كلامي هذا لبرشة بنيّات كي حبو فيبالهم الدنيا زهات غرو بيهم ولاد الحرام لي ميعرفوش معنا الحب والغرام ، حسبوهم رجال طلعولكم كمشة وليدات ... كلامي هذا مش بش يكون لا شعر ولا موزون هذا كلام من القلب مني ليكم انا لي كيفكم تكويت بالحب عشت تجربة والسعد فيها تكب طلعت مصددة وانا كنت نرا فيها حكاية الوهج متاعها يلمع اكثر من الذهب !

كلنا حبينا وسهرنا الليل ، بكينا ودموعنا غرقت المخدة القلب بات حاير ومهموم يخمم في هالحال زعمة فاني ولا يدوم كلينا الكفوف تصدمنا تقهرنا تعذبنا وتمرجنا اي مالا فيبالك عيب ؟ شبيك تتحسر و حاشمة ؟

اي شبيه هز راسك لفوق عيط صيح فرغ قلبك قول راني حبيت وتغدرت ولا عشقت لي ما يستاهلنيش هذي دنيا مهيش جنة واحنا تخلقنا فيها بش نجربو و نفهمو مع كل حكاية نكبرو اكثر ونفهمو الدوالب كيفاه تدور ،

راك طفلة مهما كانت صفاتك انت بنينة و كلك عسول علاش تيكي علا فراقو وانت بقوتك تنجم تركبلو الغزّول ؟؟؟

نحبك قوية مش بوهالية نحبك تخمم ديمة لي انت عزيزة مكش دونية عيش حب افرح خل جناحاتك للدنيا كون ايجابية ومن عجزك اصنع قوة ومن طريقو لي تسكر قدامك حل الف ثنية انت لي فنيت عمرك معاه و حرمت من هواك الف راجل يتمناك و يطلب في رضاك !

بكيت ونوحت يزي فك هو عايش حياتو وسارقلك حياتك متمتع بيها اقهرو واعفس علا كبريايو تو هو وقتها يتوجع الحزن عمرو ماكان ينفع اقف لروحك شوف زينك في المراية اصنع من بكاك ضحكة و خليه يشرفك بعينو متهنية كون مرا كون انت حقق احلامك و طموحاتك اصنع دنيتك لي ديمة تحلم بيها الدنيا مهيش راجل كهو الدنيا فن وغرام وايام حلوة و بلاصة راقية بين الناس فكر عالي وتخمام يحبب فيك خلقك ربي ويخلي لي يرلك ليه وحدو يتمناك

كون عزيزة وما تعطيش للذل كارو ما تكبتش روحك لي في مخك قولو و عبر اعمل لروحك دنيا راس مالها انت مش راجل يحكم في ضحكتك و دموعك وقتاش هذا كلام متي ليكم لي توحعت كيفكم و داويت روحي بروحي ، وبيديا داويت ولميت جروحي

انا مرا قويّة انا زينة الدنيل وكيفي ما فماش انا وحدة غير ل انت عرفتها انا مرا قوية وانت توة ما تنجمهاش مرفرفة مجنحة طايرة لفوق وما نالفتش ورايا و خاطرني حاسة بيكم نحبكن توة كيفي فارحين ومتهنين الدنا قصيرة عيشها وما تضيعهاش تبكي علي ما يسواش ! فيق

بقلم خولة العياري