Notice: Undefined variable: relatedArticlesCount in /home1/datalyz/public_html/tounsia/plugins/content/tags.php on line 149
كلو عادي
Nadia El Ouni - نادية العونيطبيعة
و كاينة فينا
...حَبْكِة خيط في ماكينة
دايمَة و الدّوَام للَّه
و للقاضِيَة مالعِلَّة...
مالكة و مملوكة
لا متسلّفة و لا متروكة...
تعاشر العبد و السٍّيد ...
كل سيد و ليه سيد...
كاينة فينا
كيما اللِّي لينا مش لينا
و كان حلا في عينينا...
كيما اللِّي فينا اما علينا
و كيما اللي لا منا لا لينا
اما تقول عقاب والينا ...
اما مش كل والي مسؤول
و مش مع كل عين ترا ، فم يقول ...
فينا
اما باقي الملام علينا...
رضعناه كيما رَضْعوه والدينا...
منا الي فَطْموه على بِكْري
و منا الي رضع مالكوش للجِبَّة العَكري...
عظامو مِتنِت و عودو قام
اما خسارة اللسان مافيشي عظام...
تربينا على يزي حرام ..
على ريض اركح قدِّر
لا تجري لا تلهث مكتوبك مسَطِّر
تربينا على احشم مش مليح ..
على الكبير ديما رايو الصحيح
على الحق غالي و الحال شحيح
تربينا على الواجب
على العين ما تعلى عالحاجب
و كان علات
نحُّو حاجب و نعلُّو حاجب
و نغمظوا العينين
ماو يا تغمظهم الاثنين
يا تِلْجِم الفم
و تسِبْ الجد و البو و الام ...
تربينا على الفم المغلوق
على اللسان الطويل عقوق
قص الراس تنشف العروق ...
تربينا على هزان القفاف
الظهر تقوِّس و الحمِل بالعادة خْفاف
تربينا على السكات من ذهب
أول مِن ينطق اول مِن يتسَبْ
تربينا على بوس الايادي
على الهِمَّة لِبْسِة عَيَّادي
على الكلب يوَلِّي سيد...
و عادي ..
عادي الحق يولي مزيَّة ..
عادي تنْداس تبدِّل الثنية ...
عادي توَطِّي و تسَاسِي و انت صاحب حق
عادي البكوش مرتاح و انت بكلمتك تتخنق
و عادي ...
عادي
كلو عادي
بقلم نادية العوني
Website Design Brisbane
Tags: