نحب نحكي نحب نتكلمْ نحب نعبرْ نحب نتالّمْ .. حب نخزرْ للدّنيا ونتعلّمْ، نحب نبكي و نشكي نحب نعلّي الصّوتْ ونبوح بهمّي قبل ما نتخنقْ ونموتْ ، قبل ما نتغبنْ و يفوت الفوتْ، قبل ما نتحطْ في لحودْ وتابوتْ

نحب نمشي تحت المطرْ ، نحب ندغدغْ موجات البحرْ ، والفت اللّيلْ والسّهرْ ، نحب حاجة تحلّيلي المرّْ وتنسيني الغبنة والقهرْ ، فدّيتْ من كلام الغيرْ ، نحبْ نرفرفْ ونطيرْ ، نحبْ نرّجعْ قلبي عصفورْ صغيرْ ، نحبْ نحسْ اللي في الدّنيا مازال فمّة الخير، نحبْ نبوحْ ونداوي الجروحْ، نحب نجدّدْ الروحْ

نحبْ ونحبْ ونحبْ ونسيتْ اللي المحبة ساسها كلامْ حاجة كلّها اوهامْ حسبتها يقظة طلعتْ منامْ فقتْ و كليتْ كفّْ كيفي كيفْ برشا دغفْ  فيبالي الدنيا ورديّة طلعت فيها الفْ ثنية كي قوسْ قزحْ كل طريقْ بلونْ اما لاففها السّوادْ يقولوا الدّنيا تبدّلت ونساوْ ظلم العبادْ ، ناسْ ماليها العنادْ كي يلقاو فيك الفرصة يغفلوكْ كي الصيّادْ

اما كي تجي تشوفْ يغفّلوكْ خير ملّي يستغفلوكْ لاعبين فيها يحبّوكْ و هوما اكثرْ ناسْ يكرهوكْ ، يظلموكْ وعاللفتة يغدروكْ و يدغروكْ يحبو علا ظهركْ يعيشو فيها ملوكْ نساو اللي هي ما دايمة لحدْ و انت ترا في هذا الكلْ و ساكتْ تجي تعمل حاجة متنجّمشْ تحاول تفهم وما تفهمشْ هالبشريّة ولات ذيابة عايشة في غابة وما تتامّنش ...