عرست وانا عمري عشرين سنة ، وقتها مإخترتش نكون عندي دار وصغار خاطر مكنتش مسؤولة برشة وممكن ضايعة ، مصعصة وصاحبة احوال نكون نضحك ومتفر بيا جبدت المخابل في كبة وبديت نفرت فيهم ونغرد على حبيبي الي خاني مع سنية بنت القهواجي ..، بابا عطاني لاول راجل تقدملي ، حسيت روحي تبعت ، وتعطيت بالرخيص ، وانا وقتها وردة ياخي حشني وذبلت ، عرست وعملت روحي فرحانة ،عديت سنين وانا نتطلفح بين دارنا ودارهم ،حقا حقا تبع راجلك ولازمك تتحملو وتتحمل تنڨريزو  ، اه مالا كيفاه يجي الهناء هو ماني نتحمل المصبط ،والكش، والسب، والنعل ودين والديا ووالدين والديا، ونحي الوسخ والكلاسط الناتنة وتتحملو في الفرش ونطاوعوه وكان لازم نبوسو الساقين اه مالا ! شبيك راهو السلطان، البو على الجد، وعلى الخو، وعلى العم وعم العم .
ومنغير منطول عليكم ليلة من ليلاتي روحلي سكران وريحتو بالالكول والشراب وعندو برفان متاع نساء ، حليت الڨجر وجبدت سكينة ودخلتها في مصرانو جبتو وفرتلو معدتو ، مات والله لا ترحملو عظم حتى لتوا ! .

بعض الناس منجموش نسامحوهم ، منعفوش عليهم ، ومنبردولهمش ، صبرت وفاض الكاس ! وحسيت روحي عطيت اكثر من اللازم من قيمتي ومن قدري ومن صحتي ، تشديت في حبس المنطقة نهارين،
وقتها نتذكر وجها الڨرديانة مسمامة و  سمينة ، حسيتها كرهتني من اول مرة دخلتني فيه ، وجها منتفكروش اما كانت بصحتها وعاملة برشة مكياج ، وشعرها اصفر وفيه الماش ، ولابسة كلها بالاحكل وتسب وتتكوشش ،
قتلي اكبس روحك
قحرتلها 

قتلي شنوا باش تدخل فيا سكينة كيما راجلك، وقعدت تضحك وتكلفخني بسيفت داودي لتوا نارو مهدتش من قوة الظربة ،دخلت للبيت بدات رحلتي مع النداء والزطلة والهم الازرق والكش والسب وانا عادي ماني بنت دار عاقلة ومتربية وكنت سلعة لراجلي ، الله غالب هذي لحقيقة المرة ، وباش نهرب من الوظع المزري هذا تعرفت على بنية يعطيهولها الخنفوسة ، منعرش علاه اما كنا اعز صحاب وعلمتني برشة حاجات في الحبس ومن جملتهم تعلمت نزرق وحدي من غير متعاوني وماهو ساعات توفى عليا الزريقة ..تسلفت وحدة من عند مربوطة اخرى وطلعت بزهري ماخذتها من مربوطة قبلها  وطلعت مريظة بالكنسار ،
عرفت المرض ركبني  هذا وقت بديت معادش نرقد وحتى الماكلة معادش ناكل برشة، وشعري طاح ،وحسيت  روحي خفيت، ووليت نوزن عشرين كيلو بالحساب ، ومنشرب كان الزطلة وميجني النوم كان بالزطلة ...
وبعد شهر عيطولي وحكمو عليا 30 سنة حبس ، تصدمت وكان حكم قاسي عليا بالاخص وانا مراة ، وانتم تعرفو شنوا معنتها حبس للمراة، يهدها ،ويوسخها، وتولي وسمة عار ، وتخياب وتعفاش ، وتولي مجغلفة وسودة ، العينين محوقة والبدن يضعف وتاكلو التونية وتنتان ، وتسواد ، وحوايجها يولو مسخين كيما حوايج الخجر او الطلابين ...
اما استانست والحبس علمني نكون وحدي وقت شدتي ، علمني نكون مراة ، اما علمني زادة نزطل ونتكيف وسط الحبس وتعلمت نڨول كلام خايب انا منعرفش معانيه اما نقولو باش نثبت وجودي ڨدامهم وميحڨرونيش خاطر يحقرو الي تبدا فينو وبنت حرير ونونو ،
هذا لكل في جرت العرس والحب ، كنا صغار نقولو حب يعطك كلب ! وتوا بلحق يعطني كلب يكلني ! علاه نحب اصلا ...الحب ما اخيبو ، ما ارزنو ومتفهتو وممرو ، وممسطو ، من لول تبداه فرحان لباس عليك ، شايخ ، فرحان ، عايش وواثق من روحك خاطر حبيت والا كرهت الحب يرتحك ،ويرغفلك اعصابك، ويعطيك ثقة في روحك ،ويحسسك بوجودك، وتحس روحك فوق كل انسان ،وتضحك ،وخدودك يدزو، وتسمان، ووجهك ينور وتولي تتطعم الدنيا كلها حب ! وتولي تشهى وتتطعم البوسة والشفة، واللزة، والدزة ،وتتمنى نومة فوق الفرش وتبات تحلم وتتخيل،حتى من شفايفك يحمارو وبدنك يولي يشتهى ..وتولي عندك متوري ومضبيك ديما تعري باش تظهر زين مفاتنك ،
انا منكذبش عليكم  غلطط معاه قداه من مرة قبل منعرسو، البوسة لولة كانت منه هو على غفلة جات وقت كنت متكية عليه على اكتافو  و  نسمة البحر تكوخر وتدخل للراس من غير استدعاء  ، وصوت فيروز " شايف البحر شو كبير كبر البحر بحبك "زاد هبلني وشيخني ومسني .
ومن باعد البوسة ولات فيها مسان من مناطق حساسة وتدحنيس وتلحسيس ، ونهار جيتو لاهبة وانا لحق ديما نجيه لاهبة خاطر نحبو وحبي لازم يترجم ولازم يتشاف ويتحس ، وهو وين نعملو فزات نحسو يقوم ويبدل الهدرة يحشم وانا حشمتو تلهبني، ومرة كلمني في عز القايلة ويظهري امنيتي باش تتحقق قالي نتقابلو في الحمامات حابب نمشي "للسپود" معاك نعملو فطور قتلو اي، وفي قلبي قتلو اعمل الي اتحب فيا حتى اكثر من الفطور وكانت العملية اكاكا ، بعد الفطور تكيفنا وسمعنا ام كلثوم وانا الشيخة وصلتني لراسي بالاخص وهو صبلي كاس ، انا منشربش في العادة  اما معاه هو جربتو وكان احسن احساس ، طعمو كان  بالشوكلاطة بنين وخفيف ..
وقبل منبدو في كاس الرابع، حملني وهزني للبيت الاوتيل الي كراها على خاطري
وكملنا الرابع والخامس وعاودنا برشة مرات لين معادش فيا ، كان حنين ودزتو فيا حنينة ، فيها شيخة وتعنيقة ، رضابو كان بارد ، وانا كنت نظيفة ونتدلل وصوتي كان يزيد يهيجو ، اكهو لين هزنا النوم وبجلنا الدوش لين يطيح الصباح  .

زوز بدونات عرايا ، ملوحين فوق الفرش ، تقاتلنا وكنا في الحرب ، وهو طلع مقواه حسيتو "عنترة 'في زمانو ، الدزة بالبوس والتحويحة بالتعنيقة، والتعويجة والتدريجة ، وماه مابنو ، كنت عطاشنة وسقانى العسل واللبن ، ورواني منه ، وما أبنو وما أحلى طلتو وحبو ، قمت قبلو وقعدت نخزلو وهو متكي بجانبي وعريان ، نخزر لاها الوجه البريئ ، الجبين الي يلمع، تكميشات وعروق راسو الباينين ، حبيتو من قبل ، وحسيت روحي لقيتو باعد مظيعتو ، عنقتو ومن قلبو بستو ،قمت ولبست البيجاما متاع النوم ودخلت للكوجينة ، حسيت روحي عروسة جديدة واول نهارها وطيبت قهوتنا على أنغام فيروز " يسعد صباحك ي حلو "
عصرت زوز كيسان برتقال " قصتلي " نموت عليه وحليت الثلاجة ولقيت المعجون والزبدة وصمتلو كعبتين عظم نحبو يهز صحتو ويتعبى ، وانا هكاكا  نميل ونستدعل في كوجينتي ، ونحضر في الفطور ، منحس كان في جسم لصق فيا

فيا وبدا يبوس فيا من كرومتي وهمسلي في وذني وعضني بالشوية وقالي صباح النور لنور حياتي ،
دخلت في امري وغمضت عينيا وحسيت روحي نحلم ، ومفقت من حلمتي كان كي كمل فرغ فيا وهز سروالو  وقالي محلاك ، كيفاش وشنوا صار ووقتاه وكيفاه محسيت بشيئ ، باسني بوسة خفيقة وهزني لبيت البانو وحطني في البانو ورش شوية زهر والريحة خرجت وتكيت فوقو وحكيتلو وحكلي ، وبستو وباسني ، ودخلني لقلبو ورقدت فيه.

.الفطور مبنو من ايديك  .
.عيشك حبي انت الاحلى والابن .
حبيبي نجم نسالك؟
تفضل :
انت تحبني!؟

شرق بالحليب ،وكح،  وخرجها تنهيدة ي ميمتي تزعزع الاجبال وشدلي ايدي وكبس عليها وما اقواها ايديه حسيت بالوجيعة بالعمل اما منسيتها كان محط عينيه ورشق قلبو فيا وانا سرحت معاه  وقالي :
نحبك ونعشقك ونموت عليك ونفنى على خاطرك ..نحبك معنتها نصبح عليك ونرڤد على تصويرتك ..نحبك معنتها نموت في زين عنينك وبسمة سنيك ولمعة خديك ...ياخي شنوا خذيت !؟ على شنوا توحمت امك .نحبك بكلك نموت على جد امك وبو  جد امك ...
.نحبك معنتها نحررك نفنى على خاطرك ..الضحكة ماتجي كان معاك ..وبيك انت نتحرر ونلڨى وجودي وانسانيتي ...
وهو يتكلم تذكرت اول حب ليا وقتها كنت في الجامعة سنة اولى عربية وحضارة  و شديتلو يديه وڨتلو مهما تعددت الثقافات واللهجات والخواطر واللغات حبك تزرع فيا للممات،وكبس على ايدي خاطر حسني درا وين مشيت وسرحت وكمل ..


نحبك من لخر معنتها نعشقك ونموت في زينك ومنرا حد غيرك كان انت ...نشوفك في وردة نشوفك في زين بنية فارحة بسنيها الجدد.. نشوفك في فرحة وضحكة نشوفك في اخر رشفة من قهوة المحبة ..نشوفك في كتاب ..نشوفك في اخر جبدة من سيڨارو العشق ..نشوفك في خاطرة كتبتها وانا في عز العذاب  ..نشوفك في اشعار الشعراء والادباء . من لخر الدنيا تساوي انت. ..
الحياة هي انت ..الحب هي انت. .العشق هو انت. ..
بيك انت انا موجود وكي تغيب انت  نولي مفقود ..
نحبك ونزيد نقولك نحبك ...

وهت الحق يقال انا بيناتنا هوكا ساعات بيني وبين روحي نحب شكون يڨولي محلاك توحشتك قداش الدنيا بلاش بيك ضيقة ومرة ..نحب شكون يهديلي نوارة ويعزني ويڨولي هيا  نعملو دورة تحت الشتاء ..نحب نراك صافية كالماء ..حبي ليك تعمى وعلى خاطرك ڤلبي تشفى ..وتسمى والوجع تمحى ..
. .نحب شكون يڨولي محلى عينيك ومزين خديك وڤدانيش نحبك ...
نحب ساعات شكون يعطيني المحبة والحب والكلام المعسول الي فيه الطرب والغزل ..
عالمنا مهوش مزيان يكذبوا علينا عالمنا كذاب فيه كان الحزن والعذاب ..كذبوها علينا كي ڨالولنا الدنيا مزيانة ..وهي في الاصل جارية عريانة. ..عالمنا فيه المنافق والكذاب والسارق وتاجر الدين والساقط والبهيم ...
هذاكا علاش نحبك وحبي ليك متكذبش متڨالش في كتب ولا سردوه العرب ولا قالى عم علي الشنب ...
حبي ليك حب اعمى وانا ندهدص فيك ..
قلبي ميت عليك وفيك وفي ريحتك
نحبك.

والراجل هاو جاوبني وحسسني بحبو وحسيت روحي تفرهدت الوقت اذاكا ولتوا لا نسيتها اللحظة اذيكا وبعدها بالظبط نرجعو للفرش ومبنو صباح ، بقينا مع بعضنا جمعة كاملة على المعدل اذاكا ، ووقت نلم في فليجيتي جاني وعنقني ولصقني  لسدرو ، وبشوية قالي نحبك ، شنوا براس ميمتكم يكون ردة فعلي الوقت اذاكا ، نترج ومن غير منشعر دموعي تهبط ونحملو ونقولو كان تشوف انا ي عزيزي ،

وانا خارجة من بيت الاوتيل يجينا واحد يقولولنا حاجتو بسي الطاهر ، حقا  نسيت وووه عليا ، مقتلكمش الي اسمو الطاهر ..نسيتوني فيه ، وممكن انا استعجلت وبديت نحكي عليه خاطر ممكن لتوا مزالت نحبو برغم الي صار عليا ، وقالي تفصل معانا مدام .
وه انا ماني مدام حد
مالا شتعملو انتم لهنى في بيت اوتيل
وانت شدخلك ، يعجبكشي ؟؟؟
معاك فرقة مقاومة الاجرام مدام !
تفضل معانا
يلا ، لبسوهم المينوت وحطوهم في الكرهبة

بهتت وتصدمت، وصنصرت، وتكبست ، يكيتي على روحي ؛ يشومي وي قلة وليا ، ي حليلي ، ي فضيحتي وفضيحة امي ، ومخيبو اكا الاحساس متاع انك هازيك زوز عزلكة بوليسة هاو الراس ، هاي الكرش ، هاو الفخذ ، وهاي اللحمة ولابسين مرايات متاع شمس من عام ككح ، والناس تخزرلك ، ويتمتو وشبيها وعلاه وشنوا ، وانا ملي لبسلي المينوت ، نسيت حتى انا شكون وحسيت روحي غادرتني ومشات لسابع سماء حتى هو مريتوش ، ومشفتوش ، ركبني في الكرهبة بالدز
بالشوية ي ولدي
ولدك ؟
تحرك اركب يعنن...
سكتت وعرفتها قارصة
وكيف وصلت حبسوني في بيت مسودة ملودة مسخة ومعبية نداء وريحة ساقين ، وبتت للشر وعلى السيمان .

ال8 متاع الصباح قدام رئيس فرقة مقاومة الاجرام وقدام اسئلة منيش عارفة كيفاه نجاوب عليهم .
قالي هاتلي من لخر
وانا بالخوف قتلو كل شي ومكذبت في حتى شي وختمتها و قتلو الحب معندوش قوانيش، ولا دين، ولا سلطة، ولا شي ،..لازمك كي تحب تتمرد ،وكي تتمرد تحس بوجودك ، ومتحكيليش بلغة الرب، والحدود ،والعرف ،والعادات ،والتقاليد ، الي يحب ميهمو في حتى شي من اذاكا ...
هازني وحطني
وقال ي عون هز الكازي من قدام منظري .
نخرج بعد 3 سنين حبس خاطر عملولي اعفاء والزطلة ظهرت مهيش متاعي ، خاطر البيت الي كنت فيها كان ساكن فيها واحد دزيري ونسى تروس الحمام متاعو في بيت البانو وهو حطهولي في فليجتي يسخايبني نسيتو  ،  وكيف خرجت منلقى حد معاي ،منعرف عليه شي لا وينو ولا تسييب والا لا ، من حبس منوبة للنساء نهبط على ساقيا نخمم وين باش نمشي ووين نڨبل وانا لا والي ولا تالي وحدي ، المحطات متاع الكيران نرقد عليهم ، وكي نسمع حثلة نقوم نتخبى ، وساعات نرقد في جنينة متاع عباد وصباح نقوم قبل ميفيقو بيا ، الزوفر يخوفوني ،

و مشكلتي موش اذيكا برك
.مشكلتي نكره العزلةوهي الي نخترها ،نحب نبقى مع الناس ونتحاور معاهم اما نقعد ساكة، ومبهمة،نحب نتحب اما انا منتحبش،وقت نضحك ،اما  داخلي نبكي،مشكلتي مزاجية ، ومتعصبة ، اما نظهر متزنة ومتوازنة ،حزينة انابلحق حزينة،ساكتة وسكوتي يتسمع ، وفي لحظة ما تبدل كل شي،وبيناتنا   كنت ديما انا الطرف الي حب العلاقة تدوم وتستمر وميهزها هواء ولا كلام ولا أهواء ..كنت ديما الطرف الي يتحمل اكثر ويحس اكثر

وبيناتنا   كنت ديما انا الطرف الي حب العلاقة تدوم وتستمر وميهزها هواء ولا كلام ولا أهواء ..كنت ديما الطرف الي يتحمل اكثر ويحس اكثر ويحب اكثر ويواسي اكثر وزادة يتغاضى اكثر ويسامح اكثر باش العلاقة متتقصش ،كنت نتحمل في بعدو في تصرفاتو الباردة وفي كذبو وفي تلوبيقو ...كنت نستناه بالسوايع باش يجيني ..وقت يبعثلي ميساج نحس في روحي ملكت الدنيا ...وقت يضحكلي نحس في روحي في جنة ارضية ...استهلكت طاقتي وروحي وعطيتو الي منجمتش نعطيه لروحي ..وقت يضعف يلقاني انا اول واحدة  واقفة معاه ...وقت يدبرم يلقانى اول المشجعين  ليه ،.وقت يبكي يلقاني نواسي فيه ...يقولي راني فادد نحاول نخرجو ونفرهدلو خاطرو  بكلام ، بنومة فوق الفرش ، بوسة حنينة مسروقة في عز سخانة جوان ...كنت نحلم معاه ونتخاطر معاه ..وقلت ملكت الدنيا ولقيت حبيب  وباش يعوضلي الحرمان ...

وفي لخر تقصت العلاقة وفي ليلة ونهار هبطط عليا المشاكل من كل ناحية ، منعرش شنوا نعمل بضبط ...خاطر بنيت عليه احلام واماني وقلت يستحيل يخليها بيا وفي لخر غدر بيا وباعني ولوحني كيف يلوحو الحاجة الي معادش تصلح ...ممكن محبنيش ومحسش معاي بشي لكن كان السبب في اني نتدمر ونفسيتي تتحطم ونفقد برشة قوة ،الليلة لولة مرقدتش ..لين  تعدات جمعة والنوم مكحلش عيني وين ندور نرى تصويرتو ...نرى حسو وعياطو ...معادش معدلة على حد ..دموعي يهبطو وحدهم ..وليت جهامة تمشي على الارض وفقدت برشة من وزني ...ودخلت في دپبريسون قوية ..كنت نتكسر كل يوم ...وحتى من فراشي معادش نجم نقوم  ..المخدة تتعصر بالدموع ..وانا حزينة ..كاني ناقص شي والا حاجة ،تعدا شهر على المعدل هاكا  وقلت توا يبرد ويرجع رغم هو الي خلاني وبلوكاني ...وليت نصلي وندعي اني نرجعلو ..وترجع فيا الروح ...عملت كونت اخر ووليت ندخلو للبروفيل متاعو في النهار الف مرة ...وحكيت مع اصحابو الجدد وصحباتو ...وكل يوم نزيد ننقم على روحي لاني نرخص في روحي وقت هو باعني وانا الي نجري قي جرتو ..،تعداو شهرين وبعدهم  تلاثة ...لين لهتني الدنيا وتلهيت بأولادي ..اما مزالت ندخل نشوفو شنوا جديدو ...
تعدى عام ثنين ..الدنيا هزيتني لبعيد ..ونسيتو ..حتى الموت باس نسيتو متاع الكونت الي كنت ندخل باش نشوفو .،وتعدات الفصول ورجعت السبول للحقول وضوات عليا الڨمرة والنجوم ...ونسيت وقلبي برد وثنيت ركبتي ورزنت وليت اقسى من برد الصرد .،وليت نصلي لروحي ..وتلهيت بقرايتي وتحقيق احلامي وطورت روحي .،و كان انتصار مني ...
انتصار اني تغلبت على خوفي وعلى حبي ليه  ...وكان انتصار حزين حزين جدا ...والقوة موش في حبي ليه ..القوة اني تجاوزت حبو وملامحو وصوتو معادوش يصونو في وذني .،وفي لحظة ما تغير كل شي الدنيا ولات مڨردة عليا ..وظهرت متجاوزتش الحكاية ،
خاطر انا بين قبضان السجن وكنت نحلم  ، وعلى الحساب دخت وقت كان رئيس فرقة الاجرام يصقصي فيا .

مقمت كان صبو عليا سطل ماء
ووووه على سعدي ووه
نقص بلا حس متاع لا ن...امك
باهي ، هاني سكتت اما متسبليش امي .
وتتشرط زادة ي بنت الهجالة..
تحرك تكلم منين جاتك الزطلة ،
زطلة ؟؟؟
اي للة زطلة لقيناها في تروس الحمام متاعك .
تروس وحمام ومتاعي ٫ متقوليش الطاهر ؟
شكونو الطاهر ،
دخت في امري وحسيت بالدنيا لعبت بيا ، وافكاري سخنو راسي ،وتعبت وجعت ونحب نرقد والا تتحل الارض وتبلعني ، وصوت في اعماقي يقولي هو وضميري وقلبي الي يحبو يقولي هو يبادرك نفس الشعور مهوش هو ، يحبك .
الطاهر الراجل الي نحبو


تحبو ؟؟اكبس روحك لا ن..كك بكف توا تقتل جد امك
موش قتلك امي لا
سكر فمك وتكلم
الطاهر راجل محلاه وعشت معاه احسن واروع اعوام حياتي
اعوام؟؟؟
تي لا انا بقيت معاه جمعة اما الجمعة تعدات عام وعامين و100 سنة على ما احلاها ، حنين وصاحب مبدأ وطيب ورجولي، ومنتفكر شئ بعدها شنوا صار وكيفاه دخلت وكيفاه انا توا فوق فرشي في الحبس ..الضوء يبات يشعل ليلة كاملة ، ريحة الساقين والصنان كي ريحة العنز ، والماكلة الي تعيف وانا ماني مقطوعة من شجرة اكهو ميطل عليا حد، في الحبس تتعلم برشة حاجات ومنهم انو تعمل على روحك وتكبس وتشمر على ذراك وتسكت وقت يبخصوك وتحترم روحك باش يحترموك ..وكي تعمل عكس اذاكا باش تتداس وتتعفس ووممكن ياسر يقتلوك وتمشي زيزي ..السيلون وما ادراك ما السيلون ، جربتو مرتين هو عبارة على نفق او جب تحت السجن ،ظلام ومعبي وسخ ممكن ينظفوه مرة في العام ، وشرايط العنكبوت من كل شيرة   ، وفيه تولات عربي مبلعة بالوسخ والفضلات واكا الريحة ي بابا ، ومينسك غادي كان الفيران والخنافس وصوت السبالة الي توترلك عصابك ، المرة لولة كي دخلتلو شعرة لا متت ، تعاركت مع وحدة شمطة حاسبها في روحها فرنك ونص ، وانا ماني اخلاقي في صباطي اكهو نهبط على امها ونشدها من شعرها ونزرقلها عينيها تربطط فيه 15 يوم ومتعدو كان بسيف ..ساعات يجببولي عشاي وساعات ينسوني جملة ، المرة الثانية دخلتلو خاطر سبيت المديرة الي غادي ، الله غالب انا قلوقية وكلمتي طول نقولها ، اكهو، عمري بدا يكبر بشوية بشوية ولحقيقة بدني وشهوتي بدات تكبر وانا ماني فادة وقالقة مضبيا على علاقة ترتحني ، كنت ندخل ايدي لين يخرج الدم اما منشبعش نحب نزيد وبياتنا شاهية راجل ،

ڨوتة الهرڨلي
ايجى عندك مقابلة
الناس لكل بهتت فيا ، مقابلة تي المراة ضاربة 3 سنين قريب لل4  سنين مزارها حد شكون باش يزورها
نمشي ومنعرش شبيني فرحانة بالك هو جاي باش يقابلني
مرحبا مدام ، انا عادل الجعفوري محاميك وكلني السيد الطاهر بن فرج .
شكونو الطاهر بن فرج منعرفوش
زوجك ي مدام !
زوجي سمحني ؟؟؟ انا منيش معرسة
كيفاش ي مدام زوجك الي معرسة بيه وعند منه زليخة وأكرم .
كيفاش ؟ انا فيبالي منيش معرسة بيه ، فيبالي راجل منعرفوش وبتت معاه في بيت اوتيل وكنت نحبو ..طلع راجلي وبو اولادي
اي مدام بالظبط
دخت في امري وبدات تخياب عليا ، معنتها انا غايبة على الوعي 4 سنين مفيبالي بشي وطلع عندي ولد وتلد وه وشبيهم مزارني حد ومكلمني حد امي وينهي وبابا واخواتي
فسرلي المحامي اني دخلت في دپبريسون قوية نستني فيشي للمحامي ووظحتلو وقتلو الي معندي حتى علاقة بالزطلة .
فهمني وبيني وبين روحي عرفتو علاه حطلي الزطلة وميطلع كان هو ، يحبني نخزز في الحبس وزعما زعما باعثلي محامي باه يخرجني وهو لبرا عايش .
سكتت ورقتلهم حلفة، والمحامي ظربة ظربتين جاييني وانا فايقة بالملعوب بكلو ، وفايقة علاه الطاهر كان يحبني ديما نشرب معاه التاي الي طيبو هو وانا نقول شبيه معطمو هكا باين حطلي فيه الدواء باش يخدرني ويظيعني بامارة صباح كي نصبح يبدا فمي مر كايني درا شنوا شاربة وراسي باش يتفلق ، هذا لكل على الورث باش نصححلو على الورث ، ياخي هكا تعيشو ، شبي الدنيا هكا علاش هكا ، الناس تلوج على شكون يحبها ويواسيها ويحميها ومن روحو يعطيها وهو على الورث ، وانا تخوبثت عليه كيما هو تخوبث عليا ، والمحامي الي وكلو قتلو باش نكتب وصيتي ، والاكيد عطيتو بايو هو ، وباش يعرف كيفاه يحكي مع الطاهر ويتلفو ،
بسم الله الرحمان الرحيم
إني الممضي اسفله صاحب(ة) بطاقة التعريف الوطنية عدد 146867996 والمولودة في 5.12.1987 بتونس والقاطنة في جبل الجلود تونس تتنازل عن كل ممتالاكاتها لصالح ابناءها ومضيت وبصمت ..المرة هذي باش نقول للمحامي يجيبلي نشوف اولادي توحشت ريحتهم ، توحشت صوتهم وعياطهم وزياطهم ، توحشت تنڨريزهم ، وتشوطينهم ، وتوحشت نقعد في التراس معاهم ، توحشت ضحكهم وأسئلتهم الي متتفهمش ، والي متلقاش جواب ليهم .
كانت المحادثة كالآتي :
أسمعني استاذ حاجتي بيك في قضية ونوعدك تكون اخر قضية ،

تفضل مدام ڨوتة



هو لحق غير انو يتشرى الا انو مذخم وصاحب ريشة ، ديما يلبس كابوط طويل اكحل وبورتكان ، ولحيتو محجمة وشعرو ترافلتا لتالي ، ووجهو ابيض احمر باش يطرشق منه الدم ، ديما يقولي مدام وصوتو رجولي خشين ، وهو طويل وحرجو في الاكحل ، وعندو الفيانكة .ويحب خدمتو ووقت قتلو متوحشة اولادي حسيتو فهمني .
ليوم بتاريخ 5 ماي 2000 باش نقابل عز منملك ، اغلى واروع حاجة ليا ، كفاحي وحبي ليهم ميتكبتش ، ميتقالش ، ميتحسش ، ميترجمش ، وميتدونش ،
جاتني فافاني الڨارديانة المزيانة ، مذخامها اكا المراة وجها مهوش متاع حبوسات ، وهم ازرق ، نحبوها الناس لكل ونشكولها همومنا وديما تدعي علينا بالخير ،عمرها يظهر في 50 سنة وسمينة شوية وشعرها اصفر وحواجبها كحل ديما منقين ووجها يلصف ويلمع ، نحبها وزدت حبيتها ووقت قتلي عندك مقابلة هيا تفضل اخرج .
خرجت ويا ربي على زين اكبادي وروح قلبي وزين الدنيا
حملت ومغمغت وبست وتدحنست وشميت الريحة وسكرت ، ما ابهم وما احلى زينهم ومطيبهم ومعزهم ي ربي يخليهم نشوفهم حاجة كبيرة ، ملي انا دخلت للحبس وبوهم استرفد بزنيخة المراة الي يخون فيا معاها والي لعبولي اللعبة باش يرجع ورث بابا ليهم خاطر بابا مات بالكنسار وامي عملت حادث بالكرهبة وقت كانت ماشية لخالتي تزور فيها ، الورث زوز كراهب ودار ملك في المرسى وحانوت متاع حوايج في اللاك 2 وبورتمان ناسيتو في المانيا يرجعو ليا،صيلو رباتهم مماتهم امي انا هي لا محالة باردة معاي ومتحبنيش وبعمري لا حسيت بروحي حسيت بطعم الامومة كنت نبكي وحدي في البيت وميسمعني حد ، كنت نعيط ونقطع في شعري وونندب وهي لا تخلع باب بيتي ولا تسمعني ولا تشوفني ، كنت ومزالت حزينة برشة ، المراة في المجتمع تتعرض لشتى انواع الاضطهاد ، في الشارع ميراوها كان سلعة وجسد ويشتهوها ، ويخزرلوها ويبزنسوها وتلقاهم عيونهم مرقوشة في مؤخرتها ونهودها وافخاذها ولحمها وجسدها ، في الفيسبوك تلقاهم يبعثو في تصاور قذارتهم وتصاور اعظائهم التناسلية  مفرخ صغار مزال حليب امهم بين سنيهم ورجال شياب الرجل في الدنيا والثانية في القبر ويبنسوسو ويخرجو بكامل شهامتهم ويقولو نحنا رجال والمراة متعاني في شي ،  المراة بلاصتها في دار وهي سبب القذارة وراني انا منيش نعمل في شي ، اشومي حتى نلبس جبة ونعصفر بمحرمة ونلبس شلاكة مشرمطة منسلمش منهم ، يعطيهم قضاء ينزل على سعودهم المسخين ، سيدي ولدي راهي المراة لاهي بدن ولا هي متعة فوق الفراش ولاهي وعاء حامل للقذارة وللساكس متاعك ، المراة اثبتت جدارتها حتى اكثر وخير من الراجل المراة الطبيبة الي تداويلك مخك من الوسخ والهمجية وتدوايلك بدنك من السموم والمراة زادة تحكم عليك وتاخذلك حقك والمراة تسوق بيك وكان لازم تمشيك للطريق المستقيم وبدليل العشر الاف الي ديما في ايديك حل فيها عينيك اذيكا اول مراة تونسية طبيبة واسمها توحيدة بالشيخ ي سي المثقف ، ومثلنا التونسي يقولك كيد الرجال كيدين وكيد النساء 16 ..كيما نجمو نلعبو بيك وكيما نجمو نسخفو على امك ..والنساء موش كيف كيف ، موش كيما القاضية وكيما الي تخدم في نهج زرقون ،واي بالدروج واضج والي عندو ريح يذري عشرة ...
يعطيني وين مشيت حصيلو شميت ريحة اولادي واكبادي وروحو وقبل ميخرجو طبعتلهم فوق جبينهم بوسة مرصوصة وشيعتهم بعيوني وفي قلبي نقوللهم باي باي نحبكم برشة انشاءالله تسعدو ويظهرلي خليتلكم اسباب السعادة لكل اقرو على ارواحكم ورودو بالكم على ارواحكم ...قلب الام ي ربي معاهم وينجيهم ودخلت ...
وانا بيني وبين روحي اكا الخامج الواطي اكيد باش يخززني في الحبس وفي تونس الي تقتل الطموح ومتصدق كان الكذاب استسلمت للقدر ..
ودخلت للتولات المسخة العربي، لقيت موس وقطعت عروق وايدي وخليت تونس كاملة تبكي عليا من بنزرت لبن ڨردان والجرايد لكل تحكي على مامتي ، حياتي وعزيزتي قلبي ، بعمري لا تخيلت روحي نحط امي انا في قبرها ، انا صغير وين نعرف، امي معنتها مشات عليا ، معادش باش نشوفها ونسمع زيططتها ، معادش نشم ريحتها ، معادش تعاركني ومعادش تحضرلي فطوري ، معنتها انا امي رحلت وخلتني وهي الي وعدتني متمشيش عليا ومتخليني في الظلام خاطرني نخاف ، مع شكون باش نتفرج في الكارتون ، مع شكون باش نمشي نسقي الزيتون ، مع شكون باش نجمع الحقول وناكل منهم الحقول ، مع شكون باش نسابق النجوم

مع شكون باش نحلم ونتخيل ، يعني انا توا وليت راجل الدار وانا الواقف على اختي ، علاه الفراق صعيب وعلاه موجعة كلمة فراق واحساسها اكثر واعمق ، عمري لا حسيت احساس كيما هذا ، ندبت وعيطط وبكيت لين عروق ڨراجمي حسيتهم بحاحو ، وندبت وحسيت روحي وحدي وفي نفس الوقت جعت وحسيت روحي نحب نرتاح ونصب على راسي سطل ماء بارد باش تبرد افكار راسي ، انا تاعب توا ونحب نرتاح ..

بقلم حسام حفيظ