ويني تونس و ويني اعيادها ، وينو عيد العلوش ، العيد الكبير لي نفرحو بيه صغير وكبير ويدبي عالحصير ، اللي نتلمو فيه عالخير وايدينا تتمد وتعاون المحتاج والفقير ، وينو العلوش المقربط ، والعلوش اللي بالحنة ويني برائتنا كي كنا نسخايلو العلوش لي نذبحوه يمشي للجنة

ويني الشوّاية و الزقديدة والضحكة متع العايلة كي تتلم عالميدة ؟ وينو خبز الطابونة والسلاطة المشوية من يديات نسانا الحراير وبناتنا المقدية ؟ وينو عيد الكبش لي يدور والكانون لي يعجعج بالبخور ! وينو عيد اللحمة والشحمة ، عيد الدوارة والعصبان والكسكسي بالمسلان ، ...

عيادنا بهتت ووهجها طفا مع كل دمعة ميمة فقدت الضنا ، مع اللي دفنانهم تحت التراب بلا ذنب ، كل عيد ولات فيه نكبة للعرب ،، عيد تذبح فيه صدّام وعيد نتفكرو فيه وليداتنا الشعانبي لي تنحرو هكاكة حرام ، وينو العيد كي ترا الزوالي ما يقدرش وصغارو يحبو عالعلوش ، وينو العيد كي تشوف ليتيم ما يتلفتلو حد وما في حالوش ، ناس كالبة عالدنيا وناسية الاخرة

..

وينو العيد كي الفنانين والحقوقيين شادين الحبوسات و ماليهم حارقتهم الدّمعات ! وينو العيد كي تشوف البلاد ماشية للهاوية وفيها برشة نفوس مريضة ديمة عالغدرة ناوية ، منحبش نكد عليكم اما الحال لي وصلنالو يوجع ... عيد ورا عيد والدمومات باقي تسيل ، والزوالي يتنهد كي تكثر بيه الهموم في الليل ...عيد رجع وفيه قلوب ذايبة وريوس شايبة وناس علا اماليها واحبابها غايبة ... نشالله ربي يحييكم لامثالو ونشالله حال بلادي في العيد الجاي يكون خير ، وننهضو من غير نهضة !