يا ريت نجموا نحرقوا الحاجات لي يقعدوا في الذاكرة، نتخلصوا منهم و ننساوهم..

يا ريت كي نحبوا انسان نحبوه هو كهو و ما نحبوش الحاجات اللي دايرين بيه و الحاجات اللي يخصوه..

اصعب حاجة انك تنسى.. و اكبر كذبة تو تكبر و تنسى

تنجم تحرق تصاور عملتهم مع انسان عشقتو اما مستحيل تنجم تحرق البلايص اللي عملتوا فيهم هاك التصاور..

تنجم تفسخ كلام حكيتوه اما مستحيل تنجم تفسخ ريحة برفان تنفستها و لا خزرة عين لمحتها.. عادي تمشي فالشارع و انت تحاول تنسى و تشم ريحة برفان ترجعك للدرجة صفر تضربك بكف تقلك ماكش شتنجم منغير ما تعب روحك.. عادي زادا تشوف خيال يمشي قدامك تجري باش تتأكد تلقاه مش هو، تطلب السماح و ترجع الدموع مالية عينيك..

مهما تحاول تبعد على طريق تعديتوه مع بعضكم باش تلقى اللي كل خطوة تخطيها هي ذكرى مع الانسان هذاك بالذات..

تنجم فالليل و انت تحاول ترقد بلاش تخمام، تجي على بالك غناية تحط تسمعها تلقى حتى الكلام يحكيك و يذكرك بيه.. تقص عليها و تجبد تقرا كتاب، اول مقطع تقراه يذكرك بيه كاينو جواب..

تتأفف و ترمي الرواية، تكلم صاحبتك تقلها امان احكيلي حكاية.. تبدا هي تحكي و تروي قصة لا ليها بداية و لا نهاية .. اما حتى و هي تحكي لا انت معاها و لا مركزة تسمعها.. مخك رجع بيك لتالي، تبعث لصاحبتك تقلها تعرف شنو جا على بالي؟؟ تقلك اكيد هاك الانسان العزيز الغالي..

ريت كيفاه؟؟ حتى الناس لي يعرفوك بيه يذكروك و انت اكيد وقتها قاعدة تحاول تنسى .. وقتها تقلها هاني باش نرقد اما انت وقتها تحب تهرب، قبل لا تهبط الدمعة و النور من عينيك يُغْرب..