزيد تعطيه السلبية والكئابة والتقوقع ، تحس بو تليحس ركب عليك .
باش نسألكم ياخي جربتوه إحساس الوحدة ؟

مكنتش باش تختارها ولا حبيت تقعد وحدك أما أجبرت وتلزيت تقعد وحدك خاطر الناس مهمش فاهمنيك ولا حاسيين حتى بيك وشنوا يجرالك كي تتعب والا كي يبعد عليك عزيز على قلبك قداش باش تعاني كي تقعد وحدك، وتنعزل على  الناس ، رغملي


معبي شكاير حديث ..

ياخي جربتوه إحساس حد ميكلمك وحد ميسأل عليك تليفونك مينوقزش جملة لا نهار ولا ليل ..تحل الصباح تقول نلقى ميساج ومتلقى حتى شيئ... وتقعد بسوايع تدور في الفيسبوك وميكلمك حد ؟ جربتوه الشعور هذا ؟

ممكن ممرارة ممكن حزن.. ممكن انكسار.. وحتى يكون يزعزعلك ثيقتك في روحك تولي تلوم في نفسك وتقول ياخي انا شنوا عملتلهم ..هذا لكل خاطر حبيت وفديت بروحي على خاطرهم ؟؟؟.. منحكوش عاد علي نكر

عشرة سنين ومعادش يحكي معاك كان كلام ترهدين ونفاق يسكسك مغلف بشوية حب ليك ...

أما فمة فيئة حبيت نحكي عليهم في ظل ها الظروف الكل ! ..هوما هاك الناس المتحررين ..المسالمين ..المتسامحين مع أرواحهم ..يظهرو أقوياء وشجعان و حد ميهمهم ولا ينجم يزعزعهم ..القوة هي لغتهم والشهامة والأخلاق هي صفات تميزهم ..في أغلب الأوقات ميحكوش برشة يدوبى كلمة وقص تحسهم يتكلمو ألغاز أكثر ملي يتكلمو كلام ..كلامهم سر وفن مخلط ..يلمحو تلميح إنهم يحبوك ..يعشقوا الكتب والستيلو والورقة والبيت عندهم مكان مقدس وهذاكا بالنسبة ليهم جنة أرضية طاهرة ..حتى الأصحاب معندهمش برشة ..

مفهوم الحب يختلف في نظرهم ينجم يتحس ..يتمس ..ينجم يحظر الجسد كيما ينجم لا ..عادي يعمل معاك علاقة جنسية بالمخ ..يزطل مع أفكارك ويسكر معاهم وينتشي لدرجة الحلاوة ونشوة الجنس ..
ممكن زادة رغم ها القوة الظاهرة فيهم وها الجهد وزعما
" يا جبل ميهزك ريح " هوما اكثر عباد تعاني ونساتهم الاماني وحتى من الاغاني نساتهم وبعدت عليهم  ..يسكتو يسكتو ويطرشقو بالبكاء ..وحتى بكاءهم حار نار ..يكوي ..وجيعتهم تتحس وتتكلم سكات ..منحكوش على تفاصيل البدن والعروق الظاهرة والكلام والحماس الزايد في بعض الساعات ..ومرات حزن ميتفهمش ..منحكوش على المزاجية المفرطة من الضحك للحزن والعكس صحيح ..

تحسهم إجتماعيين ومنزوين فرد وقت ..يحبو الناس ويكرهو أفكارهم وعاداتهم وتقاليدهم الصعيبة وطريقة تعاملهم مع بعضهم في نفس الوقت...

يحبو يخرجو للعالم ويتكلمو وفي نفس الوقت ميحبوش يخرجو من بيوتهم ..

فكرة العزلة والإنزواء على العالم تميزهم أما في نفس الوقت يتحسرو علاش ميسألش عليهم حد ..علاش ميتفكرهم حد ..علاش ميحبهمش حد ..علاش هذا الكل ..وحتى كان جاء عاملين الخايب ..يتمنو نهار العبد الي حبوه وضحو معاه يحبهم كيما حبوه هوما ويضحي عليهم ويحسسهم الي هوما شيئ مهم ..ومميز ..وجوهرة ناصعة وسط نفق مظلم ..

حبيت نقول إلي الفيئة هذي من الناس هوما الفن وتمظهرات الحياة وتجليات الحب ..هوما منبع العالم ..هوما الرومنطيقيين، عشاق الطبيعة والصمت والحب ..والكتب وفيروز وام كلثوم وعبد الوهاب ..هوما الحب الي يتفهم ويتحس بالالغاز... موش تعابير تافهة وساذجة وتوفى في علاقة جنسية فوق فرش بارد مفيهش روح ولا طعم للحب غير قطرات قذف تروي عطشه ..مفهوم الحب عند الناس هذيا ميتقالش ..ميتبعثش في ميساج ويكتبو نحبك ..لا ..الحب عندهم افعال " ألو شنوا احوالك توحشتك ليوم ..محلاه النهار تمنيتك معاي ! مزينها الشمس ليوم تحسها زرقت لينا نحنا الاثنين ..تفيق على ميساج توحشتك تمنيتك معاي ..قدانيش نحبك ..قداش حياتي معاك مزينة ..ليوم محلاهم عينيك ..اعطيني بوسة ..نحب نشم ريحتك ..عنقني نحب ترجع فيا الروح ..روحي تهواك راني نموت فيك ..اعطيني شوية حب خليني نرجع للدنيا ..بيك نعيش وبيك انت نحلم " ..وحتى كان عنقوك تعنيقتهم قوية مغروسة وبوستهم مرصوصة ترد الروح ...ممكن تحس معاهم بالراحة والإطمئنان خاطر البساطة تزينهم ...باش منكذبش عليك ميحبوش النفاق الاجتماعي وميحبوش الكذاب ..تحس عندهم حاسة سادسة قبل ما تتكلم يعرفوك شنوا حاجتك ..يعرفوك تترهدن والا لا يعرفوك تحبهم والا لا ..في أغلب الوقت ديما وحدهم اما يتمنو شكون معاهم ..يونس وحدتهم ..زادة منحكوش على الحوايج ..فيهم رمز وترميز عادي يلبسلولك دجين على كسكات وحذاء متاع سبور ..عادي يلبسو كوستيم وكرافات على حذاء متاع سبور..الدليل من هذا الي هوما خليط ومزيج من برشة حاجات متكون ومتلون .. باش يأكدولك شخصيتهم متركحش على شعور واحد وانما عادي يحزن وقت الضحك والعكس  وهو شنوا الانسان ماهو متذبذب ومتوتر ومظطرب والانسان السوي هو الانسان المريض ... شخصيتهم شاربة ومتشبعة من الثقافة ..في أي موضوع يحكو معاك ميخلوكش ساكت ..وقت يسكتو أعرف راهم ضربتهم خيبة أمل ..منحكوش عاد كان حبوك ..إعرف راهم باش يتجردو من قوتهم ومتفر بيهم كان يخرجو في الغشاشر الصغار الي في داخلهم...ممكن شخصياتهم قوية أما في العادة حساسيين كلمة والا تعليق في الفيسبوك يرجهم ..يوجعهم ...ويحرقهم بالنار ..عادي كلمة والا حمصة وتغزيلة منك ترجهم وتكسرهم ..وكي يحبوك برسمي ويفاعلو معاك تحس الدنيا تحلتلك ..يعطو من ارواحهم ..ويفدوك ..أما كي مترجعش الحب أذاكا يصير فيهم ..يتوجعو لدرجة الموت ..

حبيت نختم إلي مهما عشنا ومهما تغربنا على أرواحنا ومهما صار فينا وتقلقنا من ظغوطات الحياة وصعوبات الزمن ومتاهات اليومي ..إلي انو مزال فينا الجهد إنا نكمل نحلمو ..مزال القلب يدق ..مزال النفس داخل خارج ..مزال الدم يجري مجرى العروق في البدن ..

..ومزالت الأمنية  إلي باش يجي شخص يميزك ويحسسك بوجوك ويعرف قيمتك وتواصل معاه المشوار ويقبلك بكل التعب الي فيك ...ويحاول معاك حتى كان علقت عليه يرجعلك ويعاود يدق باباك ويحاول يخرجك من بيتك الظلمة المسكرة في صدرك ..مزال القلب يتمنى حبيب يحبو ويغرس روحه بين الظلوع ويحب ..

حبو بعضكم ومتخليهاش بحد حبك وضحا عمرو على خاطركم ...كملت نصها وبعثاتو للموقع الي ديما تنشر فيه خواطرها ولشعارها ، وبدلت وحفلت وزينت ودبغت وسوكت وحمرت بالحمير الاحمر شارياتو من بوتيك في الحمامات وقت كانت تعمل في سوان لوجها ..

لين جاء 6 فيفري2017