نحبّكْ كي تضحكْ قدّامي و إنْت هاززْ على كتافكْ حملْ جبلْ ،

نحبّكْ كي تدرّقْ عليّا محاينكْ باشْ ما تحيّرْنيشْ و إنْت هرّاتكْ الوقْفهْ قدّامْ التّعبْ ،

نحبّكْ كي تحكيلي بتنهيدةْ عينيكْ قدّاشْ ماخو في خاطركْ مالدّنيا و تهربْ منْها لصدْري ،

نحبّكْ كي تتواحشْني وسطْ مشاغلكْ و ما نضيعْ على بالكْ حتّى تنْفيسهْ ،

نحبّكْ كي تبدّلْ سمايلكْ الواعرهْ بصمايلْ مسرارهْ و تضمّني تحْتْ جناحكْ و نطيرو من سواني محاينكْ ،

نحبّكْ كي تراني الدّنيا اللي بيها و ليها عايشْ ،

نحبّكْ كي يشامي عليكْ الوطى متشمّتْ و إنْت تعنكشْ في السّما و تطلعلْها و يدّي في يدّك ،

نحبّكْ كي تخيّطني ليكْ بتعنيقهْ تخبّلّْ جواجيّا ،

نحبّكْ كي نقلّك نحبّكْ و بغزْرهْ بريحةْ البنّْ المعتّقْ تقلّي " زيدْني منْها" ،

نحبّكْ كي تغْمزْ قلْبي بالنّفسْ و تزيلْفو كالشمعةْ إذا حدّْ غلطْ و مسّها حتّى بطرْطوشهْ ،

نحبّكْ كي جرْحْ الفلّهْ يتداوى على كتْفي برفّهْ ،

نحبّكْ كي نحيّرْ فيكْ صغْركْ و ترجعْ في عينيّا في قماطكْ و نكتبكْ على وراقْ بيضْ ،

نحبّكْ كي يفيقْ في وسطكْ كلامْ يمهمشْ اللّسانْ و الوذنْ و يضيعْ في الثنيّهْ ،

نحبّكْ كي نقلّكْ تاجْ راسي و إنْت تناديني "المسميّهْ" ، نحبّكْ كيفْ تحوزْني و تمكنّي و تهفْهفْ فيّا شقاكْ المخبّي . نحبّكْ قدّْ التّعبْ ،

نحبّكْ قَدْ ما تطوّحْ بالحبّْ في الكتبْ ،

نحبّكْ حبّْ لعّابْ ،

نحبّكْ حبّْ مبدّعْ منْ زمانْ الغفلهْ ؛ زمانْ الزّهْو و الطّربْ و تصاورْ الأبيضْ و أكحلْ ، و زلاّط المدبيّهْ ، و التّشيطينْ ،

نحبّكْ حبّْ مڤدي و مڤدودْ ، مترشّقْ و مرشوقْ ، حامي و دامي ، يفحْفحْ بروايحْ الفجاري و البكريّهْ و تشيطينْ الشّميسهْ عڤْبْ عشيّهْ ..

نحبّكْ يا درّي ، يا ضو في الكنين مرشوق ومخبي..