نجم نفرح؟ نجم في ليلة معتمة نتوسد ورد خديك ونفرح، نجم كيف يغيب لقمر وتدحس الدنيا نضوي بنور عينيك ونفرح؟ نجم في غفلة من وجيعة الدنيا ننسى همك وفي جناين محبتك نزهر نواري ؟

قلي, نجم نضحك؟ وفي وسط غبينتي بيك ندفن تعذيبي ، نرسم على شفايفي المذبالة تبسيمة من الغريبة تضحك؟ نجم ننسى مرة أخبار اليوم، وهموم اليوم، والشمس إلي ممكن تضيع ثنيتها وسط الغيوم ,وتنسى من حيرتي وحيرتها تغرب ولا تشرق؟

نجم نحرق دفاتري وكتباتي وكوم الجرايد الفايحة بريحة الدمومات تعترتق،ونحل في بلاصتهم أجندة عينيك ، نتصفحها ورقة ورقة , وبغصة الكتيبة الحروف في حلقي تشرق؟

نجم نحلك أبواب قلبي ونتعرى قدامك من غير ما نخاف ؟

نوريك الغولة إلي مخبين في سرادب دفينة، ونفرجك على كل تركينة  وتركينة،نشدك من يدك و ندولشك  في وسط أفكاري، ونقلك كل ما يجي في بالي ، نحكيلك إلي نخاف نحكيه بيني وبين روحي ونوريك دماملي وجروحي ؛نوريك الوجه لاخر ، ونسمعك  ألحان الزنايز إلي كل يوم تعوي بنوحي . نجم نحكيلك حكايات صغري ، وخرافات منامي : الأميرة والتفاح المسموم، ما تقومها كان بوسة من حبيبها المغروم، وأليس إلي ضاعت في بلد العجايب وفي وسط بحر بلا قرار هبطت تعوم، وإلا لخرة الي عشقت في أم قرقر بو بلعوم؛نوليلك شهرزاد وإنت سلطان بحكايتي مفتون ، ونهارت إلي توفى الهدرة ،ميسالش أنصبلي المشانق ، وخلي قلبي في يم الحكاية غارق! نجم نضيع معاك في مدينة بلا طريق، نهج معاك للبر الخالي وين الموج يلثم عينين السماء، نضيعوا في الهبلة زوز مجانين ، هزتهم الثملة مع نغم بنين، زعمة توفى السكرة ونفيقو الثنين  ؟ وإلا تتمدد يا ولفي الحلمة ونقعدو في ضبابها ساهين؟كانك عليا ، حلفتك ما تفيقنيش، خليني نخرج من قالبي و في هلحلمة نعيش  ! خليني مرة بغرامك نجن ، فماشي ما صخر قلبك مرة عليا يروف ويحن!

نجم نفرفط من عشقي فيك، نطير لفووووق ونسيب روحي, وكيف نطيح نلقى ذراعك مطوقني، وكتفك ساندني؟ نجم نمشي معاك في زناقي ما نعرفهمش ، نحط على عينيا عصابة ، ونتبع جرتك ؛ ونزور معاك البلدان إلي مازلت ما ريتهمش، وفي بر الروامة نتخمر أنا وياك على النوبة، ونضرب سناجق المحبة، ونوليو بدعة ؛ وفي بلاصة نتفرجو على  بلادهم، نهزو نحن بلادنا في كفوفنا يتفرجو عليها في محلهم، ويشهلو في لمعة عينيك ورمان شفايفك، و يضيعو في وسط خطوط يدك...

نجم نصورك في خيالي ونعمل فيك إلي نشتها ويحلالي؟ نجم نفصلك على قياسي ، ونتلحف ضحكتك غطايا ولباسي؟

نجم نحلم بيك في كل منامة، ونهلوس بيك كيف نتعل، واسمك ما يفارق ذكرو شفايفي وحروفك بيها الريق يتبل؟ نجم نرجع معاك صغيرة ونتربى على ايديك،  ونرجع العمر إلي تسرق مني معاك؟

ندرجح في حبال هواك، ونحلف كل ساعة على جفاك، نتنفسك كيف النفس يثقل في صدري، ونترنم بحروف اسمك في سري وجهري! انجم نعبد حبك عبادة ، ومحبتنا تولي القبلة والشهادة ؟ انجم نكفر بالمسافات إلي تبعدنا، و نلعن الفرقة إلي تعذبنا؟ انجم نحلف بعينيك، ونصلي في محراب المحبة، وخلي أهلي واماليا يكفروني ، ويصلبوني من الغلبة!