Afek Ben Chahed - آفاق بالشّاهد

ڨدّاش تمنّيت ليّا ايديك تمدّي ،تمنّيت نهار نعيّطلك و تردّي ،تمنّيت تجيني و تمسح الدّمعة الّي على خدّي ،تمنّيت مرّة نڨرّبلك و ما تصدّي ،تمنّيت مرّة تشاركيني الحلمة و ماتهِدّي ،تمنّيتك تعدّي و تهدّي ،تمنّيتك ما تاخذيش أمّا تمدّي ،تمنّيتك تقدّري عرڨي و كدّي ...

 

يا تُونِسْ ڨدّاش حبّيتك .. حبّيتك و على خاطرك تذلّيت ،ياتُونِسْ كل حيط فيك من جوارحي حبّيت ، طلبتي شبابي و عمري و عطيت ، أرضك كي عطشت موش نا بالدّم سڨيت ؟ فمّاش مرّة ،عليك، حاجة استغْليت ؟نسيتي ؟ نسيتي ڨدّاش على حسابي بنيت و علّيت ؟نسيتي ڨدّاش من مرّة بيّتني بغُصتي و عليّا تخلّيت ؟نسيتي ڨدّاش حملت و همّك هزّيت ؟

 

نسيتي يا تُونِسْ .. ڨدّاش ڨلبي تعبّى ؟ڨدّاش تكدّر و خبّى ؟ڨدّاش كويتو و ليّعتو و ما تربّى ؟و عمرو ما ڨال خسارة فيك المحبّة .. و درّڨت ، درّڨت يا تونس...بش ما يڨولوش عليك طمّاعة ، كي جاعت كلت كبدتها و يتمت صغير ، درّڨت بش ما يڨولوش غدّارة ، و نكّارة للجميل و الخير ،درّڨت بش ما يڨولوش بدلت ولدها بالغريب و بجلت عليه الغير ،درّڨت يا تونس و كتمت السّر ، تدفنت ناي ويّاه في بير .

 

و ڨلت موش بالمزيّة ، موش بالمزيّة ،حُب الميمة و الصّاحبة و الاخّيّة ، ربّعتك على ڨلبي بيّة ، سوادك زيّنتو و طرزتو بالألوان ، ظلامك ضوّيتو بنار ڨلبي الهايجة كي البركان ،عشڨتك يا تونس و العشڨ فن ، عشڨتك أمّا انت اخترتي الوسخ و العفن ، اخترتي تبكّي الجفن و و تلفّي عاشڨك في الكفن ،عشڨتك مالجّواجي و بحرارة الرّوح ، أمّا انت اخترتي الدّم و الجّروح ،اخترتي الحزن و الطّروح .

آه يا تونس ماعاد ينفع عتاب و ملام في ڨلوب ميتة و هي فوڨ الأرض،و لاعاد ينفع كلام و لا سلام في بلاد ناسها بلا عرض ،في بلاد فيها الفقير يلاجي و يفاجي ،على لڨمة يسد بيها جوعو يراجي ،حفيان عريان ، مسكرة في وجهه جميع البيبان ،موجوع ، جرح كبير حفرهولو الزّمان ،لا ڨوّة لا حيلة ، ڨاعد يذوب ،يستنّى في ربّو بش ينوب ، وجهو يبس من فڨره الّي غصّصه في دموعه و بكّاه بالعبرة ،و طيّرلو أحلامو لسابع سما ، مشّاهملو غبرة ،في بلاد فيها ،المڨتول يتخبّط ماعادش ينجّم يعدّي ،ما عادش ينجّم أعصابو يهدّي ،ما عادش ينجّم يستنّى ،يحب يغمّض عينيه و يتهنّى .يحب يعرف شكون الّي ڨتل ، شكون الّي فحّج ع الدّم من غير حتّى ما سمّي باسم الله ، غدر ، دار ظهره و مشى ما ولّى .يستنّى وڨتاه يرڨد متهنّي في ڨبره ،ڨبل ما يبرد دمّه و ينفذ صبرَه .

آه يا تونس ڨدّاش وجعتي ، ڨدّاش كليتي و ما شبعتي ،ڨدّاش ڨلوب زلزلتي و خلعتي ،ڨدّاش بعتي .. و ڨدّاش ملّي حبّوك بلعتي ..

يا تونس حڨّي فوڨ رڨبتك خيط ذبّاح ،و ليلك ما يطلع عليه صباح ، مادام الشّهيد في ڨبره موش مرتاح .