كيف نثور في فكري نجري للورقة والقلم نستنزف من روحي ونجبد حروفي من الدم لسان مطلوق مرة نشكر ومرات بيه نذم ، قلب لا يسكت كي يفرح ولا كيف يكثر عليه الهم ديمة حلمتي نصورها بحروفي وما عندي ونيس كان الورقة والقلم ..

نكتب علا روحي ودنيتي ومشاكلي وولد العم ، نصور بيهم عشقتي و نعلي بيهم الصوت لي تكتم , معاهم ما نسكتش عالعوج و نجريلهم كيف يكبر بيا الهم .. الورقة والقلم حبهم كبير، و هوما سراوْ فيا و عششولي في العظم ، علا هواهم عمري ما نندم ، يونسوني و يجليو عليا الغم ،

كلام صادق خارج من القلب ويترجمو الفم وقد ما نحكيلك عمرك ما بش تفهم .... خليني نعبر بيهم يحبوني وانا نخاف عليهم هونا لحني وانا فنانة ونعزف بيهم ، الغرام لكلو توة ليهم ، والناس خليهم يقولو عليا مهبولة شيهمني فيهم .. عشقة صادقة متخونش وقد ما تطوال ... الورقة والقلم هونا ليا وانا ليهم ...