Nadia El Ouni - نادية العوني

سبحتها في يدها وفمها تمتام عيناها سارحة أما مخها خدّام ... بنت منجية إلي عرضتني في الثنية ولا إنصاف بنت للَّاتهم حتى هكي مش دونية أما للاتهم ماضية وموذِيَّة ومنجية حدها حد روحا مرا زوّالية ... إيه إما إنصاف بَيْضه وعيناها شهل وبنت منجية بحال فما عين متراش باها بالكل... لَمْكِنْتِي أمي الله يرحمها كانت تقلي ما يعمى مومن كان ما قلبو يمِل ...


بنت منجية حاذقة ومڨدية ريحة طعامها يجيب لاخر الثنية ... في عرس خوها هي إلي حلت قصعة البقلاوة ... وهي بقلاوة!! ... لتوى مطعمها بين سنايا ... كي نِفْست هادية بنت بكِير هي إلي قامت بها وعملتلها البسيسة والزرير ... وهو زرير !!!

... خمسة و خميس ... ويدات يتلفوا في لحرير ... وفوق هذا ودونو ما يقصدها حد إلا وتقضيلو شورو ... حدها حد عتبة الدار تفوتها يخطفها بالوقت الردار... آاه راجل منجية ياسر حزار ... فاق بتوفيق ولد حليمة يتڨ من شق فالدار لهّم في نصبتو النار رصاتلو مسيكن يجي شهر بطّال ... هذاك هُو ... عندو الحق... إلي يسكت على شرفو يتوسّم العار ... وإلي عندو جوهرة يخفاها علانظار ...


لمكنتي والحق يتقال الطفلة مش مِكْلمَة خلاص وكان تكلمت تجي تقول صحة تقول سدّاف ... ملايكتها رزينة وما فماش في وجها اثرة الزينة... ما تعرف مالدنيا كان الكوجينة ... لا تعلمت لا قرات و مالدنيا شي ما رات ... لا فهامة لا ظرافة ... شنعمل بالنظافة !! والأهم من هذا الكل الطفلة من صغرها عكروتة أمها مستخسرة فاها مالذهب بلُّوطة !!


يا حسرة على إنصاف عاد ڨد وزين وبها عينين تقول للڨمرة أنا فين وإنت فين ! لسانها يقطر عسل ... مل قعدة معاها لا تكل لا تمل... فيانة وخفة ظل ... يكمل عل الام إلي جابت... صابت ما خابت .... شهايدها مزينين حيوط الدار ...


لمكنتي الحق يتقال لا يعجبك نوار دفلة في الواد عامل ظلايل ولا يعجبك زين طفلة حتى تشوف الفعايل .... خديجة خالتها قتلي قليلة الدبارة ورايها عادم نخاف ياخذها وليدي يضحى نادم ... الطفلة إلي تعديه في الشارع أكثر ملي تعديه في الدار ... شنعمل بالفهامة والطفلة عل القهاوي خرار مرار ؟ أمي الله يرحمها كانت تقلي قرد موالف ولا غزال شرود .... والطفلة كاينهي شاردة بشهادة إلشهود !! والاهم من هذا الكل الطفلة من صغرها عندها ملقطاطس حساسية .


لا لا ولدي يستاهل ما خير ! يا حسرة على ولدي عاد ! ولدي خيار الناس صحيح قصير وفرطاس ... بطال وكان خدم في المواسم خمّاس ... هامل شوية إما بنت أمها تردو للثنية ... ما ينتقش الر والس والت ... عاد شبيه بنت أمها تفهموا عالرمش ...


ميراش بالباهي لا لا مش ناقص الحكاية الكل شوية عمش... يساري أما ياكل بالامين .... صعيب ونرفوزي إما بعد كويسين يولي حنين... لا عندو لا هملة لا سيبة أما يكفر بريحة النسيبة ... عاد شبيه بنت أمها مِنْجالو تنسى أمها... رزين ومخو يوزن بلاد الفايدة إلي يقول هو مبروك ومن غير عناد... أكحل فحم أما يجيب الخبز واللحم ... عاد شبيه بنت أمها مالهنا تضويه ... ولدي مازل صغير لربعين عامل .. فيها عويمين ... في عقلو لين يلقى بنت أمها إلي تملي العين ... هذا ودونو الراجل راجل... ما يتعابش

...