نحب نتكى عليك ونشبع بالبكاء
سمحني اما تاعبة ، مريظة ونحب نغرق فيك وونهبط عليك مطر ورعد السماء ..
تعبت ،وجعت ،ويظهرلي بديت نفد من عيشتي ، كرهت روحي ، وافكاري تسممت وتشعبت ووليت نخمم برشة ، ومن جملتهم نخمم نمشي لطبيبتي خاطر قتلي وقت تحس روحك فادة ايجاني من غير موعد وانا عندي فوق 5سنين مزرتهاش  وقداش منو الواحد ، ي ربي راني عيت علاه هكا عامل فيا ، ..
الجمل هذي تدور في مخي ملي قصيتها معاه ، قلبي برد ومعادش نحبو وبعدت، وممكن كبريائي تحكم فيا ومعادش  نحب نقابلو والا نحكي معاه ، حتى كيف بعثتلو ميساج على تليفونو وعزيتو في موت جدو باعد ندمت ،علاه نكلم فيه ، وحتى لو كان مسمتعش صوتو علاه نبعثلو جملة ؟ ندمت برشة ، اما انا هذا عملتو لربي ،شيهمني فيه،ياخي هو رجعلي توا ،
هانو كل واحد على روحو، وهو غبر وانا مشيت بلا رجعة .

وه،  سمحوني بديت طول في الموضوع ومعرفتكمش على روحي الله غالب ڨلبي معبي ونحب نفرغ شكارتي لاي حد قدامي معنديش لشكون نحكي كلهم الشكارة و البحر اما انتم توا عائلتي وخزانة اساراري  ...

سارة  إسمي ,منيش سارة في حياتي منعرش علاش سماوني سارة ، ديما نقول كان جاء اسمي عكس السارة زعما حياتي تكون خير من هكا ، بون عمري 54 عام ومطلقة 5 مرات ،واخر عشقة عشتها شوية لا هزتني للزلاز ،حبيتو وعشقت رجوليتو وتغدرت بريحتو ، وحرقوني افكارو ، تعرفت عليه في كابيني مدام اروى طبيبتي النفسانية الي ساعة ساعة نمشيلها ، بيني وبين روحي منيش مقتنعة الي باش نرتاح ، اما نحب نحكي ونفرغ ڨلبي ، وجهها مزيان وهادي وتحسس بالامان الي فقدتو  في حياتي ، صوتها حنين وشعرها صبغتو صفراء وهي ذميمة وقصيرة وتتحدث برزانة،

و انا مستانسة بالعياط والحس وكي ندخل لمدام اروى نهدى وحدي وحدي منغير متحكي معاي ، نخزرلها برك نرتاح ، وقت نحكي تقعد تخزرلي وتثبت في تفاصيلي ، وتتفاعل معاي وتخليني للاخر نكمل نحكي ، نفرغ قلبي لكل وهي عينيها مرشوقة فيا لين نحشم رغم انا اكبر منها ب 10 سنين ، عرفت عمرها وقت دخلت للبروفيل متاعها عندها زوز صغار وراجلها باين عليه حنين ورجولي ومدللها شخلاها من بلاصة لبلاصة صحا لامها  وفي عيد ميلادها لخر هدالها كرهبة وانا ميتتذكر عمري وميلادي كان اليومية وساعات تنساه كيما انا نسيت روحي انا شكون ، نحشم من قوة عينيها وقت تثبت فيا ،وقت نحكي ونعبر ،سكوتها يخليني نرتاح ونحس كانو حد يسمع في حسي ويفهمني ويتفاعل معاي ، نحكي في لي نحب من غير منحشم ، مرة جبدتلها على راجلي الثاني الي ديما يروح سكران يعطيني طريحة من غير سبب ،ويغتصبني ويقذف فيا ويرقد ، وبديت نبكي وانا في هاك الهيستيريا ،تقوم من كرسيها وتجيني تحملني ،تحتويني تطبطب على صدري، وتخرسني بين ظلوعها وتمسح على شعري ،وتبوسني وتقلي هدي روحك مثمى حتى شي يستحق تبكي عليه ، نهدى ونشرب من دبوزة الماء ، وتعطيني بايي مشوار وتقلي كملي ، وفما مرة حشمت منها وقت حكيتلها الي انا شاهية راجل يحسسني بوجودي،راجل موش وحش يفرغ فيا شهوتي ويغرس قضيبو فيا بالعنف ،  وباعد يطفيلي سيڨاروه في افخاذي ، راجل يشهيني ، يرويني ،ومن ماه يسقسني ،ومن فمو يعطيني ،ومن قلبو يحنني ، يلصقني لسدرو وقت تبرد الدنيا ، ويهديلي نوار ، وروب حمراء ، وتتعشى انا وياه لبرا في راستوران هادي في حلق الواد ونختموها بنومة على الشط وعلاش لا نسكرو لين يهزنا النوم، واحنا متلكمتين محملين بعضنا متدفين برواحنا برك  ،انا الشراب منحبوش اما وقت يظهرلي باش نشرب لازم نعمل دبوزة ونعوم بيه نحسو يشيخني ،ويخرجني من قشرتي وانا فديت من القالب متاع المراة المسؤولة، نحب نتحرر ونخرج العار ونميل على السطر الي سطروهولي .

كمال قعد يخزرلي وقت انا كنت نقرى ونتصفح في مجلة سيدتي،كنت لابسة روبة كحلة قصيرة، ومحزوقة علي ومبينتلي سدري وانا لابسة بوصطو بالوڨاف شاريتو من سوق الملاسين الي يقلك ب 5 الاف والراجل وقتها غمزتو وخلاهولي ب 3 الاف وحط ورقة صغيرة فيها نومروه ، السواقة متاع تونس يفرحو بالكليون ، ومضبيهم ناس لكل تشري اما يشحطو في السوم الا انا يعملولي سوم سبيسيال خاطر نعرف داهم شنوا ،وانا من الناس الي منعرش  عيني كبيرة والا لا ، اما انا  مناخذ كان من سوق الملاسين والا باب الفلة والا من نهج برشالونة ،وين اكا النصب بو دينار ، نحس روحي بين الشعب التونسي العظيم الي يعيش كل وقت ووقتو ، شعبنا مجاهد وبالاخص بعد الثورة نرمالمون يظربو بينا المثل في التضحية والكفاح والصدق والصبر ،وديما نقولو ربي يجريها على صلاح  ،

افخاذي كانو وقتها بيض ،، يشهو ،منقين  بالسكر عملتهولي خالتي هنية حارزة  في حمام السلطان محلاها اكا المراة ملي نعرف خالتي هنية وهي تنقي وتسيق وتفتل وديما الفم يضحك والقلب يبكي ،وين نجي نعمل غسلة عندها تقولي محلاك ي طفلة ومعزك ، تذكرني بصغري وتقلي عرفتك جاية عمتلك شوية قارص وسكر وطيبتهم على الكانون باش السكر يجي طري كيما لحمتك وتنقيني من الفوق للوطة.

نولي شعرة لا ونشهي، صدري وافخاذي  مكبوسين ،وقتها قعد يخزرلي ، خزرة موش متاع شهوة،موش شهوة متاع يدخل قضيبو فيا ويفرغ قذارتو ويبعثني نشيط ويندم باعد ميفرغ ويعطني طريحة كيما رجالي الي عرست بيهم والا الي عطو على ساقيهم ومشاو وخلاوني، لا  ...

اما متاع حب، وولع ،واعجاب، وانبهار ،ومتاع قومة صباح معبية بالرومانسية والحب،و  موش متاع ندمة على عملت البارح التيتري ...

عينيه تسال شبيها ها المراة ، مزيانة سبحان من خلق ومن صور جاية لطبيبة نفسانية ،انا صحيح كبيرة في العمر اما لاهية بروحي ، نعمل السبور ونقي ديما، ونبدل صبغتي  كل شهر ،وكل مرة لون .

مرة منيرة مرت محمد الحجام سالت جارتي قتلها اخي لباس اكا المراة ديما بلون كيف ام البوية وانا كي جات قتلي جارتي بقيت نضحك وممكن فرحت .خاطر انا نفرح كي نسمع هكا .خاطر في عمري   معروف على العبد يرزن، وتقل شهاويه ، ويبدا يعزعز ومضبيه بعد السبوعي يرقد طول .

اما انا كي الفرس المسيبة والمڨطعة الرباط، نلب من بلاصة لبلاصة ، ومتمردة على العرف والعادات والتقاليد
،نوزن ماكلتي ،ومنكلش العجين،  ونكحل ،ونغبر، ونسوك وعندي هواية الرقص الشرقي ، كيف نحط الغناء ونلبس اكا الشقاشق متاع المصاروة الي يرقصو بيهم الراقصات المصريات، ونبدى نميل نحس روحي نطير ، وانا بالنسبة ليا الي الرقص الشرقي يزين المراة ويعطيها الغمزة واللزة والدزة ،ويعطيها انوثة وحنانة وحلاوة ويحسسها بوجودها وانا نحس اكاكا بضبط ، كينو زطلة حصيلو كل نهار سبت لعشية ماهو الاولاد نبعثهم لدار بوهم يبقو معاه وانا نحظر قعدتي وكاسي هو جليسي ، ونحط الغناء الشرقي ونبدا نميل ونتمايل ونرقص لين نطيح في فرشي والعرق من كرومتي يشرتل ،نتفرهد برشة ونسلبس ونتكبس وفي لحظة نرجع للدنيا وباعد نعاود نتخمر .

اما لشكون نحمر، وندبغ ، عشت بمقولة "لشكون تحمر ي مرت الاعمى" ..

اما كمال حسسني الي انا موجودة ومزال في بدني ميتشاف وفي زين ما يتعشق ،وفي روحي منوري وفي بدني منعري  ،بقيت مركزة مع المجلة وقلبي معاه وندعي لربي باش يكلمني والا يهمسلي ، يمسني ويتحسسني ويغرق فيا، ومن عرقو يعطيني ويكويني ويعطيني الكية ،

وقت جاء دوري باش ندخل نقابل  الدكتورة، قمت من بلاصتي ،  تنهدت تنهيدة  متاع اغراء ، حسيتو ترج بالاخص وانا صوتي حنين،خفيف والسر يقطر منو ،   ويحرك غريزة اي راجل ، وكيف مشيت وليت نمشي بالشوية وبالفيانة وبالدلال ونتدرج ..

وكملت مع الدكتورة وحكينا اما مكنتش مركزة معاها ، كنت مركزة معا خيالو الي قعد يرڨص مع افكاري في الصالصة ،
زين كبوطو وصباتو ولحيتو المسيبة  ومرياتو  ولون عينية وبيوضيت سنيه ،
خلصت السيكريتارة ورميت عوينة على الصال متاع الانتظار ريتو ، جسيتو ، حسيتو ، وشميت ريحتو ، في سوڤوندة عنقتو ، وخذيت شفتو ومصيت منها ، ولحست رقبتو وتسيبت عليه هنتشتو ،مشمشتو، ولكلكتو ومصيتو  حملتو وغرست فيه اضفاري  ورقدت .

ومفيقني من منامتي كان غمزتو وقتها حسيت بروحي صنصرت ،  ذبت ، في حبو تعميت ،  ومن ماء السماء تبليت في بلاصتي ،
حسيت روحي طرت وانا مكنتش من المعاكسين وتبسمتلو ،بسمة متاع تزعبينة ، متاع اغراء ، وتبهنيسة ومتاع شهوة و تحدينسة  ،وشفة وترتيحة وتخلخيلة ،وترهويجة ، وتقهويجة .

وقف و وحسيتو صارلو انتصاب فوضوي وانا خليتو في نارو ومشيت وانا قلبي وجعني .

هبطط في الاسنسور مكوخرة،  وريحة  البرفان خدرت مخي ، وه شبيني هكا وليت نتصرف ،موش كويت روحي بمنجل خالتي هنية اني معادش يلعبني حتى راجل ، مخيبو الحب في الاول يبدا محلاه ، يطيرك ،ويحسسك بالسعادة ، وتلقاك تحب الدنيا وتعشقها ، وتبات تحلم وحتى النوم يجيك بلا متستدعاه ، ترجعلك شاهيتك للماكلة وتبدا سعيد وفرحان وتطير مع الطيور وتسابق النجوم ، وتزهر مع الزهور ،وتنبت مع السبول الي في الحقول ، الحب يشبه للدنيا ، ي يخدرك ، ي يرتحك ، ي يداويك ، ي يقتلك ،ي يطمنك ، ي يشويك ، ي يفرحك ، ي يكويك وفي زين  روحك  ينسيك ويخليك جهتمة تمشي على الارض وتررن وتثقل وتتعب وبو تليس يرڨد على كرايمك ومضبيك متقومش من فراشك ومتقابل حد ، المدة لولة صعيبة وباعد تبرد ويا عزوزة ميهما ڨرص .
ويبدا يقل بالشوية بشوية لين يمساط ، ويبرد ، ويخياب ، وباعد يوفى وتتهد وتبقى تعاني في سيكاتريز متاع عشقة قديمة وتنوح كي الخنساء .

نزلت في الايطاج لول ومنعرفش على روحي كيفاش هبطط اكبراس كحلة ب زوز طوابع سكر ، وبقيت نخزرلو من قدام الكافيتيريا الي مقابلة العمارة الي فيها كابينيي مدام اروى ، وانا هكاكا دايخة في حبو ،  طل ومحلى طلتو،   ومذخم لبستو،  ومبهى  كبوطو  طويل احكل،  وسروال دجين ازرق غامق  ،وولابس  طربوش الي يلبسوها الطلاين زادت فيه الشطر ،  

عمرو في الاربعينات يعملل اكاكا  ، شعرو فيه شعرات شيب اما اكحل وحرير  مسبسب كشعر النعام ، وفمو مصور بالاحمر ، وشادد كتاب في ايدو ، يظهرلي متاع كفاحي" لهتلر " ، وانا مكافحتش عشقي ليه ..
شاق الكياس وانا شجاعتي وقوتي غلبتني وقتلو هانى هنا ،جاني ومحلى البرفان متاعو كي عاودت شميتها.

كبست روحي و مديتلو ايدي


سارة :أستاذة جامعية بكلية تونس.

كمال : رسام وشاعر .

مرحبا ميسو تفضل :

اكسبراس كحلة زوز طوابع سكر

عملت روحي مفيبالي بشي ، قلت بالك صدفة كي هبط كيفي ، حكينا حكايات باردين ، متاع لباس القراية ، وحكينا على تونس ، واخر موضوع جبدهولي قالي حابب نتعشى معاك ،
وانا منغير مخممت قتلو لا ، منجمش ،
حسيتو تنبز وانا سكتت وبات الحس درج بيناتنا
نوقز تليفونو وقالي هيا نقومو .
قتلو هيا
قالي نوصلك
قتلو بالك عندك متعمل
قالي لا ، هاك في ثنيتي
مشينا ،كرهبتو عادية متوسطة ، اما الي حلاها وقت سبقني وحلي الباب، ودور المفتاح وخدمت الغناية الي كان يسمع فيها ، ام كلثوم تتسلطن على غناية الحب وبالزهر دوبا مخرجنا جاء المقطع الي  تغني فيه  " الحبي كلو حبيتو فيك ،الحب كلو ، وزماني كلو انا عشتو لييك ، زماني كلو ، حبيبي اه من حبيبي ،"وانا هكاكا يمد ايديه ويبوسني منها ويقولي عجباتك الغناية ، محلى صوتك وانت تغني ، وانا حشمت ، خاطر مفقتش بروحي وانا تسيبت فيا اكا الطفلة الصغيرة ، وام كلثوم الي تنسلطن على غنياتها ، نحسها عزاء للشعوب ، وعزاء لينا نحناا الناس الي تعاني ونساتنا الاغاني والمنامة ، ام كلثوم عرتنا ،وغطتنا ،  بكات معانا وعزتنا، سهرت وبقات معانا لوجوه الصباح ، واستنا ومتقلقتش منا ، قعدت تسمع في خنارنا وفي تمخيطط خشومتنا ، وعياطنا وسبانا اخر كاس ، خدرتنا لين رقدنا ونسينا وممكن بردنا ، وانا من الناس الي تعشق ام كلثوم ، وتعشق كل حرف من حروفها ،
قتلو اي محلاك ، قصدي محلاك انت خاطرك تسمع في ام كلثوم ،

سكت ، سكت وقالي انا منحبش نمشي للامسية متاع الشعر ، نحب نمشي نسكر على البحر ، خخمت شوية قتلو اعطيني تليفونك ، طلبت رقم امي وقتلها هز "شهم"   و"افيان "عندك ، انا ماشية حذا صاحبتي توا في ليل والا غدوة صباح نتعدالكم. مزالت تتكلم وانا علقت التليفون ومشينا , من غير مقتلو شي فهمني الي جعت ، هطبتت حوت

وفريت وسلاطة مشوية بالتن والزيتون والكبار والقارص عصرتو على الحوت وجات تسطيرة تقتل ،
فطرنا وحبس قدام الحماص خذا باكو ليجار ، و 3 الاف قلوب بيضة ، وفي نص ساعة منعرش كيفاش وصلنا لشط المرسى ، الحال بدات الدنيا تغيم والبحر يفرغ والشمس بدات تغرب ،ونسمة البحر وهواها رتحتني ، عاللخر والحال اخر سبتمبر والعوانة تقل ،كان الزوفر ماشية جاية  ، الشتوية على الابواب ، انا نموت عليه الطقس كي هكا نحسو رومنسي ، شاعري ،وميعرف كارو كان الناس العشاقة ، والناس الحزينة والعميقة ، وانا حزينة وظنيت اني عشقتو ، تكيت على صدرو وبدا يلعبلي بشعري ، ڨرست نحا كبوطو وحطو على اكتافي ، وبقينا زوز زهاميل في شط فارغ ، والحال  دنيا ظلمة ، حسبنا النجوم بالكعبة لين تغلطنا نجمة مرينهاش والا ظهرت جديدة ، وسالتو قتلو بلحق ، النجوم هوما عدد الموتى الي خلاونا ومشاو ؟ ضحك وباسني، الجو كان هادي ،والموجة وراء الموجة تتطلاطخ ،وانا نتطلاطخ بين قلبي وعقلي ، نمشي معاه لبرتمانو والا نروح لصغاري ، خاطر لمحلي على سهرية في دارو  ، وانا تخمرت بالشراب و مضبيا منبات كان في حضنو ،ومنشبع كان من ريقو ، وحسيت روحي اشتهيتو ونڨزت عليه بستو من شفتو ، حشمت ، وتصدمت من روحي وتخبيت عندو وحسبت خدودي حمارو ووذنيا سخانو ، وتخبيت عندو لين معادش نبان .
ويعمل هكا وينوقز تليفونو ، ومنسمع كان صوت مراة تقولو وينك شبيك لتوا لا جيت ،وانا اصنصرت وتصدمت ،وحسيت الدنيا دارت بيا وتراجيت ، ومضبيا في الوقت اذاكا الارض تتحل وتبلعني ، قمت من بلاصتي شدني وقتلو سيبني وعيطتت عليه ، ياخي شداني وبالقوي غرس راسو بين ظلوعي وقالي  ،