Notice: Undefined variable: relatedArticlesCount in /home1/datalyz/public_html/tounsia/plugins/content/tags.php on line 149
الحب لول
Ameny Dhify - أماني ضيفي هذا حبك لول ، اللي ما يتنساش ..
اللي حكاولك عليه و مناوك بالنومة بين يديه ..
اللي حلولك بيه في الجنة ذراع و قالولك كان ما عشتوش عمرك راهو ضاع ..
هذا حبك لول ، بأيامو و لياليه ..
بأول كلمة و ضحكة و لمسة و حلمة ..
جاك ليديك و كبر فيك ..
هذا حبك لول يا مزيانة ..
أما من غير ألوانهم ، و بعيد على جنتهم ..
في بلاصة بعيدة و ما تشبهش لحكايتهم ..
هذا حبك لول .. و من غير تصاور و أفلام
مليان بالدموع ، و بالوجايع و بعمرو ما دلك على طريقك الضايع ..
هذا وجهك في المراية يحكي ألف حكاية ..
يحلف بالشمس و القمرة يعفس على الجرح اللي عمرو ما يبرا ..
و في ليلة و نهار يحن و يرجع ..
و القلب اللي حب مصيرو يتوجع ..
هذا حبك لول ..
عشقتك اللي ما تتنساش ..
الوشمة اللي ما تتمحاش ..
و اللي فهمك شمعاناها ما فما شيء بلاش ..
هذا دنيتك و غرامك ..
و الصوت اللي وصلك كلامك ..
هذا وجيعتك و دموعك ..
و الحاجة اللي تحسها و ما تتحكاش ..
هذا اللي كان شمعتك في الظلام ..
ضحكتك في أصعب أيام ..
و اللي مشا ما عليه ملام ..
و اليوم ، ثنيتك بلا بيه طويلة ..
و الثناية الكلها كيف كيف ..
و من كل شيء طار الكيف ..
اليوم وحدك يا مزيانة ، مع الشمس و القمرة و الجرح اللي عمرو ما يبرا ..
و يقولو الحب لول وحدو ..
لا قبلو و لا بعدو ..
و حتى وجيعة ما تجي قدو ..
و وجيعتي منك كبيرة ..
أكبر من. ها الدنيا الصغيرة ..
و قلبي عمرو ما ينسى و يطمان ..
موش خاطرني حبيتك ، و لا خاطر نسيت روحي و ما نسيتك ..
أما خاطرك حبي لول ..
اللي رماني في النار ..
و ضاع من بين يديا ..
كاينو لا كان و لا صار ..
أماني ضيفي
Website Design Brisbane
Tags: