Notice: Undefined variable: relatedArticlesCount in /home1/datalyz/public_html/tounsia/plugins/content/tags.php on line 149
يا مبدّلْ محبّهْ بمحبّهْ …
Cyrine Soussi - سيرين السوسي- آشْ اللّي بدّلكْ يا بنيّهْ؟
و آشْ اللّي طفّى لهفتكْ و زرعني في بلاصة النّوارْ شوكْ ثنيّهْ ؟
و آشْ اللّي ڤسّى طينتكْ و رصّْ فوڤ خيالي صخْرهْ و نسّاك فيّا ؟
و آشْ اللّي وطّاني في كنينكْ و علاّك عليّا ؟
و آشْ اللّي ڤصّبْ محبّتكّ ليّا مِنْ ريحةْ الصّبحيّهْ ؟
- آشْ اللّي بدّلكْ يا ولدْ ؟
و آشْ اللّي فيّضْ الوادْ مِنْ ڤلّةْ الصّبْرْ و طيّحْ اللّيلْ فوڤْ كفّْ اليدْ ؟
و آشْ اللّي صبّحْ سورْ محبّتكْ خايخْ و بكلْمةْ سَو غُضبانهْ يتهدّْ؟
و آشْ اللّي قطعْ صرّتكْ على مرارْ المرّهْ و قامْ على عشرتْنا الحدّْ ؟
و آشْ اللّي خلّا البومْ غرّادْ يحومْ في غوابي الڤدّْ ؟
- آشْ اللّي بدّلكْ يا بنيّهْ؟
و آشْ اللّي غَيَّرْ عليكْ شفْري ،يا ولفي ، مالبكريّهْ ؟
و آشْ اللّي غرّبْ في كنينكْ شمسي و نكّرْ ڤلبكْ فيّا ؟
و آشْ اللّي شيّحْ في رواريك نفسْ نفختُو فيك مرّه عشيّهْ ؟
و آشْ اللّي ثكّلْ فرحتي بجمعتْنا و يتّمْ السرّْ في عينينْ صبيّهْ ؟
- آشْ اللّي بدّلكْ يا ولدْ ؟
و آشْ اللّي لذعْ كنينْ المحبوبْ و ليّثْ الرّيحانهْ بجروحْ ما تتعدّْ ؟
و آشْ اللّي وحّشْ غيمكْ و عجّجْ دموعْ الخدّْ ؟
و آشْ اللّي نكّر الصَّيْد في اللبّهْ ساعةْ جدّْ ؟
و آشْ اللّي طوّف الشّمْسْ بالڤمْرهْ و عصرْ مِنْ غليلكْ زبدْ ؟
- آشْ اللّي بدّلكْ يا بنيّهْ؟
و آشْ اللّي ذبّلْ في طلّتكْ فلّهْ كانتْ ، يا حسْرهْ ، ليّا ؟
و آشْ اللّي هوّنْ سڤو محاينكْ مِنْ مطْرةْ عينيًّا ؟
و آشْ اللّي جفّلْ اللّيلْ في غريڤو مِنْ نجمتو المضويّهْ ؟
و آشْ اللّي نسّاكْ ثنيّةْ البابْ و مباتْنا في الوسطيّهْ ؟
و آشْ اللّي بدّلكْ يا بنيّهْ ؟
- آشْ اللّي بدّلكْ يا ولدْ ؟
و آشْ اللّي خلّا صوتكْ مذْبالْ ما يدري يردّْ ؟
و آشْ اللّي بحّحْ حسّي في ضحكتكْ و لغيرْ هذْبي ڤلبكْ ودّْ ؟
و آشْ اللّي هوّمكْ في الضّحضاحْ بعْدْ سعدْ ؟
و آشْ اللّي نسّاكْ المباتْ عنْدي ليلةْ كلّ أحدْ ؟
آشْ اللّي بدّلكْ يا ولدْ ؟
سيرين السوسي
Website Design Brisbane
Tags: