آسكت ، كلمة تتعاود في خيالي ، مالّلي رات عِينيَّا الضّو اللّي نشاميه يقولهالي ..

آسكت .. آٌشـشـش .. ما تحكيش .. ما تتكلمش و باللّي تعمل ما يـكفيش .. ديما ناقص ما يرضِّيش .. سكتوا هاك الصوت .. مهما تقوَّا عليك إدفنو في قلبك .. خلّيه بغصتو يموت ..

رد بالك تتكلم ، نحطولك في هاك الفم جمرة .. نكويوك بالنار اللي كي شفايفك حمرة ..

رد بالك نهار تركب راسك ، تعشق و تحب و تجيب العار لناسك ..

رد بالك تحّس ،  و يركبك الغلط من ساسِك لراسك ..

رد بالك يا مزيانة تهز عينيك فيه و إلا تحاذيه .. ما عليك كان تسلم أمرك ليه .. إي أذاكا اللّي حتى كان قلبك و روحك بعاد عليه  بدنك ملك إيديه ..

رد بالك تقلو لا .. ماكانش يجيك البلا .. و الّلي يصير فيك مش منو هوّا من صنع إيديك ..

إنت متاعوا ، وحدة من بين الاف بإسم الشرف تباعوا ..

هواّ اللي يختارك و يا ويلك كان يعرف خُنّارك .. و إلا قداش من مرة عتبت باب دارك ..

ماعندكش الحق .. أما هوا عندو الحق ..

و علاش ؟ ياخي موش تخلقت من نفس التراب اللي هوا منو تخلق ؟ ياخي اللي خلقوا علّاه عليا ؟ قَلُّو إنت الكل و بقيِتك هيّا .. ؟

شكونوا هوّا .. ماهو لحم و دمي كيفي كيفو ..

ياخي يتبدل يتشكِّل ، موش كيف صيفو كيف خريفو ؟

ياخي بالِكشي يقدر عاللي ما نقدرش عليه ..

بالكشي مكتوب عليا نشوف الدنيا بعينيه إسمي آسمو و نعيش حياتي ليه ..

ياخي علاش صوتي ما يطيقوش ؟ علاش كلامي ما يسمعوش و علاش فيبالو اللي يحسو هوا انا ما نحسوش ..

علاش تكتب عليا الشقا ، محرومة مالشمس و السماء  ..

علاش ما نجمش نصيح و نتنفس حتى شوية هواء ..

علاش هوا ديما يقدم و انا وراه ، ياخي موش بلاصتي بحذاه ؟

علاش هوا يعيش ، و أنا كيف نحاذيه يقلي يزي بلا طيش ..

علاش حلمتي قبل ما تكبر دفنوها .. و قاللولي أسكت .. آششش ما تحكيش .. راك مرا عيب ما يجيش ..دفنا العار .. و توا اللي صار صار ..

حد ما قلي راك غالية ما تبكيش .. نسمع كان في كلمة ما تحكيش ..

و كبرت ، و انا ساكتة ما نحكيش ..

و كلهم ععلاو عليا ، سماوني بوهالية ، خاطر عمري ما قلت علاش و لا كيفاش ..

خاطر حتى كيف رماوني للذيوبة ما وخرتهاش ..

باعوني ، و قالولي عطيناك بلاش ..

خاطر ما يجيش كيف هوا يقلي إيجا ما نمشيش ..

و حتى كان ماعينيش ، تا يقول هاذي ما تهنيش ..

و سكت ،و طال سكاتي .. و سماوني بوهالية ..

خذاولي حقي من بين يديا ، سرقولي الضو من عينيا ..

دفنوني و عيني حية ..

و مازلت ساكتة و ما نحكيش .. نخاف لا يقولو ما تهنيش و زيد .. راني مرا عيب و ما يجيش ..

لازمني نسكت ..  مالازمنيش نعيش ..